ପାଖାପାଖି ୨୦ ହଜାର କୋଟିର ଅତିରିକ୍ତ ଚିଠା ବଜେଟ୍‌କୁ କ୍ୟାବିନେଟ ଅନୁମୋଦନ

ଭୁବନେଶ୍ୱର: ପଞ୍ଚାୟତ ନିର୍ବାଚନ ପୂର୍ବରୁ ଗ୍ରାମ୍ୟ ଭିତ୍ତିଭୂମି ଉପରେ ରାଜ୍ୟ ସରକାରଙ୍କ ଫୋକସ। ଆଜି ବସିଥିବା କ୍ୟାବିନେଟ ବୈଠକରେ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନେଇଛନ୍ତି ରାଜ୍ୟ ସରକାର। ଜଳସେଚନ, ରାସ୍ତା, ବ୍ରିଜ୍, ପିଇବା ପାଣି, କୃଷି ଉଦ୍ୟୋଗ  ଓ ଶିଳ୍ପ ଉପରେ ଗୁରୁତ୍ୱ ଦିଆଯାଇଛି। ପାଖାପାଖି ୨୦ ହଜାର କୋଟି ଖର୍ଚ୍ଚ ଟଙ୍କା ଖର୍ଚ୍ଚ ପ୍ରସ୍ତାବକୁ ଅନୁମୋଦନ ମିଳିଛି।

ସୁକତେଲ ନଦୀ ଉପରେ ଇନଷ୍ଟ୍ରିମ୍ ବ୍ୟାରେଜ୍ ପାଇଁ ୧୧୭ କୋଟି, ପାର୍ବତୀଗିରି ମେଗା ଲିଫ୍ଟ ଇରିଗେସନ୍ ପ୍ରୋଜେକ୍ଟ ପାଇଁ ୧୦ ହଜାର ୭ ସହ ୫୯ କୋଟି, କୋରାପୁଟ, କଳାହାଣ୍ଡି, ମାଲକାନଗିରି, ବାଲେଶ୍ୱର, ଗଜପତି ଓ କନ୍ଧମାଳ ଭଳି ୬ଟି ଜିଲ୍ଲାରେ ପ୍ରାୟ ୧୮ ଶହ କୋଟି ଟଙ୍କାର ପାନୀୟ ଜଳ ପ୍ରକଳ୍ପ ନିର୍ମାଣ ହେବ।

ମୁଖ୍ୟମନ୍ତ୍ରୀ ସଡ଼କ ଯୋଜନା ପାଇଁ ଆଗାମୀ ତିନି ବର୍ଷ ୨ ହଜାର କୋଟି, ବିଜୁ ସେତୁ ଯୋଜନାରେ ୫ ହଜାର୧୮୨ କୋଟି ଖର୍ଚ୍ଚ ହେବ। ମୁଖ୍ୟମନ୍ତ୍ରୀ କୃଷି ଉଦ୍ୟୋଗ ଯୋଜନାରେ ଆଗାମୀ ୫ ବର୍ଷରେ ୪୮୪ କୋଟି ଅନୁଦାନ ରଖାଯାଇଛି। ସେହିଭଳି ଶିଳ୍ପକ୍ଷେତ୍ରକୁ ପ୍ରୋତ୍ସାହନ ପାଇଁ ଇଣ୍ଡଷ୍ଟ୍ରିଆଲ ପଲିସି ରିଜୋଲୁସନ ୨୦୧୫କୁ ସଂଶୋଧନ କରାଯାଇଛି।