ଏଣିକି ଅଳିଆ ଅଲଗା ନଦେଲେ ନେବନି ବିଏମ୍‌ସି

ଭୁବନେଶ୍ୱରବାସୀଙ୍କୁ ସଚେତନତା ପାଇଁ ବିଏମ୍‌ସିର ପଦକ୍ଷେପ । ଏଣିକି ଅଳିଆ ଅଲଗା ଅଲଗା ନଦେଲେ ନେବ ନାହିଁ ବିଏମ୍‌ସି । ରାଜଧାନୀବାସୀଙ୍କୁ ସଚେତନ କରାଇବାକୁ ବିଏମସି କମିଶନର ଏପରି ଏକ ପ୍ରୟାସ କରିଛନ୍ତି । ବାୟୋ ମିଥେନ୍ ଗ୍ୟାସ ପ୍ଲାଣ୍ଟ ପାଇଁ ଓଦା ଅଳିଆ ବ୍ୟବହାର ହେବ ।

ତେଣୁ ଓଦା ଓ ଶୁଖିଲା ଅଳିଆ ଅଲଗା ଦେବାକୁ ବିଏମସିର ଅନୁରୋଧ କରିଛି । ଭୁବନେଶ୍ୱରର ୪ଟି ସ୍ଥାନରେ ବାୟୋ ମିଥେନ୍ ଗ୍ୟାସ ପ୍ଲାଣ୍ଟ ନିର୍ମାଣ ହେବ ବୋଲି କହିଛନ୍ତି ବିଏମସି କମିଶନର ।

ପୂର୍ବରୁ ରାଜଧାନୀରେ ଅଳିଆ ପଡ଼ିରହିଥିବାକୁ ନେଇ ବିଭିନ୍ନ ମହଲରେ ପ୍ରତିକ୍ରିୟା ଦେଖିବାକୁ ମିଳିଥିଲା । ଯାହାକୁ ନେଇ ବିଜେପି ପ୍ରତିବାଦ ଜଣାଇଥିଲା । ଗତ ୧୪ ତାରିଖରେ ଏମସି ଆଗରେ ଅଳିଆ ଢାଳି ପ୍ରତିବାଦ କରିଥିଲା ବିଜେପି ।

ରାଜଧାନୀର ଅଳିଆ ସମସ୍ୟାର ସମାଧାନ ଦାବିରେ ଭୁବନେଶ୍ୱର ସାଙ୍ଗଠନିକ ଜିଲ୍ଲା ବିଜେପି ଏଭଳି ନିଆରା ପ୍ରତିବାଦ କରିଥିଲା । ରାଜ୍ୟ ବିଜେପି କାର୍ଯ୍ୟାଳୟରୁ ପ୍ରତିବାଦ ଶୋଭାଯାତ୍ରା ବାହାରି ବିଏମସି କାର୍ଯ୍ୟାଳୟ ଯାଏଁ ଯାଇଥିଲା । ସେଠାରେ ବିଏମସି ଅଫିସ ଆଗରେ ଅଳିଆ ଢାଳି ପ୍ରତିବାଦ କରିଥିଲା ।

ସେପଟେ ବିଜେପିର ଏହି ପ୍ରତିବାଦକୁ ସମାଲୋଚନା କରିଥିଲେ ବିଏମସି ମେୟର । ସେ କହିଥିଲେ, ବିଜେପି ପାଖରେ କୌଣସି ପ୍ରସଙ୍ଗ ନାହିଁ । ଏଣୁ ତାଙ୍କ ନେତୃମଣ୍ଡଳୀ ଲୋକଙ୍କ ନିକଟତର ହେବାକୁ ଏସବୁ ବାହାନା କରୁଛନ୍ତି । ଅଳିଆ ପ୍ରକ୍ରିୟାକରଣ ଜୋରସୋରରେ ଚାଲୁଛି ।

୨ ମାସ ମଧ୍ୟରେ ସବୁ ଅଳିଆ ଖାଲି ହୋଇଯିବ । ବିରୋଧୀ ଏହାକୁ ଅଯଥା ପ୍ରସଙ୍ଗ କରୁଛନ୍ତି ବୋଲି ମେୟର ସୁଲୋଚନା ଦାସ କହିଥିଲେ ।ହେଲେ ବର୍ତ୍ତମାନ ବିଏମ୍‌ସି ମେୟର ଏଣିକି ଅଳିଆ ଅଲଗା ଅଲଗା ନଦେଲେ ବିଏମ୍‌ସି ନେବ ନାହିଁ ବୋଲି ସୂଚନା ଦେଇଛନ୍ତି ।