ସାହେବ ହେବ ତ ଏମିତି...ଯିଏ ଶୁଣୁଛି ବାଃ ବାଃ କରୁଛି

୨ ଚତୁର୍ଥ ଶ୍ରେଣୀ କର୍ମଚାରୀ ଏବଂ ସାହେବଙ୍କ ନିବିଡ଼ ଓ ନିଆରା ସଂପର୍କର ଭିନ୍ନ ଏକ କାହାଣୀ । ଗୋଟିଏ କାହାଣୀ ହେଉଛି, ରାଜ୍ୟ ପୋଲିସ ମୁଖ୍ୟାଳୟର, ଅନ୍ୟଟି ରାଜଭବନର । ଅବସରକାଳୀନ ବିଦାୟବେଳେ ଡିଜିପି ଆଲିଙ୍ଗନ କରି ଯେଉଁ ଶ୍ରଦ୍ଧା ଆଉ ସମ୍ମାନ ଜଣାଇଲେ, ତାକୁ ନେଇ ଝାଡୁଦାର ଜଣକ ଭାବବିହ୍ୱଳ ହୋଇଥିବା ବେଳେ ରାଜଭବନରେ ପାଣି ଦେଉଥିବା କର୍ମଚାରୀଙ୍କ ଝିଅ ବିବାହରେ ଅତିଥି ସାଜିଥିବା ରାଜ୍ୟପାଳଙ୍କ ବଡ଼ପଣ ଏବେ ଚର୍ଚ୍ଚାରେ ।

ଜଣେ ହେଲେ ରାଜ୍ୟ ପୋଲିସ ମୁଖ୍ୟାଳୟର ଝାଡୁଦାର...ଅନ୍ୟ ଜଣେ ହେଲେ ରାଜ୍ୟ ପୋଲିସ ବିଭାଗର ମୁଖିଆ...ଜଣେ ହେଲେ ଚତୁର୍ଥ ଶ୍ରେଣୀ କର୍ମଚାରୀ, ଅନ୍ୟ ଜଣେ ହେଲେ ରାଜ୍ୟ ପୋଲିସ ମହାନିର୍ଦ୍ଦେଶକ । ଯାହାଙ୍କୁ ସାରା ପୋଲିସ ବିଭାଗ ସାଲ୍ୟୁଟ୍ ମାରେ, ତାଙ୍କୁ କୁଣ୍ଢାଇ ଆଜି କୁଣ୍ଢେମୋଟ ଏହି ତଳିଆ କର୍ମଚାରୀଙ୍କ ମନ ଆଉ ପ୍ରାଣ ।

ଭାବବିହ୍ୱଳ କରିଛି ବଡ଼ସାରଙ୍କ ଆଲିଙ୍ଗନ, ଲୁହରେ ବତୁରି ଯାଇଛି ଆଖି । ଧନୀ ନାୟକ..ଦୀର୍ଘ ବର୍ଷ ଧରି କଟକ ସ୍ଥିତ ପୋଲିସ ମୁଖ୍ୟାଳୟର ଝାଡୁଦାର ତଥା ସୁଇପର୍ ଭାବେ ଯୋଗାଇ ଆସୁଥିଲେ ନିରନ୍ତର ସେବା । ଆଉ, ଏବେ ଚାକିରିରୁ ଅବସର ନେଇଛନ୍ତି । ଆଉ ଅବସରକାଳୀନ ସମ୍ବର୍ଦ୍ଧନାବେଳେ ଶ୍ରଦ୍ଧା ଏବଂ ସମ୍ମାନ ସ୍ୱରୂପ ଏଭଳି କୋଳେଇ ନେଇ ବିଦାୟ ଜଣାଇଛନ୍ତି ଡିଜିପି ଅରୁଣ କୁମାର ଷଡ଼ଙ୍ଗୀ ।

Also Read

ଅସୁରକ୍ଷିତ ରାଜଧାନୀ ଆପାର୍ଟମେଣ୍ଟ; ଲୁଟ୍‌ ପରେ ହେଉଛି ଲୁଟ୍‌, ପୋଲିସକୁ ଚାଲେଞ୍ଜ

ବିଜେଡି ଖେଳୁଛି ଭାବାବେଗ ରାଜନୀତି ! ବିଶ୍ୱ ଓଡ଼ିଆ ଭାଷା ସମ୍ମିଳନୀରେ ଖର୍ଚ୍ଚ ହେବ ୧୦୦ କୋଟି ଟଙ୍କା

ଚାକିରିର ଶେଷଦିନରେ ମିଳିଲା ଏମିତି ସମ୍ମାନ...ଖୁସିରେ ଗଦ୍ ଗଦ୍ ହୋଇ କାନ୍ଦି ପକାଇଲେ ଝାଡ଼ୁଦାର୍

ଏହି ସମୟରେ ଆତ୍ମହରା ହୋଇ କେବଳ ଯେ ଧନୀ ନାୟକଙ୍କ ଆଖି ଲୁହ ଛଳଛଳ ହୋଇଥିଲା ତା’ନୁହେଁ, ଡିଜିପି ମଧ୍ୟ ଭାବବିହ୍ୱଳ ହୋଇଥିଲେ ।

ଆଉ ଗୋଟିଏ ଚିତ୍ର ତ ପ୍ରତ୍ୟେକଙ୍କୁ ବାନ୍ଧି ରଖିଛି । ଯିଏ ଦେଖୁଛନ୍ତି ପ୍ରଶଂସା କରୁଛନ୍ତି, ରାଜ୍ୟପାଳ ରଘୁବର ଦାସଙ୍କ ବଡ଼ପଣକୁ ସାବାସୀ ଜଣାଉଛନ୍ତି । ଯାହାଙ୍କ ବାହାଘରକୁ ଯାଇ ଅତିଥି ସାଜିଛନ୍ତି ରାଜ୍ୟପାଳ, ନା ତାଙ୍କର କୌଣସି ସଂପର୍କୀୟ ନା କେହି ଆତ୍ମୀୟ ସ୍ୱଜନ । ବରଂ ରାଜଭବନରେ ପାଣି ଯୋଗାଉଥିବା ଚତୁର୍ଥ ଶ୍ରେଣୀ କର୍ମଚାରୀ ପତିତ ପାବନ ରାଉତରାୟଙ୍କ ଝିଅ ଅନୁପମା ।

ଯାହାଙ୍କ ବାହାଘରକୁ ନିଜେ ଯାଇଛନ୍ତି ରାଜ୍ୟପାଳ ରଘୁବର ଦାସ । ଫୁଲତୋଡ଼ା ଦେଇ ଶୁଭେଛା ଜଣାଇବା ସହ ସୁଖୀ ଦାମ୍ପତ୍ୟ ଜୀବନ ପାଇଁ କାମନା କରିଛନ୍ତି, ତା’ସହ ପରିବାର ସହ ଫଟୋ ଉଠାଇଛନ୍ତି । ରାଜ୍ୟପାଳଙ୍କ ଏଭଳି ବଡ଼ପଣକୁ ଆଜି ଭୁରି ଭୁରି ପ୍ରଶଂସା କରିଛନ୍ତି ପତିତ ପାବନ ରାଉତରାୟ ।

ଏହି ୨ଟି କାହାଣୀ ଦେଖିଲା ପରେ ଗୋଟିଏ କଥା କୁହାଯାଇପାରିବ, ଅନ୍ୟକୁ ଯଦି ଆପଣାର କରିବାର ଅଛି ତ ପଦ ଏବଂ କ୍ଷମତା ବଳରେ ନୁହେଁ, ବରଂ ଏଭଳି ମାନବପଣିଆ ଜରୁରୀ ।