ଶ୍ରୀମନ୍ଦିର ଚାରିପାଖ ଅନୁଧ୍ୟାନ କଲା ASI, ହେଲେ ଉତ୍ତର ଦେବାକୁ କୁନ୍ଥୁ କୁନ୍ଥୁ

ଶ୍ରୀମନ୍ଦିର ଚୌହଦିରେ ଚାଲିଛି କି କି ନିର୍ମାଣ ? ଐତିହ୍ୟ କରିଡର୍ ପାଇଁ କେତେ ଗଭୀରରୁ ଉଠିଛି ପିଲାର୍, ସଂଖ୍ୟା କେତେ ? ନିର୍ମାଣାଧୀନ ବିମ୍ ସବୁର ସାଇଜ୍ କେତେ ? ମହାପ୍ରଭୁ ଜଗନ୍ନାଥଙ୍କ ମନ୍ଦିରର ସୁରକ୍ଷା ପ୍ରତି ଏଭଳି ଖନନ ଓ ନିର୍ମାଣ ଯୋଗୁଁ ବିପଦ ରହିଛି ନା ନାହିଁ ? ସେକଥା ଜାଣିବାକୁ ଆଜି ଏସବୁର ମାପଚୁପ କରିଛି ଭାରତୀୟ ପ୍ରତ୍ନତାତ୍ତ୍ୱିକ ସଂସ୍ଥା-ASI ।

ଶ୍ରୀମନ୍ଦିର କରିଡର ପ୍ରକଳ୍ପକୁ ନେଇ ବିବାଦ ଚରମ ସୀମାରେ ପହଞ୍ଚିଥିବା ବେଳେ ହାଇକୋର୍ଟଙ୍କ ନିର୍ଦ୍ଦେଶ ମୁତାବକ ବାସ୍ତବ ସ୍ଥିତି ପରଖିବାକୁ ଆଜି ପୁରୀ ଯାଇଥିବା ତିନି ଜଣିଆ ଟିମ୍‌ରେ ଥିଲେ ASI ରିଜିଓନାଲ୍ ଡିରେକ୍ଟର ଦିଲ୍ଲିପ ଖମାରୀ, ସୁପରିଟେଣ୍ଡେଣ୍ଟ ଅରୁଣ ମଲ୍ଲିକ ଓ ଆସିଷ୍ଟାଣ୍ଟ ସୁପରିଟେଣ୍ଡେଣ୍ଟ ଚିତ୍ତରଞ୍ଜନ ଦାସ । ସାଥିରେ ଥିଲେ କରିଡର ନିର୍ମାଣ ଓ ତଦାରଖ ଦାୟିତ୍ୱରେ ଥିବା ସଂସ୍ଥା ଟାଟା ପ୍ରୋଜେକ୍ଟ ଏବଂ ଓବିସିସି ସହ ପୁରୀ ଜିଲ୍ଲାପାଳ ।

ଟିମ୍ ପ୍ରଥମେ ଶ୍ରୀମନ୍ଦିର ପଶ୍ଚିମଦ୍ୱାର ପଟେ ନିର୍ମାଣ ଚାଲିଥିବା ଇନଫରମେସନ କିଓସ୍କ, ସେଲ୍ଟର ପାଭିଲିଅନ୍, କ୍ଲୋକ୍ ରୁମ୍ ଓ ଟୟଲେଟ୍ କାମର ଯାଞ୍ଚ କରିଥିଲେ । ପରେ ଦକ୍ଷିଣ ଦ୍ୱାର ଓ ଏମଆର ମଠ ପରିସରକୁ ଯାଇ ଅନୁଧ୍ୟାନ କରିଥିଲେ । ହେଲେ ସବୁଠାରୁ ବଡ଼ କଥା ହେଲା, ଐତିହ୍ୟ କରିଡର୍ କାମ ସବୁ ନିୟମ ମୁତାବକ ହେଉଛି କି ? ବୋଲି ପ୍ରଶ୍ନରେ କେହି ଜଣେ ହେଲେ କିନ୍ତୁ ମୁହଁ ଖୋଲିନଥିଲେ ।

ତେବେ ASI ଅଧିକାରୀଙ୍କୁ ଘନ ଘନ ପ୍ରଶ୍ନ ପରେ, ଶେଷରେ ହାଇକୋର୍ଟରେ ମାମଲା ବିଚାରାଧୀନ ଥିବାର ଦ୍ୱାହି ଦେଇ କେବଳ ଯାଞ୍ଚ ରିପୋର୍ଟ ନ୍ୟାୟାଳୟଙ୍କୁ ଦେବେ ବୋଲି କହିଥିଲେ ସଂସ୍ଥାର ରିଜିଓନାଲ୍ ଡିରେକ୍ଟର ଦିଲୀପ ଖମାରୀ ।

ସେପଟେ ଐତିହ୍ୟ କରିଡର କାମରେ ASIର ନିରବତାକୁ ନେଇ ବାରମ୍ବାର ପ୍ରଶ୍ନ ଉଠାଇ ଆସୁଥିବା ବୁଦ୍ଧୀଜୀବୀ ଓ ଆଇନଜୀବୀ କିନ୍ତୁ ପ୍ରକଳ୍ପ କାମ ଯାଞ୍ଚକୁ ସ୍ୱାଗତ କରିଛନ୍ତି । ସେମାନେ କହିଛନ୍ତି-ASI କୋର୍ଟରେ ସଠିକ୍ ତଥ୍ୟ ଦାଖଲ କଲେ ନିଶ୍ଚିତ ଭାବେ ଆମସାର୍ ଆକ୍ଟର ଉଲ୍ଲଂଘନ ହୋଇଥିବା କଥା ପଦାକୁ ଆସିବ । ତେଣେ ପ୍ରକଳ୍ପ କାମକୁ ସମର୍ଥନ କରୁଥିବା ପରିକ୍ରମା ସୁରକ୍ଷାମଞ୍ଚ କହିଛି, ରାଜ୍ୟ ସରକାର ଯେଉଁ କାମ କରୁଛନ୍ତି ସେଥିପାଇଁ ଏନଏମଏର ଅନୁମତି ରହିଛି । କିଛି ଲୋକ ପ୍ରକଳ୍ପ କାର୍ଯ୍ୟକୁ ବିରୋଧ କରୁଛନ୍ତି, ହେଲେ ରାଜ୍ୟ ସରକାର କୌଣସି ବେଆଇନ୍ କାମ କରିନାହାନ୍ତି ।

ଶ୍ରୀମନ୍ଦିର ପରିକ୍ରମା ପ୍ରକଳ୍ପ ପାଇଁ ଆମ୍‌ସାର୍‌ ଆକ୍ଟର ଖୋଲାଖୋଲି ଉଲ୍ଲଂଘନ ସହ ବେଆଇନ୍ ଖନନକୁ ନେଇ ବିବାଦ ଚରମ ସୀମାରେ ପହଞ୍ଚିଛି । ଏସବୁ ଭିତରେ ଆସନ୍ତା ୯ ତାରିଖରେ ହାଇକୋର୍ଟରେ ରହିଛି ଏ ସମ୍ପର୍କିତ ମାମଲାର ଶୁଣାଣି । ତା’ପୂର୍ବରୁ ପ୍ରକଳ୍ପର ବାସ୍ତବ ସ୍ଥିତି ସମ୍ପର୍କରେ ୭ ତାରିଖ ସୁଦ୍ଧା ରିପୋର୍ଟ ଦେବାକୁ ଏଏସ୍ଆଇକୁ ଅଦାଲତଙ୍କ ରହିଛି କଡ଼ା ନିର୍ଦ୍ଦେଶ ।