LIVE TV
ଖସୁଛି ପାରଦ, ବଢୁଛି ଶୀତ । ସକାଳୁ ସକାଳୁ ସଜେଇ ହୋଇ ହାତ ଠାରି ଡାକୁଛି ପ୍ରକୃତିରାଣୀ । ଘାସ ଗାଲିଚା, ଫୁଲ ବଗିଚା ଶୀତୁଆ ସକାଳ ଘନ କୁହୁଡ଼ି କରୁଛି କିମିଆ । ବଣ ପାହାଡ ଘେରା ପରିବେଶରେ ସୂର୍ଯ୍ୟ ଉଇଁବାର ଦୃଶ୍ୟ ଉଦାସ ମନକୁ ହାଲୁକା କରିବାକୁ ଯଥେଷ୍ଟ । ଖାସ୍ ସେଥିପାଇଁ ତ ଏହି ସ୍ଥାନକୁ କୁହାଯାଏ ଓଡ଼ିଶାର କାଶ୍ମୀର । ହଁ, ଆମେ କହୁଛି କନ୍ଧମାଳ ଜିଲ୍ଲାର ଦାରିଙ୍ଗିବାଡ଼ିର କଥା । ଏଠାକାର ଡୁଲୁରି ପାଇନ୍ ବଣ, କଫି ବଗିଚା, ମିଡିୟୁବାନ୍ଦା ଜଳପ୍ରପାତ, କିରିକୁଟିର ଏମୁ ପକ୍ଷୀ, ଲଭର୍ସ ପଏଂଟ୍, ନେଚର ପାର୍କ, ହିଲଭିୟୁ ପାର୍କ, ସନସେଟ୍ ପଏଂଟ୍ ଓ ପାଙ୍ଗାଲି ଜଳପ୍ରପାତ ପର୍ଯ୍ୟଟକଙ୍କୁ ନିଜ ଆଡକୁ ଆକର୍ଷିତ କରିଥାଏ ।
Also Read
ସକାଳରୁ ନେଇ ସଂଜ ଯାଏଁ ଏହି ସବୁ ପର୍ଯ୍ୟଟନ ସ୍ଥଳିରେ ପ୍ରବଳ ଭିଡ଼ ଲାଗି ରହିବା ସହ ବଣଭୋଜିର ଆସର ମଧ୍ୟ ଜମୁଛି । ଛୋଟ ପିଲା ଠାରୁ ଆରମ୍ଭ କରି ବଡ ଲୋକ ଯାଏ ସଭିଏଁ ବୁଲାବୁଲି କରି ପ୍ରକୃତିର ମଜା ଉଠାଉଛନ୍ତି । କିରିକୁଟିର ଏମୁ ପକ୍ଷୀ ହେଉ ଅବା କଫି ବଗିଚାର ଠେକୁଆ ଛୋଟ ପିଲାଙ୍କୁ ଅଧିକ ଆକୃଷ୍ଟ କରୁଛି । ଏମିତି କି କଫି ବଗିଚାର ତାଜା କଫି ଫଳ ସହ ଗୋଲ ମରିଚ ଦେଖି ଆତ୍ମବିଭୋର ହୋଇ ଉଠୁଛନ୍ତି ପର୍ଯ୍ୟଟକ ।
ଏହା ସହ କନ୍ଧମାଳ ଜିଲ୍ଲାର ସଂସ୍କୃତି ଓ ପରମ୍ପରାର ନିଦର୍ଶନ ସାଜିଥିବା ଆଦିବାସୀ ମହିଳାଙ୍କ ବେଶଭୂଷା ମଧ୍ୟ ପର୍ଯ୍ୟଟଙ୍କୁ ଆକୃଷ୍ଟ କରୁଛି । ଦାରିଙ୍ଗବାଡ଼ି ବୁଲାବୁଲି କରିବାର ଅନୁଭୂତିକୁ ସାଉଁଟିବା ପାଇଁ କେହି କେହି ମୋବାଇଲରେ ସେଲଫି ସହ ଫଟୋ ଉଠାଉଛନ୍ତି । ଘଂଚ ଜଙ୍ଗଲ ମଧ୍ୟରେ ଘୁ ଘୁ ହୋଇ ଗର୍ଜୁଥିବା ଜଳପ୍ରପାତ ଏବେ ସମସ୍ତଙ୍କର ପ୍ରିୟ ସ୍ଥାନ ପାଲଟିଛି ।
ଜୀବନ ଜଞ୍ଜାଳ ମଧ୍ୟରେ ନିଜ ପାଇଁ ସମୟ ବାହାର କରି ପାରିବାର ସହ ଏଠାକୁ ବୁଲି ଆସିବାକୁ କୁହନ୍ତି ଏହାର ପ୍ରେମରେ ପଡ଼ିଥିବା ପର୍ଯ୍ୟଟକ । ରାଜ୍ୟ ଓ ରାଜ୍ୟ ବାହାରରୁ ପର୍ଯ୍ୟଟକ ଏଠାକୁ ଆସୁଥିବାରୁ ସ୍ଥାନୀୟ ଟୁର୍ ଗାଇଡ୍ମାନେ ମଧ୍ୟ ସ୍ୱାବଲମ୍ବି ହୋଇପାରିଛନ୍ତି ।
