LIVE TV
ରାଜଧାନୀ ଉପକଣ୍ଠ କଳାରାହଙ୍ଗ ଇଂଜଣା ପୋଲ ତଳେ ଅଳିଆ ଆବର୍ଜନାରୁ କଙ୍କାଳ ମିଳିବା ଘଟଣା । ଉଦ୍ଧାର କଙ୍କାଳର ହେବ କେମିକାଲ ଟେଷ୍ଟ । ଏନେଇ ସୂଚନା ଦେଇଛନ୍ତି ଭୁବନେଶ୍ୱର ଡିସିପି ଉମାଶଙ୍କର ଦାଶ । ବହୁ ପୁରୁଣା କଙ୍କାଳ ହୋଇ ଥବାରୁ ଏମ୍ସରେ ଯାଞ୍ଚ ପ୍ରକ୍ରିୟା କରାଯିବ । ଏସବୁ କଙ୍କାଳ କେତେ ପୁରୁଣା ? କଙ୍କାଳ ପୁରୁଷ କି ମହିଳାଙ୍କର ? କଙ୍କାଳର ବୟସ କେତେ ? କଙ୍କାଳରେ ଲାଗିଥିବା ମାଟି କେଉଁ ସ୍ଥାନର ? ଏମ୍ସରେ ତଦନ୍ତ ପରେ ସବୁକିଛି ସ୍ପଷ୍ଟ ହେବ ବୋଲି ଭୁବନେଶ୍ୱର ଡିସିପି କହିଛନ୍ତି ।
Also Read
ସୂଚନାଯୋଗ୍ୟ, ଗତ ୨୩ ତାରିଖରେ ଏକ ପୋଲ ତଳେ ମଣିଷ ଖପୁରୀ ଓ ହାଡ଼ ପଡ଼ିଥିବା ଦେଖାଯାଇଥିଲା । ରାଜଧାନୀ ଉପକଣ୍ଠ କଳାରାହଙ୍ଗରେ ମିଳିଥିଲା ୧୪ରୁ ଅଧିକ ମଣିଷ ଖପୁରୀ, ମଣିଷ ହାତ, ଗୋଡ଼ ଓ ପଞ୍ଜରା ହାଡ଼ । ଅଳିଆ ଆବର୍ଜନା ଭିତରେ ସନ୍ଦେହ ଜନକ ଭାବେ ପଡିଥିବା ଏତେ ସଂଖ୍ୟକ ଖପୁରୀ ଓ ହାଡ଼କଙ୍କାଳ ଦେଖି ଲୋକେ ଆତଙ୍କିତ ହୋଇଥିଲେ । ଖବର ପାଇ କମିଶନରେଟ୍ ପୋଲିସର ସ୍ପେଶାଲ ସ୍କ୍ୱାଡ୍ ଓ ସାଇଣ୍ଟିଫିକ୍ ଟିମ୍ ଘଟଣାସ୍ଥଳରୁ ଏସବୁ ଜବତ କରି ତଦନ୍ତ ଆରମ୍ଭ କରିଛି । ତେବେ ଇଷ୍ଟିଚ୍ୟୁଟ୍ ଅଫ୍ ମେଡିକାଲ ସାଇନ୍ସରୁ ଟେଷ୍ଟ ରିପୋର୍ଟ ଆସିବା ପରେ ତଦନ୍ତ ଅଧିକ ଆଗେଇବ ବୋଲି କହିଥିଲା ପୋଲିସ୍ ।
ରାଜଧାନୀ ଉପକଣ୍ଠ କଳାରାହଙ୍ଗ ଇଂଜଣା ପୋଲ ତଳେ ଅଳିଆ ଆବର୍ଜନା ଭିତରେ ଏଭଳି ୧୪ରୁ ଅଧିକ ମଣିଷ ଖପୁରୀ ଓ ଅସ୍ଥିକଙ୍କାଳ ଦେଖି ବିଜୁଳି ବେଗରେ ପ୍ରଚାରିତ ହୋଇଥିଲା ଖବର । କେଉଁଠୁ ଓ କୁଆଡୁ ଆସିଲା ଏତେ ସଂଖ୍ୟକ ଅସ୍ଥି କଙ୍କାଳ ? କିଏ ଫିଙ୍ଗିଲା ଓ କାହିଁକି ଫିଙ୍ଗିଲା ? ଏଭଳି ଅନେକ ଅସମାହିତ ପ୍ରଶ୍ନ ଲୋକଙ୍କୁ ଘାରୁଥିବା ବେଳେ ସନ୍ଦେହ ଓ ଆତଙ୍କ ବି ବଢ଼ିଥିଲା । କେହି ଗୁଣି ଗାରେଡ଼ି କିମ୍ବା ତନ୍ତ୍ର ସାଧନା ସାରିବା ପରେ ଏମିତି ରାତି ଅଧରେ ଫିଙ୍ଗି ଦେଇ ପଳାଇଥିବା ନେଇ ବଢ଼ିଛି ସନ୍ଦେହ । ଏଥିସହ ଏତେ ପରିମାଣର ନରମୁଣ୍ଡକୁ ନେଇ ସ୍ଥାନୀୟ ଲୋକଙ୍କ ମନରେ ଭୟ ବି ସୃଷ୍ଟି ହୋଇଛି ।
୧୪ ଖପୁରୀ ସାଙ୍ଗକୁ ମାଳ ମାଳ ମଣିଷ ହାଡ଼ ପଡିଥିବା ସମ୍ପର୍କରେ ଖବର ପାଇ ତୁରନ୍ତ ଘଟଣାସ୍ଥଳକୁ ଛୁଟିଥିଲା କମିଶନରେଟ୍ ପୋଲିସ୍ ସହ ସାଇଣ୍ଟିଫିକ୍ ଟିମ୍ । ସବୁ ନର କଙ୍କାଳକୁ ଏକାଠି କରି ବାନ୍ଧିବୁନ୍ଧି ପରୀକ୍ଷା ପାଇଁ ଇଷ୍ଟିଚ୍ୟୁଟ୍ ଅଫ୍ ମେଡିକାଲ ସାଇନ୍ସକୁ ପଠାଇଥିଲା । କମିଶନରେଟ୍ ପୋଲିସର ସ୍ପେସାଲ ସ୍କ୍ୱାଡ୍ ମୁଖ୍ୟ ସଂଜୀବ ଶତପଥୀ କହିଥିଲେ ଅସ୍ଥି ଗୁଡ଼ିକର କେମିକାଲ୍ ଏକଜାମିନେସନ ରିପୋର୍ଟ ଆସିବା ପରେ ସେହି ଆଧାରରେ ତଦନ୍ତ ଆଗେଇବ । ତେବେ ପ୍ରାଥମିକ ତଦନ୍ତରୁ ଏସବୁ ହାଡ଼କଙ୍କାଳ ପୁରୁଣା ବୋଲି ଅନୁମାନ କରାଯାଉଛି । ଯେହେତୁ ନିର୍ମାଣ କାମ ଚାଲିଛି, ତେଣୁ ମାଟି ତଳେ କେଉଁଠି ପୋତା ହୋଇ ରହିବା ପରେ ଏହା ମିଳିଥାଇ ପାରେ ବୋଲି ସେ କହିଥିଲେ । ତଥାପି କିଏ ଏଠାକୁ ଆଣିଲା ଓ କେଉଁ ଉଦ୍ଦେଶ୍ୟରେ ଫିଙ୍ଗିଲା ତାର ଅନୁସନ୍ଧାନ କରାଯିବ ବୋଲି ସେ କହିଥିଲେ ।
