ପୁଣି ଦେଖାଗଲା ମହାନଦୀରେ ପୋତି ହୋଇଥିବା ୫୦୦ ବର୍ଷର ମନ୍ଦିର ଚୂଡ଼ା

ମହାନଦୀ ଅବବାହିକାରେ ପୁଣି ଦୃଶ୍ୟମାନ ହେଲା ପଞ୍ଚଦଶ ଶତାବ୍ଦୀର ଗୋପୀନାଥ ମନ୍ଦିର । ମହାନଦୀର ଅଥଳ ଜଳରାଶିରେ ୫୦୦ ବର୍ଷର ପୁରୁଣା ମନ୍ଦିର ଦୃଶ୍ୟମାନ ହେବା ପରେ ଏହାକୁ ଦେଖିବାକୁ ଲୋକଙ୍କ ମଧ୍ୟରେ ନାହିଁ ନଥିବା ଉତ୍ସାହ । ନୟାଗଡ଼ ଜିଲ୍ଲା ଭାପୁର ବ୍ଲକ ପଦ୍ମାବତୀ ଗାଁ ନିକଟ ମହାନଦୀ ଗର୍ଭରେ ଦେଖିବାକୁ ମିଳିଛି ଏହି ମନ୍ଦିର । କେବଳ ମନ୍ଦିରର ଦଧିନଉତି ଦୃଶ୍ୟମାନ ହେଉଛି । ମନ୍ଦିରର ଅବଶିଷ୍ଟ ଅଂଶ ବାଲିରେ ପୋତି ହୋଇଯାଇଛି । ୨ ବର୍ଷ ତଳେ ବୁଡ଼ି ରହିଥିବା ଏହି ମନ୍ଦିରକୁ ପ୍ରଥମେ ଠାବ କରିଥିଲା ଓଟିଭି । ଯାହାକୁ ନେଇ ସମଗ୍ର ରାଜ୍ୟରେ ଚର୍ଚ୍ଚା ହୋଇଥିଲା ।

୨୦୨୦ ମସିହାରେ ଏହି ମନ୍ଦିର ଦେଖାଯାଇଥିଲା । ନଦୀର ପାଣି ସ୍ତର କମ୍ ରହିଥିବାରୁ ବୁଡିରହିଥିବା ଏହି ମନ୍ଦିର ପୁଣି ଥରେ ଗ୍ରାମବାସୀଙ୍କୁ ଦୃଶ୍ୟମାନ ହୋଇଛି । ଏହି ସ୍ଥାନକୁ ଯାଇ ନିଜ ଆଖିରେ ମନ୍ଦିରକୁ ପୋତି ହୋଇ ରହିଥିବା ଦେଖିବା ପାଇଁ ଲୋକଙ୍କର ପ୍ରବଳ ଆଗ୍ରହ ରହିଛି । ପଦ୍ମାବତୀ ଗ୍ରାମବାସୀଙ୍କ ମତରେ ପୁର୍ବରୁ ପଦ୍ମାବତୀ ଗ୍ରାମଟି ଏହି ସ୍ଥାନରେ ଥିଲା । ଏହା ପଦ୍ମାବତୀ ଗ୍ରାମର ମନ୍ଦିର । ସମୟକ୍ରମେ ମହାନଦୀ ତା’ର ଗତିପଥ ବଦଳାଇବା ସହିତ ବନ୍ୟା ଆଦି କାରଣ ପାଇଁ ୧୯୩୩ ମସିହା ବେଳକୁ ପଦ୍ମାବତୀ ଗ୍ରାମଟି ସଂପୂର୍ଣ୍ଣ ଭାବେ ମହାନଦୀ ଗର୍ଭରେ ଲୀନ ହୋଇ ଯାଇଥିଲା ।

ନଦୀ ଗତିପଥ ବଦଳାଇ ପଦ୍ମାବତୀକୁ ଗ୍ରାସ କରିବାକୁ ପ୍ରାୟ ୩୦ରୁ ୪୦ବର୍ଷ ଲାଗି ଯାଇଥିଲା । ଧୀରେ ଧୀରେ ପଦ୍ମାବତୀ ଗ୍ରାମ ଗଭୀର ଜଳରାଶିରେ ସମାଧି ନେଇଥିଲା । ଫଳରେ ପଦ୍ମାବତୀ ଗ୍ରାମବାସୀ ସେଠାରୁ ସ୍ଥାନାନ୍ତରିତ ହୋଇ ପଦ୍ମାବତୀ, ରଗଡ଼ିପଡ଼ା, ଟିକିରିପଡ଼ା, ବିଜିପୁର, ହେମନ୍ତପାଟଣା ଆଦି ଗ୍ରାମରେ ବସତି ସ୍ଥାପନ କରିଥିଲେ ।