ରୋଷେଇ ଘରେ ହେଉଛି କି ଗ୍ୟାସ୍‌ ଲିକ୍‌ ? ଆପଣାନ୍ତୁ ଏହି ୪ ଉପାୟ

ଏଣିକି ପ୍ରାୟ ସମସ୍ତେ ଗ୍ୟାସରେ ରୋଷେଇ କରୁଛନ୍ତି । ପ୍ରତ୍ୟେକ ରୋଷେଇ ଘରେ ଗ୍ୟାସର ଚାହିଦା ବଢ଼ିଛି । ହେଲେ ଗ୍ୟାସରେ ରୋଷେଇ କରିବା ସମୟରେ ସାବଧାନତା ଅବଲମ୍ବନ କରିବା ନିହାତି ଜରୁରୀ । କାରଣ ଘରକୁ ଆସୁଥିବା କିଛି ଗ୍ୟାସ ସିଲିଣ୍ଡରରେ ଲିକେଜ୍‌ ରହୁଥିବା ବେଳେବେଳେ ଦେଖିବାକୁ ମିଳିଥାଏ । ଯାହାକୁ ନେଇ ଲୋକଙ୍କ ମଧ୍ୟରେ ଡର ରହିଥାଏ । ତେବେ ଆସନ୍ତୁ ଜାଣିବା ଯଦି କେବେ ଗ୍ୟାସ ଲିକ୍‌ ହୁଏ ତେବେ ଆପଣ କ’ଣ କରିବେ...

୧. ଆପଣଙ୍କ ଘରେ ରହିଥିବା ଗ୍ୟାସ୍ ଯଦି ଲିକ୍ ହେଉଛି, ତେବେ ଆପଣ ସର୍ବପ୍ରଥମେ ଘରର କବାଟ ଏବଂ ଝରକା ଗୁଡ଼ିକୁ ଖୋଲା କରିଦିଅନ୍ତୁ । ଖାଲି ସେତିକି ନୁହେଁ, ଘରର ଲାଇଟ୍ ସୁଇଚ୍ ଗୁଡ଼ିକୁ ଅନ୍ କରନ୍ତୁ ନାହିଁ କିମ୍ବା ଯଦି ଅନ୍ ଅଛି ଅଫ୍ କରନ୍ତୁ ନାହିଁ। । ଭୁଲରେ ବି ଦିଆସିଲି ଲଗାନ୍ତୁ ନାହିଁ । ଏହା କରିବା ଦ୍ୱାରା ଆପଣ ସୁରକ୍ଷିତ ରହିପାରିବେ । କାରଣ ଏପରି କରିବା ଯୋଗୁ ଅଗ୍ନିକାଣ୍ଡ ଘଟିବାର ସମ୍ଭାବନା ଖୁବ୍‌ କମ୍‌ ରହିଥାଏ ।

୨. ଗ୍ୟାସ୍ ସିଲିଣ୍ଡରରୁ ଗ୍ୟାସ୍ ଲିକ୍ ହେଉଥିବା ଜାଣିବା ପରେ ଆପଣ ତୁରନ୍ତ ରେଗୁଲେଟର ବନ୍ଦ କରନ୍ତୁ । ଏହା କରିବା ଦ୍ୱାରା ଗ୍ୟାସ୍‌ ଲିକ୍‌ ହେବା ବନ୍ଦ ହୋଇଯାଥାଏ । ଯଦି ବି ଏହା କରିବା ପରେ ମଧ୍ୟ ଗ୍ୟାସ୍‌ ଲିକ୍‌ ବନ୍ଦ ନହୁଏ ତେବେ ତୁରନ୍ତ ସିଲିଣ୍ଡରରୁ ରେଗୁଲେଟର ବାହାର କରି ସିଲିଣ୍ଡରର କ୍ୟାପ୍‌ ଲଗାଇଦେବା ଉଚିତ୍‌ ।

୩. ଏହା ଛଡ଼ା ଯଦି ଗ୍ୟାସ ଲିକ୍‌ ଅଧିକ ମାତ୍ରାରେ ହେଉଥାଏ । ତେବେ ତୁରନ୍ତ ଗ୍ୟାସ୍ ଡିଲର କିମ୍ବା ଏଜେନ୍ସି ସହିତ ଯୋଗାଯୋଗ କରିନେବା ଉଚିତ୍‌ । ସେମାନଙ୍କୁ ଅଭିଯୋଗ କରିବା ପରେ ସେମାନେ ଆପଣଙ୍କ ଗ୍ୟାସ୍ ସିଲିଣ୍ଡରକୁ ବଦଳାଇ ଏକ ନୂଆ ସିଲିଣ୍ଡର ପ୍ରଦାନ କରିବେ । ଏଠାରେ ମନେରଖନ୍ତୁ, ସିଲିଣ୍ଡର ନେବାବେଳେ ଡିଲରଙ୍କ ଠାରୁ ଲିକେଜ୍ ନିଶ୍ଚୟ ଯାଞ୍ଚ କରନ୍ତୁ ।

୪. ଶେଷରେ କହିରଖିବୁ, ଯଦି ଅପଣଙ୍କ ସିଲିଣ୍ଡର ଲିକ୍‌ କରୁଛି । ଆଉ ନିଆଁ ମଧ୍ୟ ଧରି ସାରିଛି । ତେବେ ତଥାପି ଭୟ ନକରି କମ୍ବଳ କିମ୍ବା ମୋଟା ଚାଦରକୁ ପାଣିରେ ଭିଜାଇ ସିଲିଣ୍ଡକୁ ଘୋଡାଇ ଦିଅନ୍ତୁ । ଏପରି କରିବା ଦ୍ୱାରା ନିଆଁ ଆୟତ୍ତ ହୋଇଯିବ ।