ବେସାହାରା କରିଦେଲା ହଇଜା; ତିନି ଭଉଣୀଙ୍କ ମୁଣ୍ଡ ଉପରୁ ଛଡ଼ାଇନେଲା ମା’ର ହାତ

ଯେଉଁ ଜଳକୁ ଜୀବନ କୁହାଯାଏ, ସେହି ଜଳ ଏବେ ଜହର ପାଲଟିଛି ରାଉରକେଲାର ବିଭିନ୍ନ ଅଞ୍ଚଳରେ । ଥମିବାର ନାଁ ଧରୁନି ହଇଜା ମୃତ୍ୟୁ । ଆଜି ପୁଣି ଆଉ ଜଣଙ୍କର ଜୀବନ ନେଇଛି କଲେରା ରାକ୍ଷସ । ବେସରକାରୀ ଭାବେ ମୃତ୍ୟୁ ସଂଖ୍ୟା ୧୫କୁ ବଢ଼ିଥିବା କୁହାଯାଉଛି । ତେବେ କେଉଁ କାରଣରୁ କଲେରା ସଂକ୍ରମଣ ବ୍ୟାପିଲା, ତାର ପ୍ରକୃତ କାରଣ ଏବେବି ଅସ୍ପଷ୍ଟ ରହିଥିବା ବେଳେ, ଜୋରସୋରରେ ଚାଲିଛି ପାଣି ପାଇପ୍ ମରାମତି କାମ । ସେପଟେ ସାମ୍ନାକୁ ଆସୁଛି ହଇଜା ମୃତକଙ୍କ ପରିବାରରୁ ଗୋଟିକ ପରେ ଗୋଟିଏ ଲୁହ ଭିଜା ଚିତ୍ର, କୋହଭରା କାହାଣୀ ।

କିଛି ମାସ ତଳେ ବାପା ଚାଲିଗଲେ, କାଲି ମାଆକୁ ବି ଛଡ଼ାଇ ନେଲା ହଇଜା... ତିନି ଭଉଣୀଙ୍କ ମୁଣ୍ଡ ଉପରୁ ଛପର ଉଡ଼ିଯାଇଥିଲା, ଆଉ କାଲି ଭୁଶୁଡ଼ି ପଡ଼ିଲା ସୁରକ୍ଷାର ଚାରିକାନ୍ଥ... । ମଧୁସୂଦନପାଲିର ସାବିତ୍ରୀ ଗିରି ହଇଜାରେ ପ୍ରାଣ ହରାଇବା ପରେ, ଦୁନିଆ ଦୁଆରେ ବେସାହାରା ହୋଇଗଲେ ତାଙ୍କର ୩ ବଢ଼ିଲା ଝିଅ। ବଡ଼ ଓ ମଝିଆଁ ମୂଲ ମଜୁରୀ ଲାଗୁଥିବା ବେଳେ, ଦଶମରେ ପଢ଼ୁଥିବା ସାନ ଝିଅକୁ ଲାଗିଛି ସବୁଠୁ ବଡ଼ ଧକ୍କା । ଚୁରମାର୍ ହୋଇଯାଇଛି ଡାକ୍ତର ବନିବାର ସ୍ୱପ୍ନ, ପାଠପଢ଼ାରେ ବି ହୁଏତ ଲାଗିଯିବ ପୂର୍ଣ୍ଣଚ୍ଛେଦ । ପେଟ ଚିନ୍ତା ଆଗରେ ପାଠ କଥା ବା ପଚାରିବ କିଏ ?

ରାଉରକେଲାର ହଇଜା ମୃତକମାନେ, ପ୍ରଶାସନ ପାଇଁ କେବଳ କିଛି ନାଁ ଓ ସଂଖ୍ୟା ହୋଇ ଥାଇପାରନ୍ତି... ହେଲେ ଅନେକ ପରିବାର ପାଇଁ ଇଏ ଅଦିନିଆ ଝଡ଼... ଅଲିଭା ଦାଗ... । ଜଳ ଏଠି ଜହର ପାଲଟିବା ପରେ, କେଉଁଠି ବଢ଼ିଲା ଝିଅଙ୍କୁ ଅନାଥ କରୁଛି, ତ କେଉଁଠି ବାପା ଆଖି ଆଗରେ ଝିଅ ଆଖି ବୁଜୁଛି । ସପ୍ତାହେରୁ ଅଧିକ ଦିନ ହେଲାଣି ଇସ୍ତାତ ନଗରୀରେ ଥମିବାର ନାଁ ଧରୁନି ହଇଜା ରାକ୍ଷସର ତାଣ୍ଡବ । ଆଜି ବି ଘରୋଇ ହସ୍ପିଟାଲରେ ଜଣଙ୍କ ଜୀବନ ଯାଇଛି । ପ୍ରାଣ ହରାଇଛନ୍ତି ପାୱାରହାଉସ ଅଞ୍ଚଳର ୪୨ ବର୍ଷୀୟ ପଙ୍କଜ ମଣ୍ଡଳ । ଏହି ଘଟଣା ପୂର୍ବରୁ ସରକାରୀ ଭାବେ ମୃତ୍ୟୁସଂଖ୍ୟା ୬ କୁହାଯାଉଥିଲେ ବି, ପ୍ରକୃତ ସଂଖ୍ୟା ଏହାଠୁ ଢେର୍ ଅଧିକ ବୋଲି ସାଧାରଣରେ ଚର୍ଚ୍ଚା ହେଉଛି । ତେବେ ଡେଥ୍ କମିଟି ଯାଞ୍ଚ କରି ରିପୋର୍ଟ ଦେବା ପରେ ପ୍ରକୃତ ସଂଖ୍ୟା ସାମ୍ନାକୁ ଆସିବ ।

ରାଉରକେଲାର ମଧୁସୂଦନ ପାଲି ଓ କିଷାନଟୋଲା ଆଦି ବସ୍ତି ଅଞ୍ଚଳ । କେଉଁଠି ମାଟି ଖୋଳି ପାଇପ୍ ଲିକେଜ୍ ଯାଞ୍ଚ ଓ ମରାମତି କରାଯାଉଛି, ତ ଆଉ କେଉଁଠି ଏବେବି ପାଇପ୍ ଫାଟି ରାସ୍ତା ଓଦା ହୋଇ ରହୁଛି । ବହୁ ବସ୍ତିରେ ଡ୍ରେନ୍ ସଫା ହେଉନଥିବା ଓ ବ୍ଲିଚିଂ ପାଉଡର ପଡ଼ିନଥିବା ବି ଅଭିଯୋଗ ହୋଇଛି । ତେବେ ରାଉରକେଲା ମହାନଗର ନିଗମ କମିଶନର କହିଛନ୍ତି, ସଂକ୍ରମଣ ବ୍ୟାପିଥିବା ୧୪ୱାର୍ଡ ୯ଟି ମୋବାଇଲ ଟିମ୍ ଘରକୁ ଘର ବୁଲି ସଚେତନ କରାଉଛି । RMRC ଟିମ ପହଞ୍ଚି ଝାଡାବାନ୍ତିର କାରଣ ଖୋଜୁଛନ୍ତି । ଏଥିସହ ୱାଟକୋ ପକ୍ଷରୁ ଯୁଦ୍ଧକାଳୀନ ଭିତ୍ତିରେ ପାଇପ ମରାମତି ଚାଲିଥିବା ସେ ସୂଚନା ଦେଇଛନ୍ତି । ଏଥିସହ ଲୋକଙ୍କୁ ଆଶ୍ୱସ୍ତ କରିଛନ୍ତି ଯେ, ହଇଜା ସ୍ଥିତି ଏବେ ସ୍ଥିର ଥିବାବେଳେ, ଗୁରୁତର ରୋଗୀଙ୍କ ସଂଖ୍ୟା କମୁଛି ।