LIVE TV
ନୂଆପଡା ଜିଲ୍ଲା ସୁନାବେଡା ଉପତ୍ୟକାର ମାଳଭୂମି ଅଂଚଳରେ ଏବେ ଆଳୁ ଚାଷ । ଦିନ ଥିଲା ସୁନାବେଡା ଅଭୟାରଣ୍ୟ ମଧ୍ୟରେ ବସବାସ କରୁଥିବା ଲୋକେ ପାରଂପାରିକ ଚାଷ କରି ଅନେକ କ୍ଷତି ସହୁଥିଲେ । ହେଲେ କିଛି ବର୍ଷ ହେଲା ପରୀକ୍ଷାମୂଳକ ଭାବେ ଚାଷ ପରେ ଏବେ ପାହାଡିଆ ଅଞ୍ଚଳରୁ ବେଶ ଭଲ ଉତ୍ପାଦନ ହୋଇପାରୁଛି ଆଳୁ ।
ସାର୍ଥକ ହେଲା ଶ୍ରମ ଦାନ । ଯାହା ଅସମ୍ଭବ କୁହାଯାଉଥିଲା, ତାହାକୁ ସମ୍ଭବ କରି ଦେଖାଇଲେ ଚାଷୀ । ପୁଣି ଜୈବିକ ପଦ୍ଧତିରେ ପଥୁରିଆ ମାଟିରୁ ଉତ୍ପାଦନ କଲେ କ୍ୱିଣ୍ଟାଲ କ୍ୱିଣ୍ଟାଲ ଆଳୁ। ଯେଉଁ ମାଟିକୁ ଆଳୁ ଚାଷ ପାଇଁ ଅନୁପଯୋଗୀ କୁହାଯାଉଥିଲା ସେହି ମାଟିରେ ହିଁ ଉତ୍ପାଦନ କରିପାରିଛନ୍ତି ସ୍ଥାନୀୟ ଚାଷୀ ।
Also Read
ଅଧିକ ପଢ଼ନ୍ତୁ: ପ୍ରଥମେ ନିଜେ ଦାଦନ ଖଟୁଥିଲେ, ଏବେ ଚାଷ କରି ଲକ୍ଷ ଲକ୍ଷ ରୋଜଗାର କରୁଛନ୍ତି
ଆମେ କହୁଛୁ, ନୂଆପଡ଼ା ସୁନାବେଡା ଅଭୟାରଣ୍ୟ ଅଂଚଳର କଥା । ଦିନ ଥିଲା ଏଠାରେ ଆଳୁ ଚାଷ ପାଇଁ ରାଜି ହେଉନଥିଲେ ଆଦିମ ଜନଜାତି ଓ ବନବାସୀ । ପାରମ୍ପାରିକ ଚାଷ କରି ବି କ୍ଷତି ସହୁଥିଲେ । ଏବର୍ଷ ୩ଟି ପଂଚାୟତରେ ୭୦ ଏକର ଜମିରେ ଆଳୁ ଚାଷ କରାଯାଇଛି।
ସୁନାବେଡା ଅଭୟାରଣ୍ୟ ମଧ୍ୟରେ ବସବାସ କରୁଥିବା ସୁନାବେଡା, ସୋସେଙ୍ଗ ଓ ମିଛାପାଲି ପଂଚାୟତର ୧୨୫ ଜଣ ଚାଷୀଙ୍କୁ ତାଲିମ ଦିଆଯାଇଥିଲା । ଓପିଲିପି ବା ଓଡିଶା ଆଦିମ ଜନଜାତି ସଶକ୍ତିକରଣ ଓ ଜୀବିକା ଉନ୍ନତିକରଣ କାର୍ଯ୍ୟକ୍ରମରେ ଟ୍ରେନିଂ ଦିଆଯାଇଥିଲା। ଏମାନଙ୍କୁ ଓପିଲିପି, ସିବିଡିଏ ଏବଂ ଜିଲ୍ଲା ଉଦ୍ୟାନ ବିଭାଗ ତାଲିମ ଦେଇଥିଲା । ଚଳିତବର୍ଷ ୪ ହଜାର କ୍ୱିଣ୍ଟାଲ ଆଳୁ ଅମଳ ହେବା ନେଇ ଲକ୍ଷ୍ୟ ରଖାଯାଇଛି ।
ଜୈବିକ ପଦ୍ଧତିରେ ଚାଷ କରାଯାଉଥିବାରୁ ଆଖପାଖ ଅଞ୍ଚଳର ଲୋକଙ୍କର ପ୍ରଥମ ପସନ୍ଦ ହୋଇଛି ସୁନାବେଡାର ଆଳୁ।
(ରିପୋର୍ଟ- ନୂଆପଡ଼ାରୁ ମାୟାଧର ସରାଫ)
