Terrorist killed: ସୁରକ୍ଷାକର୍ମୀଙ୍କ ଏନକାଉଣ୍ଟର: ଆତଙ୍କୀ ନିପାତ, ଆହୁରି ଲୁଚି ରହିଥିବା ସୂଚନା

ସୋମବାର ଦିନ ଜମ୍ମୁ ଓ କାଶ୍ମୀରର କୁଲଗାମ ଜିଲ୍ଲାର ଗୁଦାର ଜଙ୍ଗଲରେ ସୁରକ୍ଷାକର୍ମୀ ଓ ଆତଙ୍କବାଦୀଙ୍କ ମଧ୍ୟରେ ଗୁଳି ବିନିମୟ ହୋଇଛି। ସୁରକ୍ଷାକର୍ମୀଙ୍କ ଏନକାଉଣ୍ଟରରେ ଜଣେ ଆତଙ୍କବାଦୀ ନିହତ ହୋଇଛି। ସେହିପରି ଆତଙ୍କବାଦୀଙ୍କ ପାଲଟା ଗୁଳି ଚାଳନାରେ ତିନି ଜଣ ସେନା ଯବାନ ଆହତ ହୋଇଛନ୍ତି।

ଅଧିକାରୀଙ୍କ ସୂଚନା ଅନୁଯାୟୀ, ଜମ୍ମୁ ଓ କାଶ୍ମୀର ପୋଲିସ ନିର୍ଦ୍ଦିଷ୍ଟ ଗୁପ୍ତ ସୂଚନା ଆଧାରରେ ସର୍ଚ୍ଚ ଅପରେସନ୍ ଆରମ୍ଭ କରିଥିଲା। ଯାହା ପରେ ଭାରତୀୟ ସେନା, ଜମ୍ମୁ- କାଶ୍ମୀର ପୋଲିସ ଏବଂ ସିଆରପିଏଫ ଦ୍ୱାରା ମିଳିତ ଭାବରେ ତଲାସି ଆରମ୍ଭ କରାଯାଇଥିଲା।

"ସେନା ଯବାନ ସନ୍ଦେହଜନକ କାର୍ଯ୍ୟକଳାପ ଦେଖିବା ପରେ ଅପରେସନ ଆରମ୍ଭ କରିଥିଲେ। ଆତଙ୍କବାଦୀମାନେ ପ୍ରଥମେ ଗୁଳି ଚଳାଇଥିଲେ, ଯାହା ଫଳରେ ଗୁଳି ବିନିମୟ ହୋଇଥିଲା। ଏଥିରେ ଜଣେ ଆତଙ୍କବାଦୀ ନିହତ ହୋଇଛି ଏବଂ ଜଣେ ଜୁନିଅର କମିଶନଡ୍ ଅଧିକାରୀ ଓ ଦୁଇ ଜଣ ଯବାନ ଆହତ ହୋଇଛନ୍ତି। ଅପରେସନ୍ ଜାରି ରହିଛି," ବୋଲି ଭାରତୀୟ ସେନାର ଚିନାର କର୍ପସ୍ X ରେ ଏକ ପୋଷ୍ଟରେ କହିଛି।

ସୁରକ୍ଷା ଅଧିକାରୀମାନେ କହିଛନ୍ତି ଯେ ଅଞ୍ଚଳରେ ଏବେ ବି ଦୁଇରୁ ତିନି ଜଣ ଆତଙ୍କବାଦୀ ଲୁଚି ରହିପାରନ୍ତି। ଅତିରିକ୍ତ ଫୋର୍ସ ମୁତୟନ କରାଯାଇଛି ଏବଂ ଏକ ଏନକାଉଣ୍ଟର ଜାରି ରହିଛି।

ଅଧିକ ପଢନ୍ତୁ: ଗାଧୋଇବା ବେଳେ ଭିଡିଓ କରୁଥିଲେ ଶ୍ବଶୁର-ଦିଅର, ବିରୋଧ କରିବାରୁ ମାଡ ମାରିଲେ: ସାଂସଦଙ୍କ ଭଉଣୀଙ୍କ ସଙ୍ଗୀନ ଅଭିଯୋଗ