ଧନ୍ୟ ସରକାର ! ୨୫ ବର୍ଷର ଶାସନ, ୫୦ ବର୍ଷର ଗାଁକୁ ନାହିଁ ରାସ୍ତା

୫୦ବର୍ଷର ଗାଁ... ହେଲେ ଗାଁକୁ ନାହିଁ ରାସ୍ତା । ନାଳ ଉପରେ ଭରସା କରୁଛନ୍ତି ଗ୍ରାମବାସୀ । ବାରମ୍ବାର ଅଭିଯୋଗ କରିଥିଲେ ମଧ୍ୟ ଶୁଣୁନାହାନ୍ତି ସରକାର କି ଶୁଣୁନି ପ୍ରଶାସନ । ଏମିତି କି ଗ୍ରାମବାସୀମାନେ ବିଧାୟକଙ୍କୁ ରାସ୍ତା ଖଣ୍ଡିଏ ପାଇଁ ବହୁବାର ନିବେଦନ କରିଥିଲେ ମଧ୍ୟ ପ୍ରତିଶ୍ରୁତି ଦେଇ ବିଧାୟକ ପ୍ରତାରଣା କରିଥିବା ଅଭିଯୋଗ କରିଛନ୍ତି ଗ୍ରାମବାସୀ ।

ଠକିଦେଲେ ବଡମ୍ବା ବିଧାୟକ ଦେବୀ ମିଶ୍ର । ଏଥର ଗାଁକୁ ଆସିଲେ ଭୋଟ ବର୍ଜନ କଥା ଶୁଣାଇଦେବୁ । ଏମିତି ଏକ ନିଷ୍ପତ୍ତି ନେଇଛନ୍ତି ବଡମ୍ବା ବ୍ଲକ ମାନପୁର ପଂଚାୟତ କଦନା ଗାଁର ୮ନମ୍ବର ୱାର୍ଡ ଶବର ସାହି ଗ୍ରାମବାସୀମାନେ । ଗାଁରେ ୨୦ରୁ ଊର୍ଦ୍ଧ୍ୱ ପରିବାର ବାସ କରନ୍ତି । ୫୦ବର୍ଷ ହେବ ଏହି ଗାଁରେ ରହିଆସୁଛନ୍ତି । ହେଲେ ଗାଁକୁ ଯିବାକୁ ନାହିଁ ଖଣ୍ଡିଏ ରାସ୍ତା । ବର୍ଷା ଦିନରେ ଏଠି ୫ଫୁଟ ଉଚ୍ଚର ପାଣି ଚାଲେ । ଫଳରେ ନାହିଁନଥିବା ଅସୁବିଧାର ସମ୍ମୁଖୀନ ହୁଅନ୍ତି ଗ୍ରାମବାସୀ ।

ନିର୍ବାଚନ ସମୟରେ ସରପଞ୍ଚଙ୍କ ଠାରୁ ଆରମ୍ଭ କରି ସାଂସଦ ପ୍ରାର୍ଥୀ ଯାଏଁ ସମସ୍ତେ ଏଠାକୁ ଆସନ୍ତି । ପ୍ରତିଶ୍ରୁତି ଦେଇ ଚାଲିଯାଆନ୍ତି । ହେଲେ ଥରେ ଗାଦିରେ ବସିଗଲା ପରେ ଆଉ ମନେପଡ଼େନି ଏହି ଗାଁର କଥା । ବର୍ଷ ବର୍ଷ ଧରି ଏମିତି ହଇରାଣ ହୁଅନ୍ତି ଗାଁ ଲୋକେ । ଗାଁକୁ ଏମିତିରେ ଆମ୍ବୁଲାନ୍ସଟେ ଆସିପାରେନି । ବର୍ଷାଦିନେ ପିଲାମାନେ ସ୍କୁଲ ଯିବାକୁ ନାନା ଅସୁବିଧାର ସମ୍ମୁଖୀନ ହୁଅନ୍ତି । ଆଉ ନିତିଦିନିଆ କଥା କହିଲେ ତ ନସରେ । ଏଣୁ ତୁରନ୍ତ ବଡମ୍ବା ମାନପୁର କଦନା ୮ନମ୍ବର ୱାର୍ଡ ଶବର ସାହିକୁ ରାସ୍ତା ସଂଯୋଗୀକରଣ ପାଇଁ ଗ୍ରାମବାସୀ ଦାବି କରିଛନ୍ତି ।

ରାଜ୍ୟରେ କେମତି ହେଉଛି ବିକାଶ ? ଆମ ଗାଁ ଆମ ବିକାଶର ନାରା କେତେ ସଫଳ ହେଉଛି ? ଏହି ରାସ୍ତାକୁ ଦେଖିଲେ ବେଶ ଅନୁମାନ କରିହେଉଛି। ତେବେ ଦେଖିବାକୁ ବାକି ରହିଲା କେବେ ହେଉଛି ଶବର ସାହିର ରାସ୍ତା ।

(ବଡମ୍ବାରୁ ସର୍ବେଶ୍ୱର ସ୍ୱାଇଁ, ଓଟିଭି)