ଅନଲାଇନରେ ମଗେଇଥିଲେ ଶ୍ରୀମନ୍ଦିର ବାନା, କିନ୍ତୁ ମିଳିଲା ରାଜନୈତିକ ଦଳ ପତାକା

ଅନଲାଇନରେ ଶ୍ରୀମନ୍ଦିର ପତିତପାବନ ବାନା ମଗାଇଥିଲେ କିନ୍ତୁ ପହଞ୍ଚିଲା ରାଜନୈତିକ ଦଳ ବିଜେପିର ପତାକା । ପୁଣି ଆମାଜନ କମ୍ପାନୀ ମାଧ୍ୟମରେ ଠକେଇ । ଏଭଳି ଠକାମିର ଶିକାର ହୋଇଛନ୍ତି ପୁରୀ ବାସେଳୀ ସାହିର ଭଗବାନ ମହାପାତ୍ର । କିଛି ଦିନ ତଳେ ଆମାଜନ କମ୍ପାନୀ ମାଧ୍ୟମରେ ଶ୍ରୀମନ୍ଦିର ବାନା ବିକ୍ରି ହେଉଥିବା ନେଇ ସୋସିଆଲ ମିଡିଆରେ ଏକ ପୋଷ୍ଟ ଭାଇରାଲ ହୋଇଥିଲା ।

ଏହା ଜାଣିବା ପରେ ପୁରୀ ବାସିନ୍ଦା ହିସାବରେ ପରୀକ୍ଷା କରିବା ପାଇଁ ଭଗବାନ ଗତ ୧୫ ତାରିଖରେ ଅର୍ଡର କରିଥିଲେ । ବିକ୍ରି ହେଉଥିବା ବାନାର ଦାମ ୯୯୯ ଟଙ୍କା ବୋଲି ଉଲ୍ଲେଖ ରହିଥିଲା । ଏକ ପ୍ରତିଶତ ରିହାତି ହିସାବରେ ସେ ୮୮୯ ଟଙ୍କା ଦେଇ ୧୯ ତାରିଖ ଦିନ ଏହି ଅର୍ଡର ତାଙ୍କ ନିକଟରେ ଆସି ପହଞ୍ଚିଥିଲା ।

ଏଥିରେ ବିଜେପିର ପତାକା ଥିବା ସେ ଦେଖିବାକୁ ପାଇଥିଲେ । ଆଜି ଭଗବାନ ମହାପାତ୍ର ଶ୍ରୀମନ୍ଦିର ପ୍ରଶାସନ କାର୍ଯ୍ୟାଳୟରେ ଆଇନଜୀବୀ ଓ ଚୁନରା ସେବକଙ୍କ ସମ୍ମୁଖରେ ଆମଜନରୁ ଆସିଥିବା ପ୍ୟାକେଟକୁ ଦେଖାଇବା ପରେ ସମସ୍ତେ ଆଶ୍ଚର୍ଯ୍ୟ ହୋଇପଡ଼ିଥିଲେ ।

ଶ୍ରୀମନ୍ଦିର ପତିତପାବନ ବାନା ବଦଳରେ ବାହାରିଥିଲା ବିଜେପିର ପତାକା । ଶ୍ରୀମନ୍ଦିର ବାନା ନାଁରେ ବାନା ବିକ୍ରି ବେଆଇନ ବୋଲି ଚୁନରା ସେବକ ପକ୍ଷରୁ କୁହାଯାଉଛି । ଠକାମୀ ବିରୁଦ୍ଧରେ ସେ ଖାଉଟି ଅଦାଲତଙ୍କ ଦ୍ୱାରସ୍ଥ ହେବେ ବୋଲି କହିଛନ୍ତି ।