ଓଡ଼ିଶାକୁ ପୁଣି ଫେରିଲା କରୋନା; ପଜିଟିଭ୍‌ ଚିହ୍ନଟ ପରେ ବଢ଼ିଲାଣି ଚିନ୍ତା

ରାଜ୍ୟରେ ପୁଣି କଡ଼ ଲେଉଟେଇଛି କରୋନା । ବେଶ୍ କିଛି ଦିନର ବ୍ୟବଧାନ ପରେ ଆଜି ପୁଣି ଜଣେ କୋଭିଡ୍ ପଜିଟିଭ୍ ଚିହ୍ନଟ ହୋଇଛନ୍ତି । ଦେଶରେ ମଧ୍ୟ ଆଜି ଗୋଟିଏ ଦିନରେ ୭୫୨ ନୂଆ ପଜିଟିଭ୍ ଚିହ୍ନଟ ସାଙ୍ଗକୁ ୪ ଜଣଙ୍କ ମୃତ୍ୟୁ, ଚିନ୍ତା ବଢ଼ାଇଛି । ଏଭଳି ସ୍ଥିତିରେ ଆଗୁଆ ପଦକ୍ଷେପ ସ୍ୱରୂପ ବୟସ୍କ ଓ ବହୁବିଧ ରୋଗରେ ଆକ୍ରାନ୍ତ ବ୍ୟକ୍ତିଙ୍କୁ ମାସ୍କ ପିନ୍ଧିବାକୁ ପରାମର୍ଶ ଦେଇଛି ରାଜ୍ୟ ସ୍ୱାସ୍ଥ୍ୟ ବିଭାଗ ।

ଓଡ଼ିଶାକୁ ପୁଣି ଫେରିଲା କରୋନା । ତା’ ସାଙ୍ଗକୁ ଫେରିଲା ମାସ୍କ ପରିଧାନ ପରାମର୍ଶ । କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରାଳୟ ପକ୍ଷରୁ କୋଭିଡ୍ ଡ୍ୟାସବୋର୍ଡରେ ଅପଲୋଡ୍ ହୋଇଛି ଡାଟା । ଏଥିରେ ରାଜ୍ୟର ଜଣେ ବ୍ୟକ୍ତି କୋଭିଡ୍ ଆକ୍ରାନ୍ତ ଚିହ୍ନଟ ହୋଇଥିବା ଦର୍ଶାଯାଇଛି । ଶେଷ ଥର ପାଇଁ ରାଜ୍ୟରେ ଡିସେମ୍ବର ୩ ତାରିଖରେ ଗୋଟିଏ କୋଭିଡ୍ ମାମଲା ଚିହ୍ନଟ ହୋଇଥିବାରୁ ଏହାର ୨୦ ଦିନରେ ଚିହ୍ନଟ ହୋଇଛି ନୂଆ ରୋଗୀ ।

Also Read

ପାଣ୍ଡିଆନ୍-କାମିୟା ଓ ଗୋମାଂସ ବିବାଦରେ ବଢ଼ୁଛି ସରକାରଙ୍କ ଅଡ଼ୁଆ

Read More

ଗୁମର ଖୋଲିଲେ ବସ୍ତି ବାସିନ୍ଦା; କହିଲେ, ଦୀର୍ଘଦିନରୁ ପାଇପରେ ଆସୁଥିଲା ଦୂଷିତ ଓ ଦୁର୍ଗନ୍ଧ ପାଣି

Read More

ଡକ୍ଟର ଅଜୟ କୁମାର ଓଡ଼ିଶା ପିସିସିର ନୂଆ ପ୍ରଭାରୀ

Read More

ହେଲେ ସଂପୃକ୍ତ କୋଭିଡ୍ ଆକ୍ରାନ୍ତଙ୍କ ସଂପର୍କରେ ସବିଶେଷ ତଥ୍ୟ ଜଣା ପଡ଼ି ନଥିଲେ ଦେଶରେ ଦ୍ରୁତ ଗତିରେ ବଢୁଥିବା ସଂକ୍ରମଣକୁ ଦେଖି ତତ୍ପର ରାଜ୍ୟ ସରକାର । ସତର୍କ ପଦକ୍ଷେପ ସ୍ୱରୂପ ରାଜ୍ୟ ସ୍ୱାସ୍ଥ୍ୟ ଓ ପରିବାର କଲ୍ୟାଣ ବିଭାଗ ପକ୍ଷରୁ ବୟସ୍କ ଓ ବହୁବିଧ ରୋଗାକ୍ରାନ୍ତ ବ୍ୟକ୍ତିଙ୍କୁ ମାସ୍କ ପିନ୍ଧିବାକୁ ପରାମର୍ଶ ଦିଆଯାଇଛି । ଏଭଳି ବ୍ୟକ୍ତି ଜନଗହଳି ସ୍ଥାନକୁ ନଯିବା ଏବଂ ଘରୁ ବାହାରକୁ ବାହାରିଲେ ମାସ୍କ ପିନ୍ଧିବାକୁ କୁହାଯାଇଛି ।

ଏପଟେ ଦେଶରେ କିନ୍ତୁ ଚିନ୍ତା ବଢ଼ାଇଲାଣି କରୋନାର ଊର୍ଦ୍ଧ୍ବଗତି । ସ୍ଥିତି ଏମିତି ଯେ, ଆଜି ଗୋଟିଏ ଦିନରେ ଦେଶରେ ଚିହ୍ନଟ ହୋଇଛି ୭୫୨ କରୋନା ପଜିଟିଭ୍ । ଯାହାକି ଦିନିକିଆ ସଂକ୍ରମଣରେ ମେ’ ୨୧ ପରେ ସର୍ବାଧିକ ମାମଲା । ୭୫୨ ନୂଆ କରୋନା ଆକ୍ରାନ୍ତ ଚିହ୍ନଟ ସହ ଦେଶରେ ଆକ୍ଟିଭ୍ କେଶ୍ ସଂଖ୍ୟା ବି ୩୪୨୦କୁ ବଢ଼ିଛି । ସବୁଠୁ ବଡ଼ କଥା ହେଉଛି ବିଗତ ୨୪ ଘଣ୍ଟାରେ ୪ ଜଣଙ୍କର ମୃତ୍ୟୁ ବି ହୋଇଛି । ହଟ୍‌ସ୍ପଟ୍ ପାଲଟିଛି କେରଳ କର୍ଣ୍ଣାଟକ ଭଳି ରାଜ୍ୟ । କେରଳରେ ବିଗତ ୨୪ ଘଣ୍ଟାରେ ୫୬୫ ନୂଆ ରୋଗୀ ଚିହ୍ନଟ ହୋଇଛନ୍ତି ।

ଆଗକୁ ବଡ଼ ଦିନ ଓ ନୂଆବର୍ଷ ଆସୁଥିବାରୁ ସ୍ଥିତି ବିଗିଡ଼ିବାର ଆଶଙ୍କା ରହିଛି । ସେହିପରି ଗୋଆରେ ୨୦ ଜଣଙ୍କ ସହ କୋଭିଡ-୧୯ର ସବ ଭ୍ୟାରିଆଣ୍ଟ JN.1ରେ ଏପର୍ଯ୍ୟନ୍ତ ୨୨ ଜଣ ଚିହ୍ନଟ ହେବା ଯୋଗୁଁ ଦେଶ ବ୍ୟାପୀ କୋଭିଡ୍‌କୁ ନେଇ ସତର୍କତା ବଢ଼ିଛି । ବିଶେଷ କରି ଓଡ଼ିଶାରେ କୋଭିଡ୍ ପୁଣି କଡ଼ ଲେଉଟେଇବା ପରେ ଲୋକଙ୍କ ଭିତରେ ଆଶଙ୍କା ବଢ଼ିଛି । ତେବେ ବିଶେଷଜ୍ଞଙ୍କ କହିବା କଥା, JN.1 ଭ୍ୟାରିଆଣ୍ଟ ଦ୍ରୁତ ସଂକ୍ରାମକ ହେଲେ ବି ଏଥିରେ ଗୁରୁତର ସ୍ୱାସ୍ଥ୍ୟ ସମସ୍ୟା ସୃଷ୍ଟି ହେବାର ସମ୍ଭାବନା କମ୍ । ତେଣୁ ସମସ୍ତେ ମାସ୍କ ନ ପିନ୍ଧି କେବଳ କାଶ, ଥଣ୍ଡା ଥିବା ବ୍ୟକ୍ତି ଏବଂ ବୟସ୍କ ଓ କୋମର୍ବିଡିଟି ଥିବା ବ୍ୟକ୍ତି ମାସ୍କ ପିନ୍ଧିବା ଉଚିତ୍ ବୋଲି କହିଛନ୍ତି ବିଶେଷଜ୍ଞ ।

ଡବ୍ଲୁଏଚ୍ଓର ତଥ୍ୟ ଅନୁଯାୟୀ ବିଗତ ୪ ସପ୍ତାହ ଭିତରେ କୋଭିଡ୍ ସଂକ୍ରମଣରେ ବିଶ୍ୱବ୍ୟାପୀ ୫୨ ପ୍ରତିଶତ ବୃଦ୍ଧି ଘଟିଛି । ଭାରତରେ ମଧ୍ୟ ସଂକ୍ରମଣ ବଢ଼ି ଚାଲିଥିବାରୁ କିଛି ଦିନ ତଳେ ସ୍ଥିତି ପ୍ରତି ସତର୍କ ନଜର ରଖିବାକୁ ସ୍ଥିତିର ସମୀକ୍ଷା ପରେ ରାଜ୍ୟ ସରକାରମାନଙ୍କୁ ପରାମର୍ଶ ଦେଇଥିଲେ କେନ୍ଦ୍ର ସ୍ୱାସ୍ଥ୍ୟମନ୍ତ୍ରୀ ମନସୁଖ ମାଣ୍ଡଭିୟ ।