LIVE TV
ପହଲଗାମ୍ ଆତଙ୍କୀ ହମ୍ଲାକୁ ନେଇ ପ୍ରଧାନମନ୍ତ୍ରୀଙ୍କ କଡ଼ା ଚେତାବନୀ । ଆକ୍ରମଣକାରୀଙ୍କୁ କଳ୍ପନାଠୁ ବଡ଼ ଦଣ୍ଡ ଦିଆଯିବ। ଯେଉଁ ଭୂଖଣ୍ଡକୁ ଆତଙ୍କବାଦୀ ବ୍ୟବହାର କରୁଛନ୍ତି ତାକୁ ମାଟିରେ ମିଶାଇବୁ । ପ୍ରତିଟି ଆତଙ୍କବାଦୀଙ୍କୁ ଚିହ୍ନଟ କରି ଖୋଜି ଖୋଜି ଦଣ୍ଡ ଦେବୁ । ଯାହା ସେମାନେ କେବେ ଭାବି ନଥିବେ ।
ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କହିଛନ୍ତି, ଗତ ୨୨ ତାରିଖର ଏହି ଘଟଣାରେ ଆତଙ୍କବାଦୀମାନେ କେବଳ ନିରୀହ ପର୍ଯ୍ୟଟକଙ୍କ ଉପରେ ଆକ୍ରମଣ କରିନାହାନ୍ତି, ବରଂ ଭାରତର ଆତ୍ମା ଉପରେ ଆକ୍ରମଣ କରିବାର ଦୁଃସାହସ କରିଛନ୍ତି । ଏହି ଘଟଣାରେ କେହି ନିଜର ପୁଅକୁ ହରେଇଛି ତ, କିଏ ନିଜର ବାପାଙ୍କୁ ହରେଇଛି । ପୁଣି କିଏ ନିଜର ସ୍ୱାମୀଙ୍କୁ ହରେଇଛି । ଏହି ଘଟଣାରେ କିଏ ଓଡ଼ିଆ ତ କିଏ ମରାଠୀ, କିଏ ଗୁଜରାଟୀ ତ ପୁଣି କିଏ ବିହାରୀ, ସମସ୍ତେ ପ୍ରାଣ ହରାଇଛନ୍ତି ।
Also Read
ଏହି ଘଟଣାରେ ଭାରତ ଦୃଢ଼ ରହିଛି । ଆତଙ୍କବାଦୀଙ୍କୁ କଳ୍ପନାଠାରୁ ଅଧିକ ସଜା ମିଳିବ । ଯାହା ସେମାନେ କେବେ ଭାବି ପାରିନଥିବେ । ଯେଉଁ ଭୂଖଣ୍ଡକୁ ବ୍ୟବହାର କରୁଛନ୍ତି ତାକୁ ମାଟିରେ ମିଶାଇବାର ବେଳ ଆସିଛି । ବିଶ୍ୱକୁ ପ୍ରଧାନମନ୍ତ୍ରୀ କହିଛନ୍ତି ଯେ, ଏହି ଆତଙ୍କବାଦୀଙ୍କୁ ଚିହ୍ନଟ କରାଯିବ, ଧରାଯିବ ଓ କଠୋର ଦଣ୍ଡ ବି ଦିଆଯିବ । କାରଗିଲଠାରୁ ଠାରୁ କନ୍ୟାକୁମାରୀ ପର୍ଯ୍ୟନ୍ତ ଦେଶବାସୀ ଏହାକୁ ନେଇ ଲୁହ ଗଡ଼ାଉଛନ୍ତି । କ୍ଷୋଭ ମଧ୍ୟ ପ୍ରକାଶ କରୁଛନ୍ତି । ଲୋକଙ୍କ ମଧ୍ୟରେ ପ୍ରତିଶୋଧର ବହ୍ନି ଜଳୁଛି ।
୧୪୦ କୋଟି ଭାରତୀୟଙ୍କ ଆଶା ଓ ଆକାଂକ୍ଷାକୁ ଭାଙ୍ଗିବାକୁ ଦିଆଯିବ ନାହିଁ ବୋଲି ପ୍ରଧାନମନ୍ତ୍ରୀ ଦୃଢ଼ ସ୍ୱରରେ କହିଛନ୍ତି । ଭାରତ ଆତଙ୍କବାଦର ମୂଳପୋଛ କରିବାକୁ ସେ ଆହ୍ୱାନ ଦେଇଛନ୍ତି । ଆତଙ୍କବାଦ ବିରୋଧରେ ଲଢ଼େଇକୁ ଜୋରଦାର କରିବ । ଆତଙ୍କବାଦୀଙ୍କ ଜମି ଛଡେଇ ନିଆଯିବ ବୋଲି ସେ ଶାଣିତ ଆକ୍ରମଣ କରିଛନ୍ତି । ବିଶ୍ୱର ବିଭିନ୍ନ ଦେଶର ନେତାମାନେ ଭାରତ ସହ ଏହି ସମୟରେ ଛିଡା ହୋଇଥିବାରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସେମାନଙ୍କୁ ଧନ୍ୟବାଦ ଜଣାଇଛନ୍ତି ।
ଅଧିକ ପଢ଼ନ୍ତୁ: ପହଲଗାମର ପରିଣତି ୱାଟର ଷ୍ଟ୍ରାଇକ: କ’ଣ ଏହି ସିନ୍ଧୁ ଜଳ ଚୁକ୍ତିନାମା, ପାକିସ୍ତାନକୁ କେମିତି ଲାଗିବ ଝଟ୍କା ?
ପହଲଗାମ୍ ଘଟଣାରେ ଆତଙ୍କବାଦୀଙ୍କ ଆକ୍ରମଣରେ ପ୍ରାଣ ହରାଇଥିବା ବ୍ୟକ୍ତିଙ୍କ ପାଇଁ ସଭାରେ କିଛି ସମୟ ନୀରବ ପ୍ରାର୍ଥନା କଲେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ନିଜେ ହାତ ଯୋଡି ଶ୍ରଦ୍ଧାଞ୍ଜଳି ଦେବା ସହ ଉପସ୍ଥିତ ଜନତା ନିଜ ନିଜ ଆସନରେ ବସି ରହି ନୀରବ ପ୍ରାର୍ଥନା କରିବାକୁ ଅନୁରୋଧ କରିଥିଲେ ପ୍ରଧାନମନ୍ତ୍ରୀ । ତା ପରେ ଓଁ ଶାନ୍ତି କହି ଆରମ୍ଭ କରିଥିଲେ ଭାଷଣ । ଶେଷ ବେଳକୁ ଭାରତ ମାତା କୀ ଜୟ କହି ଭାଷଣ ଶେଷ କରିଥିଲେ ପ୍ରଧାନମନ୍ତ୍ରୀ ମୋଦି । ତେବେ ତାଙ୍କ ଭାଷଣରେ ପ୍ରଧାନମନ୍ତ୍ରୀ ବିହାର ମାଟିରୁ ଆତଙ୍କବାଦୀଙ୍କୁ କଡ଼ା ଚେତାବନୀ ଦେଇଛନ୍ତି ।
ବିହାରର ମଧୁବନିରେ ପଞ୍ଚାୟତିରାଜ ଦିବସ ପାଳନ ଅବସରରେ ଉଦବୋଧନ ଦେଇ ପ୍ରଧାନମନ୍ତ୍ରୀ କହିଛନ୍ତି, ବିହାରରୁ ସତ୍ୟାଗ୍ରହର ବୀଜ ବୁଣିଥିଲେ ବାପୁଜୀ । ଗାଁର ବିକାଶ ନହେଲେ ଦେଶର ବିକାଶ ହୋଇପାରିବ ନାହିଁ ବୋଲି ବାପୁଜୀ କହିଥିଲେ । ପଞ୍ଚାୟତରେ ମହିଳାଙ୍କ ପାଇଁ ୫୦ ପ୍ରତିଶତ ସଂରକ୍ଷଣ ବ୍ୟବସ୍ଥା କରି ବିହାର ସାମାଜିକ ନ୍ୟାୟକୁ ଆଗକୁ ନେଇଥିବା କହିଛନ୍ତି ପ୍ରଧାନମନ୍ତ୍ରୀ । ତେବେ ଦେଶର ବିକାଶ ପାଇଁ ବିକଶିତ ଭାରତ ପାଇଁ ଶାନ୍ତି ଓ ସୁରକ୍ଷା ଜରୁରୀ ବୋଲି କହିଛନ୍ତି ପ୍ରଧାନମନ୍ତ୍ରୀ।
ଅଧିକ ପଢ଼ନ୍ତୁ: ଭାରତ କଲା ଡିଜିଟାଲ ଷ୍ଟ୍ରାଇକ୍, ପାକିସ୍ତାନର ସରକାରୀ ‘X’ ଆକାଉଣ୍ଟକୁ କଲା ବ୍ୟାନ୍
