ନରସିଂହପୁର ହାତୀ ମୃତ୍ୟୁ ଘଟଣା: ଚାଲିଛି ତଦନ୍ତ

କଟକ ନରସିଂହପୁର ଗୁଳିବିଦ୍ଧ ହାତୀ ମୃତ୍ୟୁ ଘଟଣାରେ କିଛି ଲୋକଙ୍କୁ ଅଟକ ରଖାଯାଇଛି । ଘଟଣାରେ କିଛି ଲୋକଙ୍କୁ ଅଟକ ରଖି ତଦନ୍ତ କରାଯାଉଥିବା ଅନୁଗୁଳ ଡିଏଫ୍ଓ ସୂଚନା ଦେଇଛନ୍ତି ।

କଟକ ନରସିଂହପୁର ବାଇସିଙ୍ଗା ଜଙ୍ଗଲରେ ମୃତ ହାତୀକୁ ଗୁଳି କିପରି ବାଜିଲା? କିଏ, କାହିଁକି ଏବଂ କେଉଁଠି ଗୁଳି ଚଲାଇଲା? ଏନେଇ ତଦନ୍ତ ଆରମ୍ଭ ହୋଇଛି । ତେବେ ବନ୍ଧୁକ କେଉଁଠୁ ଆଣିଲେ ସେ ଦିଗରେ ଗୁରୁତ୍ୱ ଦିଆଯାଇ ତଦନ୍ତ କରାଯାଉଛି । ହେଲେ ହାତୀକୁ ଲାଗିଥିବା ଗୁଳି ଶିକାର ପାଇଁ ନା ଘଉଡ଼ାଇବା ପାଇଁ ତାହା ବି ତଦନ୍ତ ପରିସରଭୁକ୍ତ ବୋଲି ଡିଏଫ୍ଓ ଦୋହରାଇଛନ୍ତି ।

ତେବେ ଗତ ୨୯ ଜୁଲାଇରେ ଚିକିତ୍ସାଧୀନ ଅବସ୍ଥାରେ ଗୁଳିବିଦ୍ଧ ଦନ୍ତାହାତୀର ମୃତ୍ୟୁ ହୋଇଥିଲା । ଏନେଇ ଡିଏଫ୍ଓ ସୂଚନା ଦେଇଥିଲେ । ଦନ୍ତାକୁ ବଞ୍ଚାଇବା ପାଇଁ ବନ ବିଭାଗ ହାତୀର ଚିକିତ୍ସା ଜାରି ରଖିଥିଲା । ଏଥିରେ ସାତକୋଶିଆ ବନ୍ୟପ୍ରାଣୀ ବିଶେଷଜ୍ଞ ଟିମ୍ ଏବଂ ନରସିଂହପୁରର ପ୍ରାଣୀ ଚିକିତ୍ସକଙ୍କ ମିଳିତ ସହାୟତାରେ ଦନ୍ତାହାତୀର ଚିକିତ୍ସା ଚାଲିଥିଲା । କିନ୍ତୁ ଅସୁସ୍ଥ ହାତୀଟି ଖାଦ୍ୟ ଗ୍ରହଣ କରୁ ନଥିବାରୁ ହାତୀକୁ ସାଲାଇନ ଲଗାଯାଇଥିଲା ।

ସୂଚନା ଅନୁସାରେ, ଗତ ଜୁଲାଇ ମାସ ୨୬ ତାରିଖରେ ହାତୀଟି କଟକ ନରସିଂହପୁର ଜଙ୍ଗଲରେ ଲଗାତାର ୩/୪ ଦିନ ଧରି ଇତସ୍ତତଃ ହୋଇ ଘାଇଲା ଅବସ୍ଥାରେ ବୁଲୁଥିଲା । ନରସିଂହପୁର ପଶ୍ଚିମ ରେଂଜ ବାର୍ସିଗାଁ ଜଙ୍ଗଲରୁ ଗୁଳିବିଦ୍ଧ ଦନ୍ତା ହାତୀ ଠାବ କରାଯାଇଥିଲା । ବନବିଭାଗ ଗୁଳିବିଦ୍ଧ ହାତୀକୁ ଠାବ କରି ଚିକିତ୍ସା ଆରମ୍ଭ କରିଥିଲା । ଯାହା ପରେ ହାତୀ ଦେହରେ ୫ଟି ଗୁଳି ଲାଗିଥିବା ପ୍ରାଣୀ ଚିକିତ୍ସକ ସୂଚନା ଦିଆଯାଇଥିଲା । ହାତୀର ବାମ କାନ, ଶୁଣ୍ଢ, ଗୋଡ଼ ଏବଂ ଶରୀରର ଅନ୍ୟ ଦୁଇଟି ସ୍ଥାନରେ କ୍ଷତ ଚିହ୍ନ ଦେଖିବାକୁ ମିଳିଥିଲା । ସାତକୋସିଆ ବନ୍ୟପ୍ରାଣୀ ବିଶେଷଜ୍ଞ ଟିମ୍ ଏବଂ ନରସିଂହପୁରର ପ୍ରାଣୀ ଚିକିତ୍ସକଙ୍କ ମିଳିତ ସହାୟତାରେ ଦନ୍ତାହାତୀର ଚିକିତ୍ସା କରାଯାଉଥିଲା । ହେଲେ ବହୁ ଚିକିତ୍ସା ପରେ ବି ଶେଷରେ ଜୀବନ ମରଣ ସହ ସଂଘର୍ଷ କରି ହାତୀଟି ପ୍ରାଣ ହରାଇଥିଲା ।