Kerala Airport: ଏୟାରପୋର୍ଟରେ ଜରୁରୀ ଅବତରଣ କରିଥିଲା ବିମାନ, ପାର୍କିଂ ଫି ବାବଦକୁ ଦେବ ୫ ଲକ୍ଷ

ବ୍ରିଟେନର ରୟାଲ ନେଭିର F-35B ଯୁଦ୍ଧ ବିମାନ, ଯାହା ଜୁନ ୧୪ ତାରିଖରୁ ଥିରୁବନନ୍ତପୁରମ ଅନ୍ତର୍ଜାତୀୟ ବିମାନବନ୍ଦରରେ ଜରୁରୀ ଅବତରଣ କରିଥିଲା, ଜୁଲାଇ ୨୨ରେ ଅଷ୍ଟ୍ରେଲିଆର ଡାରୱିନକୁ ଉଡ଼ାଣ ଭରିଥିଲା। ଏକ ମାସରୁ ଅଧିକ ସମୟ ଧରି ଅଟକି ରହିଥିଲା ବିମାନ। ଜୁଲାଇ ୨୨ ସକାଳ ୧୦ଟା୧୫ରେ ସଫଳତାର ସହ ଉଡ଼ାଣ ଭରିଛି। ଏହି ଅତ୍ୟାଧୁନିକ ଷ୍ଟେଲଥ ଯୁଦ୍ଧ ବିମାନଟି ହାଇଡ୍ରଲିକ ସିଷ୍ଟମରେ ତ୍ରୁଟି ହେତୁ ଏକ ମାସରୁ ଅଧିକ ସମୟ ଧରି ବିମାନବନ୍ଦରରେ ଅଟକି ରହିଥିଲା। ଏୟାରପୋର୍ଟ ସୂତ୍ର ଅନୁଯାୟୀ, ୩୫ ଦିନର ଏହି ଅବଧି ପାଇଁ ପାର୍କିଂ ଏବଂ ଲ୍ୟାଣ୍ଡିଂ ଚାର୍ଜ ମିଳିତ ଭାବେ ପ୍ରାୟ ୫ ଲକ୍ଷ ଟଙ୍କା ହେବ ବୋଲି ଜଣାପଡ଼ିଛି।

ଲକହିଡ ମାର୍ଟିନ ଦ୍ୱାରା ନିର୍ମିତ ଏହି ପଞ୍ଚମ ପିଢ଼ିର ଷ୍ଟେଲଥ ବିମାନ ଜୁନ ୧୪ ତାରିଖ ରାତିରେ ଇନ୍ଧନ କମ ହେବା ପରେ ଜରୁରୀ ଅବତରଣ କରିବା ସମୟରେ ବୈଷୟିକ ତ୍ରୁଟି ଦେଖାଦେଇଥିଲା, ଯାହା ପରେ ଏହା ଥିରୁବନନ୍ତପୁରମରେ ଅଟକି ରହିଥିଲା। ଏହି ବିମାନର ମୂଲ୍ୟ ୧୧୦ ମିଲିୟନ ଡଲାରରୁ ଅଧିକ, ବ୍ରିଟେନର HMS ପ୍ରିନ୍ସ ଅଫ ୱେଲ୍ସ ଏୟାରକ୍ରାଫ୍ଟ କ୍ୟାରିଅରରୁ ଏକ ନିୟମିତ ଅଭ୍ୟାସ ସମୟରେ କେରଳ ଉପକୂଳରୁ ପ୍ରାୟ ୧୦୦ ନୋଟିକାଲ ମାଇଲ ଦୂରରେ ଖରାପ ପାଗ ଏବଂ କମ ଇନ୍ଧନ ହେତୁ ଜରୁରୀ ଅବତରଣ କରିଥିଲା। ଭାରତୀୟ ବାୟୁସେନା (IAF) ଏହାର ନିରାପଦ ଅବତରଣରେ ସହାୟତା କରିଥିଲା ଏବଂ ଇନ୍ଧନ ଯୋଗାଣ ସମେତ ଅନ୍ୟାନ୍ୟ ସହଯୋଗ ପ୍ରଦାନ କରିଥିଲା। ସେଣ୍ଟ୍ରାଲ ଇଣ୍ଡଷ୍ଟ୍ରିଆଲ ସିକ୍ୟୁରିଟି ଫୋର୍ସ (CISF) ବିମାନଟିକୁ ୨୪ ଘଣ୍ଟା ସୁରକ୍ଷା ପ୍ରଦାନ କରିଥିଲା।

ଜୁଲାଇ ୬ରେ, ବୈଷୟିକ ସମସ୍ୟାର ସମାଧାନ ପାଇଁ ୧୪ ଜଣ ଇଞ୍ଜିନିୟର ଏବଂ ୧୦ ଜଣ କ୍ରୁ ସହିତ ଏକ ୨୪ ଜଣିଆ ବ୍ରିଟିଶ ରୟାଲ ଏୟାର ଫୋର୍ସ ଟିମ ଏୟାରବସ A400M ଆଟଲାସ ବିମାନରେ ବିଶେଷ ଉପକରଣ ସହିତ ତିରୁବନନ୍ତପୁରମ ପହଞ୍ଚିଥିଲେ। ବିମାନଟିକୁ ଏୟାର ଇଣ୍ଡିଆ ଇଞ୍ଜିନିୟରିଂ ସର୍ଭିସେସର ହ୍ୟାଙ୍ଗାରକୁ ନିଆଯାଇ ମରାମତି କାମ ଆରମ୍ଭ ହୋଇଥିଲା। ମରାମତି ପରେ, ବିମାନଟି ପୁଣି ଉଡ଼ାଣ ପାଇଁ ପ୍ରସ୍ତୁତ ହୋଇଥିଲା।

ବ୍ରିଟିଶ କର୍ତ୍ତୃପକ୍ଷଙ୍କୁ ଥିରୁବନନ୍ତପୁରମ ବିମାନବନ୍ଦରକୁ ପାର୍କିଂ ଫି’ ବାବଦକୁ ପ୍ରାୟ ୫ ଲକ୍ଷ ଟଙ୍କା ଦେବାକୁ ପଡ଼ିବ। ଏହି ରାଶି ବିମାନର ଆକାର ଏବଂ ଓଜନ, ଏହା ଏଠାରେ ରହିଥିବା ଦିନ ସଂଖ୍ୟା ଏବଂ କ୍ରୁ ସଦସ୍ୟମାନେ ବିମାନବନ୍ଦରରେ ରହିବା ସମୟରେ ଉପଯୋଗ କରିଥିବା ସୁବିଧାଗୁଡ଼ିକୁ ବିଚାର କରି ନିର୍ଦ୍ଧାରଣ କରାଯାଇଛି। ଦିନକୁ ୧୫,୦୦୦-୨୦,୦୦୦ ଟଙ୍କା ହିସାବରେ ୫ ଲକ୍ଷ ଟଙ୍କା ଦେୟ ଦେବାକୁ ପଡିବ।

ଅଧିକ ପଢନ୍ତୁ: ହରିୟାଣା ଓ ଦିଲ୍ଲୀରେ ଭୂମିକମ୍ପର ଝଟକା ଅନୁଭୂତ, ରିକ୍ଟର ସ୍କେଲରେ ୩.୨ ତୀବ୍ରତା ରେକର୍ଡ