India Pakistan Military Operation: ଭାରତର ଏହି ୩ ଲଢୁଆ ଯୁଦ୍ଧାସ୍ତ୍ର ପାକିସ୍ତାନକୁ ଦେଲା ମୁହଁତୋଡ଼ ଜବାବ

ଭାରତ ଉପରେ ହମଲା କରିବାରୁ ପାନେ ପାଇଛି ପାକିସ୍ତାନ। ରାତିଅଧିଆ ଭାରତର ଏୟାରଷ୍ଟ୍ରାଇକ କରି ପାକିସ୍ତାନର ନିଦ ହଜାଇଛି। ପହଲଗାମ ନରସଂହାରର ବଦଲା ନେବା ପାଇଁ ଭାରତୀୟ ସେନା ବେଶ ସଫଳତାର ସହ ଅପରେସନ ସିନ୍ଦୂରକୁ ଶେଷ କରିଛି। ପାକିସ୍ତାନର ଛାତି ଉପରେ ଠିଆ ହୋଇ ଅପରେସନ୍ ସିନ୍ଦୂରର ସଫଳ ଗାଥା ଗାଇଛି ଭାରତର ବୀର ସେନା। ସେନାର ତିନି ଲଢୁଆ ଯୁଦ୍ଧାସ୍ତ୍ର ଭାରତୀୟଙ୍କ ପ୍ରତିଶୋଧର ନିଆଁରେ ଶିଞ୍ଚିଛି ପାଣି।

ତେବେ ଏହି ଅପରେସନ ସିନ୍ଦୂରରେ ସ୍ଥଳ, ବାୟୁ ଓ ନୌସେନାର କମାଣ୍ଡୋମାନେ ସାମିଲ ଥିଲେ। ଏଥିସହ ଭାରତୀୟ ସେନା ଏହି ବଡ଼ ଅପରେସନରେ ବ୍ୟବହାର କରିଥିଲା ଦୂରଗାମୀ ଅସ୍ତ୍ରଶସ୍ତ୍ର । ଆସନ୍ତୁ ଜାଣିବା ତିନି ଲଢୁଆ ଯୁଦ୍ଧାସ୍ତ୍ର ବିଷୟରେ । ସେଗୁଡ଼ିକ ହେଲା ସ୍କାଲ୍‌ପ କ୍ରୁଜ ମିସାଇଲ, ହାମର ବୋମା ଓ ଆତ୍ମଘାତୀ ଡ୍ରୋନ।

ସ୍କାଲ୍‌ପ(ଝଡ଼ର ଛାଇ): ସ୍କାଲ୍‌ପ ମିସାଇଲ୍‌ ମଧ୍ୟ ଝଡ଼ର ଛାଇ ଭାବେ ପରିଚିତି। ଏହା ଏକ ଦୂରଗାମୀ ଏୟାର ଲଞ୍ଚଡ କ୍ରଜ ମିସାଇଲ। ଏହାର ଲକ୍ଷ୍ୟଭେଦ କ୍ଷମତା ୨୫୦ କିମି। ଗଭୀର ଷ୍ଟ୍ରାଇକ କ୍ଷମତା ପାଇଁ ଏହାକୁ ଡିଜାଇନ କରାଯାଇଛି।

ହାମର: ହାମର ସ୍ମାର୍ଟ ବୋମା କଠିନ ଓ ଶକ୍ତିଶାଳୀ ଟାର୍ଗେକୁ ଧ୍ୱଂସ କରିବାକୁ ବ୍ୟବହାର କରାଯାଏ। ବିଶେଷ କରି ବଙ୍କର ଓ ବହୁତଳ ବିଶିଷ୍ଟ କୋଠାକୁ ଏହା ଦ୍ୱାରା ମାଟିରେ ମିଶାଯାଏ। ଲସ୍କର ଓ ଜୈଶର ଟ୍ରେନିଂ ସେଣ୍ଟରକୁ ଅପରେସନ ସିନ୍ଦୂର ଦ୍ୱାରା ନଷ୍ଟ କରାଯାଇଛି। ଏଥିରେ ହାମର ପ୍ରମୁଖ ଭୂମିକା ଗ୍ରହଣ କରିଥିଲା। ହାମର ଗୋଟିଏ ସଠିକ ନିର୍ଦ୍ଦେଶିତ ସ୍ଥିର ଅସ୍ତ୍ର ଯାହା ୫୦ରୁ ୭୦ କିମି ଦୂରରେ ଥିବା ଟାର୍ଗେଟକୁ ଭେଦ କରିପାରେ।

ଆତ୍ମଘାତୀ ଡ୍ରୋନ: ଏହାକୁ କାମିକାଜେ ଡ୍ରୋନ ଭାବେ ମଧ୍ୟ ବୁଝାଯାଏ। ସର୍ଭେଲାନ୍ସ, ଟାର୍ଗେକୁ ଭେଦ କରିବା ଓ ଟର୍ମିନାଲ ଷ୍ଟ୍ରାଇକ ପାଇଁ ଏହା ଗୋଟିଏ ପ୍ରମୁଖ ଅସ୍ତ୍ର। ଏହି ଡ୍ରୋନ ଟାର୍ଗେଟ ଅଞ୍ଚଳ ଉପରେ ବୁଲିଥାଏ। ଏହାପରେ ଆପେଆପେ କିମ୍ବା ରିମୋଟ ଦ୍ୱାରା ନିୟନ୍ତ୍ରିତ ଟାର୍ଗେଟକୁ ଚିହ୍ନଟ କରିଥାଏ। ଏହାପରେ ସେଥିରେ ମାଡ଼ ହୋଇ ତା’କୁ ଧ୍ୱଂସ କରି ଦେଇଥାଏ। ଟାର୍ଗେଟକୁ ଚିହ୍ନଟ ନ କରିବା ଯାଏ ଏହା ହମଲା କରି ନଥାଏ।

କେଉଁ ସବୁ ସ୍ଥାନକୁ ଟାର୍ଗେଟ କରାଯାଇଛି

୧- ବାହାବଲପୁର: ଅନ୍ତର୍ଜାତୀୟ ସୀମା ଠାରୁ ୧୦୦ କିମି ଦୂର(ଜୈଶ ମୁଖ୍ୟାଳୟ)

୨- ମୁରିଦକେ: ଏଲଓସି ଠାରୁ ୩୦ କିମି ଦୂର( ୨୬/୧୧ ହମଲା ସହ ଲିଙ୍କ ରହିଥିବା ଲସ୍କର କ୍ୟାମ୍ପ)

୩- ଗୁଲପୁର: ପୁଞ୍ଚ-ରଜୌରୀ ଠାରୁ ୩୫ କିମି ଦୂର(୨୦୨୩ ଏପ୍ରିଲରେ ପୁଞ୍ଚ ଓ ୨୦୨୪ ଜୁନରେ ବସ ହମଲାର ଲିଙ୍କ)

୪- ସୱାଇ: ପିଓକେର ୩୦ କିମି ଭିତରେ ଥିବା ଗୋଟିଏ ସ୍ଥାନ(ସୋନମାର୍ଗ, ଗୁଲମାର୍ଗ ଓ ପହଲଗାମ ହମଲାର ଲିଙ୍କ ଥିଲା)

୫- ବିଲାଲ କ୍ୟାମ୍ପ: ଜୈଶର ଟେରର ଲଞ୍ଚ ପ୍ୟାଡ

୬- କୋଟଲି କ୍ୟାମ୍ପ: ରଜୌରୀର ବିପରୀତି ଦିଗରେ ଏଲଓସି ଠାରୁ ୧୫ କିମି ଦୂର(ଲସ୍କରର ବୋମା ପ୍ରସ୍ତୁତକାରୀ କ୍ୟାମ୍ପ)

୭- ବର୍ଣ୍ଣାଲା କ୍ୟାମ୍ପ: ଏଲଓସି ଠାରୁ ୧୦ କିମି ଦୂର

୮- ସର୍ଜାଲ କ୍ୟାମ୍ପ: ଅନ୍ତର୍ଜାତୀୟ ସୀମା ଠାରୁ ୮ କିମି(ଜୈଶ କ୍ୟାମ୍ପ)

୯- ମେହମୁନା କ୍ୟାମ୍ପ: ଆଇବି ଠାରୁ ୧୫ କିମି ଦୂର ସିଆଲ କୋଟ ନିକଟରେ(ହିଜବୁଲ ମୁଜାହିଦ୍ଦିନର ଟ୍ରେନିଂ କ୍ୟାମ୍ପ)

କାହିଁକି ଏସବୁ ସ୍ଥାନକୁ ଟାର୍ଗେଟ କରାଗଲା ?

ଭାରତୀୟ ସେନା ମିସାଇଲ ମାଡ଼ କରିଥିବା ୯ଟି ସ୍ଥାନର ଲିଙ୍କ ବଡ଼ବଡ଼ ଆତଙ୍କବାଦୀ ହମଲା ଓ ଅନୁପ୍ରବେଶ ସହ ରହିଥିଲା। ଭାରତୀୟ ଗୁଇନ୍ଦା ସଂସ୍ଥା ସର୍ଭେଲାନ୍ସ ଜରିଆରେ ଏହାକୁ ଚିହ୍ନଟ କରିଥିଲା। ନିର୍ଭରଯୋଗ୍ୟ ଗୁଇନ୍ଦା ତଥ୍ୟକୁ ଆଧାର କରି ଭାରତୀୟ ସେନା ସେହିଗୁଡ଼ିକୁ ଧ୍ୱଂସ କରିଛି।