ଯୋଗ୍ୟ ହିତାଧିକାରୀଙ୍କ ରାସନ୍ କାର୍ଡରେ ନାହିଁ ନାଁ

ବଲାଙ୍ଗିର ଜିଲ୍ଲା ବେଲପଡା ବ୍ଲକ ହଟକଟ ଗାଁର ସେବାର ଖମାରୀ ନିଜର ଭେଣ୍ଡିଆ ପୁଅ ଭୀଷ୍ଣକୁ ସାଙ୍ଗରେ ନେଇ ବାହାରିଛନ୍ତି ଚାଉଳ ଆଣିବାକୁ । ଘରର ଅନ୍ୟ ସଦସ୍ୟମାନେ ବାହାରକୁ ଯାଇଛନ୍ତି ଦାଦନ ଖଟି । ଆଉ ଏମାନଙ୍କୁ ଯେତିକି ସାହାଯ୍ୟ ମିଳୁଛି ସେତିକି ସମୁଦ୍ରକୁ ଶଙ୍ଖେ ଭଳି । ଏନେଇ ବାରମ୍ବାର ଅଭିଯୋଗ ପରେ କେହି ନ ଶୁଣିବାରୁ ବାଧ୍ୟ ହୋଇ ଦୁହେଁ ବାହାରିଛନ୍ତି ବିଡିଓଙ୍କ ନିକଟକୁ ଗୁହାରୀ କରିବାକୁ ।

ଦାରିଦ୍ରତାର ଏହା ହେଉଛି ନଗ୍ନ ଚିତ୍ର । ଜଣେ ହ୍ୱିଲ୍ ଚେୟାରରେ ତ ଆଉ ଜଣେ ଦେଖିପାରୁନାହାନ୍ତି । ଦୁହେଁ ବାହାରିଛନ୍ତି ୧୫ କିମି ବାଟ ଚାଲିବେ । ଏତକ ବାଟ ଚାଲି ଗଲେ କଟି ଥିବା ରାସନ କାର୍ଡରେ ନା ଆଉ ଥରେ ଯୋଡ଼ିବାକୁ ଅନୁରୋଧ କରିପାରିବେ । ସରକାର ଦେଉଥିବା ଚାଉଳ ଗଣ୍ଡେ ହିଁ ଏମାନଙ୍କର ସାହା ଭରସା ।

ଗରିବ ମାନଙ୍କ ପାଇଁ ଦିଆଯାଉଛି ଚାଉଳ । ଖାଦ୍ୟ ସୁରକ୍ଷାର ଆଇନ ଅନୁସାରେ କିନ୍ତୁ ଗରିବଙ୍କୁ ଚାଉଳ ନ ମିଳିଲେ କାର୍ଯ୍ୟାନୁଷ୍ଠାନର ବ୍ୟବସ୍ଥା ରହିଛି । ହେଲେ ଆଇନକୁ ମାନୁଛି କିଏ ? ବଲାଙ୍ଗିର ଜିଲ୍ଲାରେ ଗରିବ ମାନଙ୍କର ଚାଉଳ ସବୁକୁ ଲୁଟ କରାଯାଉଛି । ଆଉ ଏଥିରେ ସରକାରୀ ଅଧିକାରୀଙ୍କ ସଂପୃକ୍ତ ଥିବା ଅଭିଯୋଗ ହେଉଛି ।

ନିୟମ ରହିଛି ରାସନ କାର୍ଡରେ ଯାହାର ନାଁ ରହିଛି ସେମାନଙ୍କୁ ପାଞ୍ଚ କିଲୋ ମାଗଣା ଚାଉଳ ଦିଆଯିବ । କିନ୍ତୁ ଏଠାରେ ଅଧାରୁ ଅଧିକ ଯୋଗ୍ୟ ହିତାଧିକାରୀଙ୍କ ରାସନ୍ କାର୍ଡରେ ନାଁ ହିଁ ନାହିଁ । ବାରମ୍ବାର ଲୋକେ ଏ ନେଇ ଅଭିଯୋଗ କଲେ ମଧ୍ୟ ଯୋଗାଣ ବିଭାଗ କିମ୍ବା ଜିଲ୍ଲା ପ୍ରଶାସନ କୌଣସି କାର୍ଯ୍ୟାନୁଷ୍ଠାନ ନେଉ ନାହାନ୍ତି ।