LIVE TV
ଘରକୁ ଫେରୁଛି ଆନ୍ଧ୍ରରେ ବନ୍ଧା ପଡ଼ିଥିବା ନାବାଳିକା ଝିଅ । ଓଟିଭିରେ ଖବର ପ୍ରସାରଣ ହେବା ପରେ ରାଜ୍ୟ ଶ୍ରମ ବିଭାଗ ତତ୍ପର ହୋଇ ଝିଅକୁ ମୁକୁଳାଇଛନ୍ତି । ବଲାଙ୍ଗିର ବେଲପଡ଼ା ବ୍ଲକ ସୁଲେକେଲା ଗାଁର କାହ୍ନୁ ମଲ୍ଲିକ ଗତ ୨ ମାସ ତଳେ ପତ୍ନୀ ସହ ୨ ଝିଅଙ୍କୁ ଧରି ଆନ୍ଧ୍ରପ୍ରଦେଶର ସାତନଗରକୁ ଇଟାଭାଟିରେ କାମ କରିବା ପାଇଁ ଯାଇଥିଲେ ।
ଏଥିପାଇଁ ପୂର୍ବରୁ ତୁରେକେଲା ଥାନା ତେନ୍ତୁଳିଖୁଣ୍ଟିର ଦାଦନ ସର୍ଦ୍ଦାର ସମାରୁ ନାୟକ ଜରିଆରେ ଇଟାଭାଟି ମାଲିକ ଠାରୁ ୮୦ ହଜାର ଟଙ୍କା ବଇନା ନେଇଥିଲେ । କିଛିଦିନ କାମ କରିବା ପରେ ଅସୁସ୍ଥ ହୋଇପଡ଼ିଥିଲେ କାହ୍ନୁ । ଅସୁସ୍ଥତା ସତ୍ତ୍ୱେ ଇଟାଭାଟି ମାଲିକ ଶଙ୍କର ନାୟକ ସହ ମିଶି ସର୍ଦ୍ଦାର ସମାରୁ ନାୟକ କାମ କରିବାକୁ ବାଧ୍ୟ କରୁଥିଲା ।
Also Read
ତେଣୁ କାହ୍ନୁଙ୍କ ପତ୍ନୀ ଭିଟାମାଟି ଫେରିଯିବାକୁ ନିଷ୍ପତ୍ତି ନେବାରୁ ୧୧ ବର୍ଷିୟା ଝିଅକୁ ବନ୍ଧକ ରଖିଥିଲା ସମାରୁ ନାୟକ । ଆଉ ବଇନା ଟଙ୍କା ଫେରାଇବାକୁ ଦାବି କରିଥିଲା । ଶେଷରେ ସଂପୃକ୍ତ କୁନିଝିଅକୁ ଛାଡ଼ି ସପରିବାର ଗାଁକୁ ଫେରିଆସିଥିଲେ । ଆଉ ଜମିବାଡ଼ି ବିକ୍ରି କରି ଫୋନ୍ ଫେ ଜରିଆରେ ୫୦ ହଜାର ଟଙ୍କା ପଠାଇଥିଲେ ।
ଏହା ପରେ ବି ବଳକା ୩୦ ହଜାର ଟଙ୍କା ପଠାଇଲେ ଯାଇ ଝିଅକୁ ଛାଡ଼ିବି କହିଥିଲା ଦାଦନ ସର୍ଦ୍ଦାର । କିନ୍ତୁ ନା ଆଉ ଟଙ୍କା ଯୋଗାଡ଼ କରିପାରିଲେ କାହ୍ନୁ, ନା ସର୍ଦ୍ଦାର କବଳରୁ ମୁକ୍ତ ହୋଇଥିଲା ଝିଅ । ଶେଷରେ ଝିଅକୁ ଝୁରି ଝୁରି ପ୍ରାଣ ହରାଇଛନ୍ତି ଅସୁସ୍ଥ କାହ୍ନୁ ମଲ୍ଲିକ ।
- Reported by:
- MANARANJAN JOSHI
