ଶୀତ ଆରମ୍ଭରୁ ଗ୍ରୀଷ୍ମ ଚିନ୍ତା; ଜଳ ସମସ୍ୟା ଦୂର ପାଇଁ ଲାଗିପଡ଼ିଛନ୍ତି ସରପଞ୍ଚ

ସରପଞ୍ଚଙ୍କୁ ପାଣି ଚିନ୍ତା । ଖରାଦିନ ନୁହେଁ, ଶୀତ ଦିନ ଆରମ୍ଭରୁ ଜଳ ସଂଗ୍ରହ ପାଇଁ ଆରମ୍ଭ କରିଛନ୍ତି ପୂର୍ବ ପ୍ରସ୍ତୁତି । ଆଗକୁ ଖରାଦିନଅ ଆସୁଥିବାରୁ ଯେପରି କୌଣସି ସମସ୍ୟା ନଉପୁଜେ ସେଥିପାଇଁ ଏବେଠୁ ଯୋଜନା କରିଛନ୍ତି ସରପଞ୍ଚ । 

ନୂଆପଡା ଜିଲ୍ଲା ସିନାପାଲିର ଲାଇଫଲାଇନ୍ ଉଦନ୍ତି ନଦୀ । ଗ୍ରୀଷ୍ମ ଋତୁରେ ଏହି ନଦୀ ଗୋଟିଏ ମରୁଭୂମିର ଭ୍ରମ ସୃଷ୍ଟି କରିଥାଏ । ନଦୀରେ ପାଣିର ଧାରଟିଏ ବି ନଥାଏ । ତେଣୁ ଫେବ୍ରୁଆରୀ ପରେ ଏହି ନଦୀରେ ପାଣି ରହେ ନାହିଁ । ଫଳରେ ଅଞ୍ଚଳବାସୀ ନାନା ଅସୁବିଧାର ସମ୍ମୁଖିନ ହୋଇଥା’ନ୍ତି । ନିତ୍ୟ ବ୍ୟବହାର କାର୍ଯ୍ୟ ଓ ପିଇବା ପାଣି ସମସ୍ୟା ଲାଗି ରହିବା ସହିତ ପଶୁମାନେ ନିଜର ଶୋଷ ମେଣ୍ଟାଇବାରୁ ବଞ୍ଚିତ ହୁଅନ୍ତି । ତେଣୁ ସେଇଥିପାଇଁ ତ ଖରାଦିନ ଆସିବା ପୂର୍ବରୁ ପୂର୍ବପ୍ରସ୍ତୁତିରେ ଲାଗିପଡ଼ିଛନ୍ତି ସରପଞ୍ଚ । 

ଲୋକଙ୍କ ସମସ୍ୟାକୁ ଗୁରୁତ୍ୱର ସହ ନେଇଛନ୍ତି ସରପଂଚ ସୁନିତା ମେହେର । ସିନାପାଲି ଦେଇ ବୋହି ଯାଇ ଥିବା ଉଦନ୍ତି ନଦୀର ବିଭିନ୍ନ ଘାଟରେ ଜେସିବି ଲଗାଇ ବାଲି ବନ୍ଧ ସବୁ ଖୋଳୁଛନ୍ତି । ଆଉ ନିଜେ ନଦୀଘାଟରେ ଉପସ୍ଥିତ ରହି କାମର ତଦାରଖ କରୁଛନ୍ତି । ବାଲିବନ୍ଧ ଖୋଳିବା ପରେ ଲୋକେ କିପରି ଭଲଭାବେ ନିତ୍ୟକର୍ମ କରିପାରିବେ ଏବଂ ପଶୁପକ୍ଷୀମାନେ ମଧ୍ୟ ଖରା ଦିନେ ପାଣି ବୁନ୍ଦାଏ ପିଇ ପାରିବେ ସେଥିପ୍ରତି ଦୃଷ୍ଟି ଦେଇଛନ୍ତି ସରପଂଚ ସୁନିତା ।

ବିଗତ ବର୍ଷ ମାନଙ୍କରେ ଜଳକଷ୍ଟକୁ ନେଇ ନାନା ଅସୁବିଧାର ସମ୍ମୁଖୀନ ହୋଇଛନ୍ତି ସିନାପାଲିବାସୀ । ଯେମିତି ଖରା ଦିନେ ଲୋକେ ପାଣି ସମସ୍ୟାର ସମ୍ମୁଖୀନ ନ ହେବେ ସେଖିପ୍ରତି ସରପଞ୍ଚ ସୁନୀତାଙ୍କ ଏହି ଆଗୁଆ ପଦକ୍ଷେପକୁ ସାଧାରଣ ଲୋକେ ପ୍ରଶଂସା କରିଛନ୍ତି ।