ଭାରତ-ଚୀନ ସୀମା ବିବାଦ: ସ୍ଥିତି ଉପରେ ଆମେରିକାର ତୀକ୍ଷଣ ନଜର

ଅରୁଣାଚଳ ପ୍ରଦେଶର ତଓ୍ୱାଙ୍ଗ ସେକ୍ଟରରେ ଭାରତ-ଚୀନ ସୈନିକ ମୁହାଁମୁହିଁ ଘଟଣା ପରେ ଦେଖାଦେଇଥିବା ସ୍ଥିତି ଉପରେ ଆମେରିକା ତୀକ୍ଷଣ ନଜର ରଖିଛି। ତେବେ ଦୁଇ ଦେଶ ମଧ୍ୟରେ ରହିଥିବା ସୀମା ବିବାଦର ସମାଧାନ ଲାଗି ଦ୍ୱିପାକ୍ଷିକ ଚ୍ୟାନେଲର ବ୍ୟବହାର କରିବା ଲାଗି ଓ୍ୱାଶିଂଟନ୍ ଉଭୟ ବେଜିଂ ଓ ନୂଆଦିଲ୍ଲୀକୁ ପରାମର୍ଶ ଦେଇଛି। ହ୍ୱାଇଟ୍ ହାଉସ୍‌ର ପ୍ରେସ୍ ସଚିବ କେରିନ୍ ଜିନ୍ ପିୟରେ ଗତକାଲି ଏ ସମ୍ପର୍କିତ ସାମ୍ବାଦିକଙ୍କ ପ୍ରଶ୍ନର ଉତ୍ତରରେ ଏହି ପ୍ରତିକ୍ରିୟା ରଖିଛନ୍ତି। 

ଅଧିକ ପଢ଼ନ୍ତୁ: ସୀମାରେ ଉଡ଼ୁଛି ଲଢୁଆ ବିମାନ ! ଚୀନକୁ ପାନେ ଦେବାକୁ ସଜାଗ ବାୟୁସେନା

ଘଟଣା ପରେ ଦୁଇ ଦେଶ ଖୁବ ଶୀଘ୍ର ଉତ୍ତେଜନାକୁ ହ୍ରାସ କରିଥିବାରୁ ଆମେରିକା ଆଶ୍ୱସ୍ତି ପ୍ରକାଶ କରିଥିବା ହ୍ୱାଇଟ୍ ହାଉସ୍‌ର ପ୍ରେସ୍ ସଚିବ କହିଛନ୍ତି। ସେପଟେ ଆମେରିକା ପ୍ରତିରକ୍ଷା ବିଭାଗ ମୁଖ୍ୟାଳୟ ପେଣ୍ଟାଗନ୍  ମଧ୍ୟ  ଏ ପ୍ରସଙ୍ଗରେ  ପ୍ରତିକ୍ରିୟା ରଖିଛି।  ପେଣ୍ଟାଗନ୍ ପ୍ରେସ୍ ସଚିବ ପ୍ୟାଟ୍‌ ରାଇଡର କହିଛନ୍ତି, LACରେ ଭାରତ-ଚୀନ ମୁହାଁମୁହିଁ ଘଟଣା ପରବର୍ତ୍ତୀ ସ୍ଥିତି ଉପରେ  ଆମେରିକା ପ୍ରତିରକ୍ଷା ବିଭାଗ ନଜର ରଖିଛି।

ଚୀନ ଏଲ୍ଏସିରେ ବାରମ୍ବାର ସୈନ୍ୟ ଠୁଳ କରିବା ସହ ସାମରିକ ଭିତ୍ତିଭୂମି ନିର୍ମାଣ କରି ଆସୁଥିବା ନଜରକୁ ଆସିଛି।  ଏହା ଆମେରିକାର ସହଯୋଗୀ ତଥା ଇଣ୍ଡୋ-ପ୍ୟାସିଫିକରେ ଥିବା ଅଂଶୀଦାରଙ୍କ ପ୍ରତି ଚୀନର ଉତ୍ତେଜକ ମନୋବୃତ୍ତି।  ତେବେ ଆମେ ଆମର ସହଯୋଗୀ ଓ ଅଂଶୀଦାରଙ୍କ ସୁରକ୍ଷା ପାଇଁ ପ୍ରତିଶ୍ରୁତିବଦ୍ଧ ବୋଲି ପେଣ୍ଟାଗନ୍ ପ୍ରେସ୍ ସଚିବ କହିଛନ୍ତି।