କେନ୍ଦୁପତ୍ର ତୋଳାଳୀଙ୍କ ପାଇଁ ପ୍ୟାକେଜ୍‌ ଘୋଷଣା କଲେ ମୁଖ୍ୟମନ୍ତ୍ରୀ

କେନ୍ଦୁପତ୍ର ତୋଳାଳୀଙ୍କ ପାଇଁ ଘୋଷଣା ହେଲା ପ୍ୟାକେଜ୍‌ । କେନ୍ଦୁପତ୍ର ତୋଳାଳୀଙ୍କ ପାଇଁ ଦୁଇ ଶହ କୋଟିର ପ୍ୟାକେଜ ଘୋଷଣା କଲେ ମୁଖ୍ୟମନ୍ତ୍ରୀ । ଏଥି ସହ କେନ୍ଦୁପତ୍ରର ମୂଲ୍ୟ ୧ ଟଙ୍କା ୪୦ ପଇସାରୁ ଏକ ଟଙ୍କା ୬୦ ପଇସାକୁ ବୃଦ୍ଧି କରାଯାଇଛି ।

କନ୍ୟା ବିବାହ ସହାୟତା ରାଶିକୁ ୨୫ ହଜାର, ସିଜିନାଲ କର୍ମଚାରୀଙ୍କ ବୋନସ ୨୫ ପ୍ରତିଶତରୁ ୫୦ ପ୍ରତିଶତକୁ ବୃଦ୍ଧି କରିଛନ୍ତି ସରକାର । ରେଢ଼ାଖୋଲରେ ଆୟୋଜିତ ଓଡ଼ିଶା କେନ୍ଦୁପତ୍ର କର୍ମଚାରୀ ସଂଘର ବିଶାଳ ସମାବେଶରେ ଭିଡିଓ କନଫରେନ୍ସ ମାଧ୍ୟମରେ ମୁଖ୍ୟମନ୍ତ୍ରୀ ଏହି ଘୋଷଣା କରିଛନ୍ତି । ତେବେ ବିଜେପି କହିଛି ସରକାର ଓଡିଶାର ଲକ୍ଷ ଲକ୍ଷ କେନ୍ଦୁପତ୍ର ଶ୍ରମିକଙ୍କୁ ବିଶ୍ୱାସଘାତକତା କରିଛନ୍ତି ।

ପୂର୍ବରୁ କେନ୍ଦୁପତ୍ର ତୋଳାଳିଙ୍କ ପାଇଁ ବୋନସ ସହ ଛତା, ଜୋତା ମିଳିବାର ନିୟମ ଅଛି । ଗତ ବର୍ଷ ଚପଲ ପାଇଁ ୧୬୦ ଟଙ୍କା ଓ ପାଣି ବୋତଲ ପାଇଁ ୨୦୦ ଟଙ୍କା ଯୋଗାଇ ଦିଆଯାଇଥିବା ବେଳେ ଅନେକ ଶ୍ରମିକ ବୋନସ ଟଙ୍କା ପାଇ ନଥିବା ଜଣାପଡିଛି । ଅନେକ ଶ୍ରମିକଙ୍କୁ ପରିଚୟ ପତ୍ର ମିଳୁ ନଥିବାରୁ ଅସୁବିଧା ସୃଷ୍ଟି ହେଇଥିଲା । କୌଣସି ଶ୍ରମିକ କାର୍ଯ୍ୟସ୍ଥଳୀରେ ପ୍ରାଣ ହାରିଲେ ୨ ଲକ୍ଷ ଟଙ୍କା ପର୍ଯ୍ୟନ୍ତ ଅନୁକମ୍ପା ମୂଳକ ସହାୟତା ରାଶି ମିଳିବାର ନିୟମ ରହିଥିଲା ।