NSA Ajit Doval: ଋଷ୍ ଗସ୍ତରେ ଏନଏସଏ ଅଜିତ ଡୋଭାଲ, ପୁଟିନ୍ ଆସିବେ ଭାରତ

ଭାରତ-ରୁଷିଆ ପ୍ରତିରକ୍ଷା ଓ ଶକ୍ତି ସହଯୋଗ ଭଳି ବିଷୟରେ ଆଲୋଚନା ପାଇଁ ମସ୍କୋରେ ଅଛନ୍ତି ଏନଏସଏ ଅଜିତ ଡୋଭାଲ । ଡୋଭାଲ ମସ୍କୋରେ ବଡ଼ ବଡ଼ ରୁଷୀୟ ନେତାଙ୍କ ସହ ବୈଠକ କରିଛନ୍ତି। ରୁଷିଆର ସିକ୍ୟୁରିଟି କାଉନସିଲର ସେକ୍ରେଟାରୀ ସର୍ଗେଇ ଶୋଇଗୁ ଗୁରୁବାର ଭାରତୀୟ ଜାତୀୟ ସୁରକ୍ଷା ଉପଦେଷ୍ଟା ଅଜିତ ଡୋଭାଲଙ୍କ ସହ ସାକ୍ଷାତ କରିଛନ୍ତି। ମସ୍କୋରେ ହୋଇଥିବା ଏହି ବୈଠକରେ ଶୋଇଗୁ ଉଭୟ ଦେଶ ମଧ୍ୟରେ ରଣନୀତିକ ଭାଗିଦାରୀକୁ ବ୍ୟାପକ ଭାବେ ମଜବୁତ କରିବା ଉପରେ ଜୋର ଦେଇଛନ୍ତି। ଶୋଇଗୁ କହିଛନ୍ତି ଯେ ଭାରତ ସହ ସମ୍ପର୍କକୁ ମଜବୁତ କରିବା ରୁଷିଆ ପାଇଁ ସର୍ବୋଚ୍ଚ ଅଗ୍ରାଧିକାର। ସେ ଡୋଭାଲଙ୍କ ସହ ସାକ୍ଷାତ ମାଧ୍ୟମରେ ଆମେରିକୀୟ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କୁ ମଧ୍ୟ ଏକ ବାର୍ତ୍ତା ଦେବାକୁ ଚେଷ୍ଟା କରିଛନ୍ତି। ପୂର୍ବରୁ ରୁଷିଆର ପ୍ରତିରକ୍ଷା ମନ୍ତ୍ରୀ ଥିବା ଶୋଇଗୁ ଡୋଭାଲଙ୍କ ସହ ବୈଠକ ସମୟରେ ଆମେରିକାର ମୁକାବିଲା ପାଇଁ ଏକ ନୂଆ ବ୍ୟବସ୍ଥା ପ୍ରସ୍ତୁତ କରିବାର ସଙ୍କେତ ଦେଇଛନ୍ତି। ସେ ଭାରତ ସହ ନିଜ ଦେଶର ମଜବୁତ ବନ୍ଧୁତ୍ୱପୂର୍ଣ୍ଣ ସମ୍ପର୍କର ପ୍ରଶଂସା କରି କହିଛନ୍ତି ଯେ ଏକ ନୂଆ, ନିଷ୍ପକ୍ଷ ଓ ସ୍ଥାୟୀ ବିଶ୍ୱ ବ୍ୟବସ୍ଥା ଗଢ଼ି ଉଠିବା ଉଚିତ। ବିଶ୍ୱରୁ ଆମେରିକୀୟ ଦାଦାଗିରିର ମୁକାବିଲା ପାଇଁ ଏକ ଉପାୟ ଖୋଜିବାକୁ ସେ କହିଛନ୍ତି।

ଏନଏସଏ ଅଜିତ ଡୋଭାଲ ମସ୍କୋରେ କହିଛନ୍ତି ଯେ ଆମେ ରାଷ୍ଟ୍ରପତି ଭ୍ଲାଦିମିର ପୁଟିନଙ୍କ ଭାରତ ଗସ୍ତ ବିଷୟରେ ଜାଣି ଉତ୍ସାହିତ। ଏହାର ତାରିଖ ପ୍ରାୟ ନିର୍ଦ୍ଧାରଣ ହୋଇସାରିଛି ଏବଂ ଶୀଘ୍ର ଘୋଷଣା କରାଯିବ। ସେ ପହଲଗାମ ଆକ୍ରମଣ ପରେ ସମର୍ଥନ ପାଇଁ ମଧ୍ୟ ରୁଷୀୟ ରାଷ୍ଟ୍ରପତିଙ୍କୁ ଧନ୍ୟବାଦ ଜଣାଇଛନ୍ତି। ଅଜିତ ଡୋଭାଲ ମଙ୍ଗଳବାର ଦିନ ରୁଷିଆରେ ପହଞ୍ଚିଛନ୍ତି। ଏହାପରେ ତାଙ୍କର ରୁଷୀୟ ନେତାଙ୍କ ସହ ବୈଠକର କାର୍ଯ୍ୟକ୍ରମ ଜାରି ରହିଛି। ଡୋଭାଲଙ୍କ ଏହି ରୁଷିଆ ଗସ୍ତ ପୂର୍ବରୁ ନିର୍ଦ୍ଧାରିତ ଥିଲା, କିନ୍ତୁ ଆମେରିକୀୟ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଭାରତ ଉପରେ ଟାରିଫ ଲଗାଇବା ଯୋଗୁଁ ଏହା ଉପରେ ବିଶ୍ୱର ନଜର ରହିଛି। ଟ୍ରମ୍ପ ରୁଷିଆରୁ ତୈଳ କିଣିବା ପାଇଁ ଭାରତ ଉପରେ ଟାରିଫ ଲଗାଇଛନ୍ତି। ଏପରି ପରିସ୍ଥିତିରେ ରୁଷିଆ ଓ ଭାରତ ପକ୍ଷରୁ ଏହାର ଜବାବରେ କୌଣସି ନିଷ୍ପତ୍ତି ନିଆଯିବାର ଆଶା କରାଯାଉଛି।

ଡୋନାଲ୍ଡ ଟ୍ରମ୍ପ ଭାରତକୁ ରୁଷିଆରୁ ତୈଳ ନ କିଣିବା ପାଇଁ ଚେତାବନୀ ଦେଇଛନ୍ତି। କିନ୍ତୁ ଭାରତ ଡୋନାଲ୍ଡ ଟ୍ରମ୍ପଙ୍କ ଧମକକୁ ଅନୁଚିତ ବୋଲି କହି ଅଗ୍ରାହ୍ୟ କରିଦେଇଛି। ଭାରତ ରୁଷିଆରୁ ତୈଳ କିଣିବା ଜାରି ରଖିବାର ସଙ୍କେତ ଦେଇ କହିଛି ଯେ ଯେକୌଣସି ବଡ଼ ଅର୍ଥବ୍ୟବସ୍ଥା ପରି ଆମେ ଆମର ଆର୍ଥିକ ସୁରକ୍ଷା ରକ୍ଷା ପାଇଁ କାମ ଜାରି ରଖିବୁ। ଏହି ଘଟଣାକ୍ରମ ମଧ୍ୟରେ ମନେ କରାଯାଉଛି ଯେ ଅଜିତ ଡୋଭାଲ ଭ୍ଲାଦିମିର ପୁଟିନଙ୍କ ସହ ତାଙ୍କ ବୈଠକରେ ରୁଷୀୟ ତୈଳ ଆମଦାନୀ ଉପରେ ନୂଆ ରଣନୀତି ପ୍ରସ୍ତୁତ କରିପାରନ୍ତି।

ଅଧିକ ପଢ଼ନ୍ତୁ: ଭାରତ ଆପଣାଉ ଯେସାକୁ ତେସା ନୀତି, ପରାମର୍ଶ ଦେଲେ କଂଗ୍ରେସ ସାଂସଦ ଶଶି ଥରୁର