Repel mosquito: ମଶା ଘଉଡେଇବା ପାଇଁ ଆପଣାନ୍ତୁ ଏହି ଘରୋଇ ଉପାୟ

ମଶାଙ୍କ ବଂଶ ବୃଦ୍ଧି ଅନେକ ରୋଗକୁ ଡାକିଥାଏ। ଘର ନିକଟରେ ମଶା ରହିଲେ ଏହାକୁ ଘଉଡେଇବା ପାଇଁ ବିଭିନ୍ନ ଉପାୟ ଆପଣେଇବାକୁ ପଡିଥାଏ। ତେବେ ମଶା ଘଉଡେଇବା ପାଇଁ ଘରୋଇ ଉପାୟ ଗୁଡ଼ିକ ଅତ୍ୟନ୍ତ ସହଜ, ସୁରକ୍ଷିତ ଏବଂ ପରିବେଶ ଅନୁକୂଳ। କେବଳ ଯେ, ଏହା ଖର୍ଚ୍ଚ କମାଇବାରେ ସାହାଯ୍ୟ କରେ ତା ନୁହେଁ ବରଂ ରାସାୟନିକ ପଦାର୍ଥର ବ୍ୟବହାର ମଧ୍ୟ ହ୍ରାସ କରେ। ଆସନ୍ତୁ କିଛି ପ୍ରଭାବଶାଳୀ ଘରୋଇ ଉପାୟ ବିଷୟରେ ଆଲୋଚନା କରିବା।

ଲଙ୍କା ଗୁଣ୍ଡ ଓ କର୍ପୂର: ଲଙ୍କା ଗୁଣ୍ଡ ଏବଂ କର୍ପୂରର ମିଶ୍ରଣ ମଶା ଘଉଡାଇବାରେ ବେଶ୍ ଉପଯୋଗୀ। ଏକ କପ୍ ପାଣିରେ ଦୁଇ ଚାମଚ ଲଙ୍କା ଗୁଣ୍ଡ ଓ ଅଳ୍ପ କପୁର ମିଶାଇ ସ୍ପ୍ରେ ବୋତଲରେ ଭର୍ତ୍ତି କରନ୍ତୁ। ଏହାକୁ ଘରର କୋଣ, ଜାଲି ଓ ଦୁଆର ପାଖରେ ସ୍ପ୍ରେ କଲେ ମଶା ଦୂରେଇ ଯାଆନ୍ତି। ଲଙ୍କାର ତୀବ୍ର ଗନ୍ଧ ଓ କର୍ପୂରର ପ୍ରଭାବ ମଶାଙ୍କୁ ଅସହ୍ୟ ଲାଗେ।

ଲେମ୍ବୁ ଓ ଲବଙ୍ଗ: ଏକ ଲେମ୍ବୁକୁ ଅଧା କାଟି ତା’ ଉପରେ ୧୦-୧୨ଟି ଲବଙ୍ଗ ଲଗାଇ ରାତିରେ ଶୋଇବା ଘରେ ରଖନ୍ତୁ। ଲେମ୍ବୁର ଖଟା ଗନ୍ଧ ଓ ଲବଙ୍ଗର ତୀକ୍ଷ୍ଣ ସୁଗନ୍ଧ ମଶାଙ୍କୁ ପାଖକୁ ଆସିବାକୁ ଦିଏ ନାହିଁ। ଏହା ଏକ ସରଳ ଓ ଶସ୍ତା ଉପାୟ ଯାହା ଘରେ ସହଜରେ ଉପଲବ୍ଧ।

ତୁଳସୀ ଗଛ: ତୁଳସୀ ଗଛ କେବଳ ଔଷଧୀୟ ଗୁଣ ପାଇଁ ନୁହେଁ, ମଶା ନିୟନ୍ତ୍ରଣ ପାଇଁ ମଧ୍ୟ ଉପଯୋଗୀ। ଘରର ଝରକାର ଜାଲି ପାଖରେ କିମ୍ବା ବାରଣ୍ଡାରେ ତୁଳସୀ ଗଛ ରଖିଲେ ମଶା ପ୍ରବେଶ କରିବାରେ ବାଧା ପାଇଥାଏ। ଏହାର ପ୍ରାକୃତିକ ସୁଗନ୍ଧ ମଶାଙ୍କୁ ଦୂରରେ ରଖେ।

ନିମ୍ବ ତେଲ: ନିମ୍ବ ତେଲ ମଶା ପାଇଁ ଏକ ଶକ୍ତିଶାଳୀ ପ୍ରତିରୋଧକ। ଏକ ଚାମଚ ନିମ୍ବ ତେଲକୁ ନଡ଼ିଆ ତେଲ ସହିତ ମିଶାଇ ଶରୀରରେ ଲଗାଇଲେ ମଶା କାମୁଡ଼ିବାରୁ ରକ୍ଷା ମିଳେ। ଏହାକୁ ଏକ ଦୀପରେ ମିଶାଇ ଜାଳିଲେ ମଧ୍ୟ ଘରୁ ମଶା ଦୂର ହୋଇଯାଆନ୍ତି।

ପାଣି ଜମିବାକୁ ରୋକିବା: ମଶା ପ୍ରଜନନ ପାଇଁ ଜମି ରହିଥିବା ପାଣି ଏକ ପ୍ରମୁଖ ସ୍ଥାନ। ଘର ଚାରିପାଖରେ ଖାଲ ଜାଗା, ଫୁଲଦାନୀ, କିମ୍ବା ପାଣି ଟାଙ୍କିରେ ପାଣି ଜମିବାକୁ ଦିଅନ୍ତୁ ନାହିଁ। ସପ୍ତାହକୁ ଥରେ ଏଗୁଡ଼ିକୁ ସଫା କରି ଶୁଖାଇ ଦିଅନ୍ତୁ।

ଏହି ଉପାୟଗୁଡ଼ିକ ନିୟମିତ ବ୍ୟବହାର କଲେ ମଶାଙ୍କ ଉପଦ୍ରବ ହ୍ରାସ ପାଇବ ଏବଂ ଘର ସୁରକ୍ଷିତ ରହିବ। ଏଗୁଡ଼ିକ ସମ୍ପୂର୍ଣ୍ଣ ପ୍ରାକୃତିକ ହୋଇଥିବାରୁ ଶିଶୁ ଓ ବୟସ୍କଙ୍କ ପାଇଁ ମଧ୍ୟ କ୍ଷତିକାରକ ନୁହେଁ। 

ଅଧିକ ପଢ଼ନ୍ତୁ: ବ୍ୟାୟାମ କରିବା ପରେ ଶୋଇ ପଡୁଛନ୍ତି କି… ଯେତେ ଖଟିଲେ ବି କିଛି ଲାଭ ହେବନି