ମଦ ଦୋକାନ ଆଗରେ ଗାଈ ବାନ୍ଧିଲେ ଉମା; କ୍ଷୀର ପିଇବାକୁ କହିଲେ

ଭାରତୀୟ ଜନତା ପାର୍ଟିର ନେତ୍ରୀ ଉମା ଭାରତୀଙ୍କ କାର୍ଯ୍ୟ ଏବେ ସବୁଠି ଚର୍ଚ୍ଚାର ବିଷୟ ପାଲଟିଛି । ମଦ୍ୟପାନକୁ ବିରୋଧ କରି ଉମା ଏକ ନୂତନ ଧରଣର ଜନ ସଚେତନତା ସୃଷ୍ଟି କରିଛନ୍ତି । ଗତକାଲି ମଧ୍ୟପ୍ରଦେଶର ଓର୍ଚ୍ଚାରେ ବିଜେପି ନେତ୍ରୀ ଉମା ଭାରତୀ ଏପରି ଏକ ଆହ୍ୱାନ ଦେଇଥିବା ଦେଖିବାକୁ ମିଳିଛି ।

କିଛି ଗାଈଙ୍କୁ ଦୋକାନ ସମ୍ମୁଖକୁ ଆଣିବା ସହ ମଦ ଦୋକାନ ଆଗରେ ବାନ୍ଧି କ୍ଷୀର ପିଇବାକୁ ଉମା କହିଛନ୍ତି । ତାଙ୍କର ଏହି ନିଆରା ଜନ ସଚେତନତା କାର୍ଯ୍ୟ ସମୟରେ ଅନେକ ସମର୍ଥକ ମଧ୍ୟ ତାଙ୍କ ସହ ସାମିଲ ହୋଇଥିବା ଦେଖିବାକୁ ମିଳିଥିଲା।

ମଧ୍ୟପ୍ରଦେଶ ନିୱାରୀ ଜିଲ୍ଲାର ଓର୍ଚ୍ଚାରେ ଏହି ଭିନ୍ନ ସଚେତନତା କରିଛନ୍ତି ଉମା ଭାରତୀ । ମଦ ଦୋକାନ ଆଗରେ ଉମା ଠିଆହୋଇ ‘ମଦ ନୁହେଁ କ୍ଷୀର ପିଅନ୍ତୁ’ ସ୍ଲୋଗାନ ଦେଇଥିଲେ । ଉମାଙ୍କ ଏପରି ଆହ୍ୱାନ ବର୍ତ୍ତମାନ ସାଧାରଣରେ ଚର୍ଚ୍ଚାର ବିଷୟ ପାଲଟିଛି ।

ଅଧିକ ପଢ଼ନ୍ତୁ: ଓଡିଶା ଦଖଲ ପାଇଁ ବିଜେପିର ବ୍ଲୁ ପ୍ରିଣ୍ଟ : ଫୋକସରେ ୧୮ରୁ ୨୫ ବର୍ଷୀୟ ଯୁବ ଭୋଟର୍

ଗତ ବର୍ଷ ଜୁନ୍ ମାସରେ ବିଜେପି ନେତାଙ୍କ ପକ୍ଷରୁ ମଧ୍ୟପ୍ରଦେଶରେ ବିକ୍ଷୋଭ ପ୍ରଦର୍ଶନ କରାଯାଇଥିଲା । ଭାରତୀୟ ଜନତା ପାର୍ଟିର ନେତାମାନେ ମଦ ଦୋକାନ ଉପରକୁ ଗୋବର ଫିଙ୍ଗିଥିଲେ । ମଧ୍ୟପ୍ରଦେଶର ପୂର୍ବତନ ମୁଖ୍ୟମନ୍ତ୍ରୀ ମଧ୍ୟ ଏଥିରେ ସାମିଲ ହୋଇଥିଲେ । ବିଜେପି ଶାସିତ ରାଜ୍ୟରେ ମଦ୍ୟପାନକୁ ବିରୋଧ କରାଯାଇଥିଲା ।

ସେହିପରି ଗତ ମାସରେ ଉମା ଭାରତୀ ଭୋପାଳର ଏକ ମନ୍ଦିରରେ ପହଞ୍ଚିଥିଲେ । ମଦ ନୀତି ଘୋଷଣାକୁ ଅପେକ୍ଷା କରିବା ସହ ଜାନୁଆରୀ ୩୧ ତାରିଖ ଯାଏଁ ସେଠାରେ ଉପସ୍ଥିତ ରହିବେ ବୋଲି ଘୋଷଣା କରିଥିଲେ। ମିଳିଥିବା ସୂଚନା ଅନୁସାରେ ସେଠାରେ ଥିବା ମନ୍ଦିର ଆଗରେ ଏକ ମଦ ଦୋକାନ ରହିଛି ।