LIVE TV
କାନାଡ଼ାରେ ଭାରତୀୟ ଦମ୍ପତ୍ତିଙ୍କ ମୃତ୍ୟୁ । ନିଆଁ ଲାଗିଯିବା ଫଳରେ ମୃତ୍ୟୁ ହୋଇଥିବା ଜଣା ପଡ଼ିଛି । ତେବେ ନିଆଁ ଲାଗିବାର କାରଣ ଅସ୍ପଷ୍ଟ ରହିଛି । ଅଗ୍ନିକାଣ୍ତ ଫଳରେ ଦମ୍ପତ୍ତିଙ୍କର ନାବାଳିକା ଝିଅର ମଧ୍ୟ ମୃତ୍ୟୁ ହୋଇଛି । ଗତ ମାର୍ଚ୍ଚ ୭ ରେ ଏହି ଘଟଣା ଘଟିଥିବା ଜଣା ପଡ଼ିଛି ।
ମୃତକମାନେ ହେଲେ ୫୧ ବର୍ଷୀୟ ରାଜୀବ ୱାରିକୋ, ତାଙ୍କ ପତ୍ନୀ ୪୭ ବର୍ଷୀୟ ଶିଳ୍ପା କୋଥା ଏବଂ ସେମାନଙ୍କର ୧୬ ବର୍ଷର ଝିଅ ମହକ ୱାରିକୋ । ବିଗ୍ ସ୍କାଏ ୱେରେ ଥିବା ତାଙ୍କ ଘରୁ ଦମ୍ପତ୍ତିଙ୍କ ସହ ନାବାଳିକର ମୃତଦେହ ମିଳିଥିଲା । ତେବେ ନିଆଁ କେଉଁ କାରଣ ପାଇଁ ଲାଗିଲା ବର୍ତ୍ତମାନ ସୁଦ୍ଧା କାରଣ ଜଣା ପଡ଼ିନାହିଁ । କେହିଁ ନିଆଁ ଲଗାଇ ଦେଇଛି କି ଏହା କୌଣସି ଦୁର୍ଘଟଣା ତାହା ବର୍ତ୍ତମାନ ପର୍ଯ୍ୟନ୍ତ ପୋଲିସ ତଦନ୍ତ କରୁଛି ।
ଅନ୍ୟପଟେ ଏହା ହତ୍ୟା କି ଆତ୍ମହତ୍ୟା ସେନେଇ ମଧ୍ୟ ପୋଲିସ ତଦନ୍ତ ଜାରି ରଖିଛି । ଏହା ଦୁର୍ଘଟଣା ଜନିତ ନୁହେଁ ବୋଲି ପ୍ରାଥମିକ ଅନୁସନ୍ଧାନରୁ ପୋଲିସ ସନ୍ଦେହ କରୁଛି । ପୋଲିସ ଏହାକୁ ସନ୍ଦେହଜନକ ବୋଲି ବର୍ଣ୍ଣନା କରିଛି । ଅଗ୍ନିକାଣ୍ତ କିପରି ଘଟିଲା ତାହାର କାରଣ ଜାଣିବାକୁ ପୋଲିସ ତଦନ୍ତ ଜାରି ରଖିଛି ।
Also Read
ତେବେ ଏନେଇ ପ୍ରତ୍ୟକ୍ଷଦର୍ଶୀମାନେ କହିଛନ୍ତି, ପ୍ରଥମେ ଏକ ବଡ଼ ବିସ୍ଫୋରଣ ହୋଇଥିଲା । ପରେ ନିଆଁ ଲାଗିଯାଇଥିଲା ଓ ଅଳ୍ପ କେତେ ସମୟରେ ପୂରା ଘର ପୋଡ଼ି ପାଉଁଶ ହୋଇଯାଇଥିଲା । ସେସମୟରେ ମୃତାହତଙ୍କ ସଂଖ୍ୟା ଜଣା ପଡ଼ିନଥିଲା । ପରେ ବହୁ କଷ୍ଟରେ ଶବଗୁଡ଼ିକୁ ଚିହ୍ନଟ କରିଥିଲେ ।
ରାଜୀବ ୱାରିକୋ ଟରୋଣ୍ଟୋ ପୋଲିସରେ ସ୍ୱେଚ୍ଛାସେବୀ ଭାବରେ କାର୍ଯ୍ୟ କରୁଥିଲେ । ତାଙ୍କର କାର୍ଯ୍ୟକାଳ ଗତ ୨୦୧୬ ରେ ଶେଷ ହୋଇଯାଇଥିଲା । ରାଜୀବଙ୍କ ଝିଅ ମହକ ୱାରିକୋ ଜଣେ ଫୁଟବଲର୍ ଥିଲେ ।
