ସଜାଡ଼ି ହେଉଛି ଅସଜଡ଼ା ନଗଡ଼ା; ଏବେ ବି ଅବହେଳିତ ୩ ଗାଁ

ସଜାଡ଼ି ହେଉଛି ଅସଜଡ଼ା ନଗଡ଼ା । ବଦଳୁଛି ଧୀରେ ଧୀରେ ନଗଡ଼ାର ଚିତ୍ର । ଲୋକଙ୍କୁ ମିଳିଛି ପକ୍କାଘର । ପିଲାଙ୍କ ପାଇଁ ହୋଇଛି ପାଠପଢ଼ା ବ୍ୟବସ୍ଥା । ହେଲେ ଏବେ ବି ଅବହେଳିତ ରହିଛି ୩ ଗାଁ ।

ଗାଁକୁ ନାହିଁ ରାସ୍ତା... ପହଞ୍ଚିପାରୁନି ସୁବିଧା । ଗୁହିଆସାଳ, ତଳଡିହ ଓ ତୁମୁଣି ବନ୍ଧ ଭଳି ଗାଁ ଏବେ ବି ସରକାରଙ୍କ ଦୃଷ୍ଟି ଆଢୁଆଳରେ ରହିଯାଇଛି । ତେବେ ନଗଡା ଅଞ୍ଚଳର କିଛି ଲୋକଙ୍କ ନିକଟରେ ପହଞ୍ଚିଛି ପକ୍କାଘର । ଗାଁକୁ ପକ୍କା ସଡକ ମଧ୍ୟ ତିଆରି ହୋଇଛି । ଲୋକଙ୍କୁ ମିଳିଛି ସ୍ୱାସ୍ଥ୍ୟ ସେବା, ବିଦ୍ୟୁତ ଓ ଶିକ୍ଷାପରି ମୌଳିକ ସୁବିଧା । ହେଲେ ଏସବୁ ପରେ ବି ଗୁହିଆସାଳ, ତଳଡିହ ଓ ତୁମୁଣି ବନ୍ଧ ଭଳି ଗାଁର ଲୋକମାନେ ରାସ୍ତାନଥିବାରୁ ନାନା ଅସୁବିଧାର ସମ୍ମୁଖୀନ ହେଉଛନ୍ତି ।

ଦିନେ ଅପହଞ୍ଚ ଓ ଅପପୃଷ୍ଟିର ଇଲାକା ଭାବେ ସାରା ଦେଶରେ ନିଜର ପରିଚୟ ଦେଇଥିଲା ନଗଡ଼ା । ଏହି ପଛୁଆ ଅଞ୍ଚଳର ଦୁର୍ବିସହ କାହାଣୀ ଗଣମାଧ୍ୟମ ବଖାଣିବା ପରେ ସରକାର ନେଇଥିଲେ ପଦକ୍ଷେପ । ଯାହାଫଳରେ ଆଜି ଲୋକଙ୍କ ନିକଟରେ ପହଞ୍ଚି ପାରିଥିଲା ମୌଳିକ ସୁବିଧା । କିନ୍ତୁ ସରକାରଙ୍କ ଦୃଷ୍ଟି ଆଢୁଆଳରେ ରହିଯାଇଛି ଏହି ୩ ଗାଁ ।

ଏ ବିଷୟରେ ଆମେ ଯାଜପୁର ଜିଲ୍ଲାପାଳଙ୍କ ସହ ଆଲୋଚନା କରିଥିଲୁ । ଜିଲ୍ଲାପାଳ କହିଛନ୍ତି ଜଙ୍ଗଲ ଜମି ସମସ୍ୟା ହେତୁ ସେହି ସବୁ ଗ୍ରାମରେ କୌଣସି ବିକାଶ କାର୍ଯ୍ୟ ହୋଇ ପାରୁନାହିଁ । ତଥାପି ଆମେ ଯଥାଶୀଘ୍ର ଏହି ସମସ୍ୟାର ସମାଧାନ କରି କାର୍ଯ୍ୟ ଆରମ୍ଭ କରିବୁ ।