B-2 Stealth Bomber: ଆମେରିକାର B-2 ବମ୍ୱର କ'ଣ, କାହିଁକି ଏହା ସବୁଠୁ ମାରାତ୍ମକ ?

ଇରାନର ୩ଟି ପରମାଣୁ ଘାଟି ଉପରେ ପ୍ରଚଣ୍ଡ ଆକ୍ରମଣ କରିଛି ଆମେରିକା । ଇରାନର ପରମାଣୁ କ୍ଷମତା ପଙ୍ଗୁ କରିବାକୁ ଏହାର ଫୋର୍ଡୋ, ନାଟାଞ୍ଜ ଓ ଇସଫାହାନ ପରମାଣୁ ଘାଟିକୁ ଧ୍ୱସ୍ତବିଧ୍ୱସ୍ତ କରିଦେଇଛି । କୁହାଯାଉଛି ଆମେରିକା ବିଶ୍ୱର ସବୁଠୁ ଘାତକ ପରମାଣୁ ବୋମାବର୍ଷୀ ବିମାନ B2ରେ ଇରାନ ଉପରେ ଆକ୍ରମଣ କରିଛି । ତେବେ କ'ଣ ଏହି B2 ବିମାନ ? ଆସନ୍ତୁ ଜାଣିବା B2 ବିମାନର ସ୍ୱତନ୍ତ୍ରତା ଓ ଶକ୍ତି ଉପରେ... 

• ବିଶ୍ୱର ସବୁଠୁ ଘାତକ ପରମାଣୁ ବୋମାବର୍ଷୀ ବିମାନ B2 । ଯାହା ଅତି ଗଭୀରରେ ଅବସ୍ଥାପିତ ଅଣ୍ଡରଗ୍ରାଉଣ୍ଡକୁ ନଷ୍ଟ କରିବାର କ୍ଷମତା ରଖିଛି ।
• ଏହି ବିମାନ ଏକାଥରକେ ୧୬ଟି ପରମାଣୁ ବୋମା ଧରି ଉଡ଼ିବାକୁ ସକ୍ଷମ । ଶତ୍ରୁଙ୍କ ରାଡାରରୁ ଲୁଚିବା କ୍ଷମତା ରଖିଥାଏ । 
•  B2 ଆମେରିକୀୟ ବାୟୁସେନାର ଏକ ପ୍ରମୁଖ ସାମରିକ ଅସ୍ତ୍ର । ଏହା ନିର୍ଦ୍ଦିଷ୍ଟ ଓ ପରମାଣୁ ଆକ୍ରମଣ ପାଇଁ ବ୍ୟବହୃତ ହୋଇଥାଏ । 
• ଏହା ଏକ ପକ୍ଷୀ ଭଳି ଦେଖାଯାଇଥାଏ । ପାରମାଣବିକ ଓ ପାରମ୍ପରିକ ଅସ୍ତ୍ର ବୋହିବାର କ୍ଷମତା ରଖିଛି B2 । ଏକକାଳୀନ ୬ ହଜାର ମାଇଲରୁ ଅଧିକ ଦୂରତା ଉଡ଼ିପାରେ । 
• ଏହି ବିମାନର ଯୁଦ୍ଧାସ୍ତ୍ର କ୍ଷମତା ୧୮ ହଜାର କିଲୋଗ୍ରାମ । ଏହା ୧୨ କିଲୋମିଟର ଉଚ୍ଚତାରୁ ଆକ୍ରମଣ କରିପାରିବ । ଭୂମିରେ ୨୦୦ ଫୁଟ ଗଭୀରକୁ ଓ ୬୦ ଫୁଟ କଂକ୍ରିଟ୍ ଗଭୀରତାକୁ ପଶିପାରିବ ।
• ପୂର୍ବରୁ ଆମେରିକାର ଏକାଧିକ ଅପରେସନରେ ସାମିଲ ହୋଇଛି B2 । 
• ଆମେରିକା ପାଖରେ ୨୦ଟି B2 ବିମାନ ରହିଛି ।

ଅଧିକ ପଢନ୍ତୁ: ମଧ୍ୟପ୍ରାଚ୍ୟରେ ଯୁଦ୍ଧ ନିଆଁ; ଆମେରିକାର ଆଟାକ୍‌ ପରେ ଇରାନ ରାଷ୍ଟ୍ରପତିଙ୍କ ସହ କଥା ହେଲେ ମୋଦି

ବର୍ତ୍ତମାନ ମଧ୍ୟପ୍ରାଚ୍ୟରେ ଇସ୍ରାଏଲ ଓ ଇରାନ ମଧ୍ୟରେ ସାମରିକ ସଂଘର୍ଷ ଦିନକୁ ଦିନ ଅତି ଭୀଷଣ ହେବାରେ ଲାଗିଛି । ଦୁଇ ଦେଶ ପରସ୍ପର ଉପରେ ଶକ୍ତିଶାଳୀ ମିସାଇଲ ଆଟାକ୍‌ କରୁଥିବାରୁ ସ୍ଥିତି ଅତି ଭୟଙ୍କର ରୂପ ନେଉଛି । ଯୁଦ୍ଧ ନିଆଁରେ ଜଳୁଛି ଉଭୟ ଦେଶ । ଇରାନର ମିସାଇଲ ମାଡ଼ରେ ତେଲ୍‌ ଅଭିଭ୍‌ ସମେତ କେନ୍ଦ୍ରୀୟ ଇସ୍ରାଏଲରେ ବ୍ୟାପକ କ୍ଷୟକ୍ଷତି ହୋଇଥିବାବେଳେ ଇସ୍ରାଏଲ ମଧ୍ୟ ପ୍ରଚଣ୍ଡ ଜବାବୀ ଆକ୍ରମଣ କରୁଛି ।