ବିବାହ ପରେ ପୁଅ ଯେମିତି ବାପାର, ଝିଅ ବି ସେମିତି...କୋଟାରେ ରହିଛି ଉଭୟଙ୍କ ଅଧିକାର...

ପୁଅ-ଝିଅ ସମସ୍ତେ ସମାନ । ଏହି ନାରା ଆମେ ସମସ୍ତେ ଦେଉଥିଲେ ବି କିଛିକାଂଶରେ ଏହା ପାଳନ ହୋଇଥାଏ । କିନ୍ତୁ ଅଧିକାଂଶ କ୍ଷେତ୍ରରେ ପୁଅ ଝିଅ ମଧ୍ୟରେ ଭିନ୍ନତା ଦେଖାଯାଇଥାଏ ବା ପାତର ଅନ୍ତର କରାଯାଇଥାଏ । ଯେଉଁ ସମାଜରେ ପୁଅ ଝିଅ ସମାନ ବୋଲି କୁହାଯାଉଛି, ସେହି ସମାଜ ହିଁ ବିଭିନ୍ନ କ୍ଷେତ୍ରରେ ପୁଅ ଝିଅ ସମାନ ନୁହେଁ ବୋଲି ବିଭିନ୍ନ ଘଟଣା ପ୍ରମାଣ କରୁଛି ।

ଠିକ୍‌ ଏମିତି କିଛି ଘଟଣା ଏବେ କୋର୍ଟରେ ପହଞ୍ଚିଛି । କର୍ଣ୍ଣାଟକ ହାଇକୋର୍ଟରେ ଏକ ମାମଲାର ଶୁଣାଣି କରିବା ବେଳେ କୋର୍ଟ କହିଛନ୍ତି, ବାପାର ନାଁରେ ପୁଅର ଯେତିକି ଅଧିକାର ଅଛି ଝିଅର ବି ସେତିକି ଅଧିକାର ରହିଛି । ଖାଲି ସେତିକି ନୁହେଁ କୋର୍ଟ ଆହୁରି ବି କହିଛନ୍ତି, ପୁଅ ଯଦି ବିବାହ କରିବା ପରେ ବାପା ନାଁର ଫାଇଦା ନେଇପାରୁଛି ବା ବାପାଙ୍କୁ ମିଳୁଥିବା ସବୁ ସରକାରୀ ଫାଇଦା ପାଇପାରୁଛି ତେବେ ଝିଅ କାହିଁକି ନୁହେଁ ।

ବିବାହ ପରେ ପୁଅ ଯଦି ପୁଅ ହୋଇ ରହିପାରୁଛି ଏବଂ ବାପାର ନାଁ ମଧ୍ୟ ବ୍ୟବହାର କରିପାରୁଛି ତେବେ ଝିଅ ମଧ୍ୟ ବିବାହ କରିବା ପରେ ଝିଅ ହୋଇ ରହିବ ଆଉ ବାପାର ନାଁ ବ୍ୟବହାର କରିପାରିବ । ପୁଅ ଯେମିତି ବାପାକୁ ମିଳୁଥିବା ସରକାରୀ ଯୋଜନାର ଫାଇଦା ନେଉଛି ଝିଅ ବି ସେମିତି ନେଇପାରିବ । ଏଭଳି ଏକ ଗୁରୁତ୍ୱପୂର୍ଣ୍ଣ ରାୟ ପ୍ରକାଶ କରିଛନ୍ତି କର୍ଣ୍ଣାଟକ ହାଇକୋର୍ଟ ।

ଅଧିକ ପଢ଼ନ୍ତୁ: ଗର୍ତ୍ତ ପାଇଁ ସଡ଼କ ଦୁର୍ଘଟଣା ହେଲେ ଦାୟୀ ରହିବେ ଜିଲ୍ଲାପାଳ : କେରଳ ହାଇକୋର୍ଟ

ସୂଚଳନାଯୋଗ୍ୟ, କର୍ଣ୍ଣାଟକ ହାଇକୋର୍ଟ ଗତ ଜାନୁଆରୀ ଦୁଇ ତାରିଖରେ ଏମିତି ଏକ ମାମଲାର ଶୁଣାଣି କରି ଏହି ରାୟ ପ୍ରକାଶ କରିଛନ୍ତି । ତେବେ ପୁରା ମାମଲାଟି ଥିଲା ଯେ, ଜଣେ ଏକ୍‌ସ ସର୍ଭିସ୍‌ ମ୍ୟାନ୍‌ଙ୍କ ବିବାହିତ ଝିଅ ନିଜ ବାପାର ପରିଚୟ ପାଇଁ କୋର୍ଟଙ୍କ ଦ୍ୱାରସ୍ଥ ହୋଇଥିଲେ । ସେ କହିଥିଲେ କର୍ଣ୍ଣାଟକ ସରକାରଙ୍କ ଦ୍ୱାରା ଦିଆଯାଉଥିବା ଏକ୍ସ ସର୍ଭିସ୍‌ ମ୍ୟାନ୍‌ କୋଟା ବା ରିଜର୍ଭେସନ୍‌ ସୁବିଧା ଯଦି ପୁଅ ନେଇ ପାରୁଛନ୍ତି ତେବେ ଝିଅ କାହିଁକି ନୁହେଁ । ତେବେ ଏହି ମାମଲାର ଶୁଣାଣି କରି କୋର୍ଟ କହିଥିଲେ ଯେ, ବିବାହ ପରେ ପୁଅ ଯଦି ପୁଅ ହୋଇ ରହୁଛି ଝିଅ ବି ସେମିତି ଝିଅ ହୋଇ ରହିବ । ସେ ବି ବାପା ନାଁର ସୁବିଧା ପାଇବାର ହକ୍‌ଦାର ।