LIVE TV
ହଂକଂ ଏବଂ ସିଙ୍ଗାପୁରର ଖାଦ୍ୟ ନିୟାମକ ବିଭାଗ ଦୁଇଟି ବଡ଼ ମସଲା ବ୍ରାଣ୍ଡରୁ ଚାରିଟି ଉତ୍ପାଦ ବ୍ୟବହାର ନ କରିବାକୁ ଚେତାବନୀ ଦେଇଛନ୍ତି। ଏହି ଚାରୋଟି ଉତ୍ପାଦ ମଧ୍ୟରୁ ତିନୋଟି MDHର ହୋଇଥିବାବେଳେ ଗୋଟିଏ ଏଭରେଷ୍ଟରୁ ମସଲା ବ୍ରାଣ୍ଡର ଅଟେ। ଏଥିରେ ଏଥିଲୀନ ଅକ୍ସାଇଡର ପରିମାଣ ବହୁତ ଅଧିକ, ଯାହା କର୍କଟ ଭଳି ସାଂଘାତିକ ରୋଗର କାରଣ ହୋଇପାରେ। ଇଣ୍ଟରନ୍ୟାସନାଲ ଏଜେନ୍ସି ଫର୍ ରିସର୍ଚ୍ଚ ଅନ୍ କ୍ୟାନସର ଏଥିଲୀନ ଅକ୍ସାଇଡ୍କୁ ‘ସମୂହ ୧ କାର୍ସିନୋଜେନ୍’ ଭାବରେ ଶ୍ରେଣୀଭୁକ୍ତ କରିଛି ।
Also Read
ଏପ୍ରିଲ ୫ରେ ନିଜ ୱେବସାଇଟରେ ପୋଷ୍ଟ କରାଯାଇଥିବା ଏକ ବିବୃତ୍ତିରେ ହଂକଂର ଖାଦ୍ୟ ନିୟାମକ ପ୍ରାଧିକରଣ କେନ୍ଦ୍ର ଖାଦ୍ୟ ସୁରକ୍ଷା (ସିଏଫଏସ୍) କହିଛି ଯେ MDHର ତିନୋଟି ମସଲା ଉତ୍ପାଦ - ମଦ୍ରାସ କରୀ ପାଉଡର, ସମ୍ୱର ମସଲା ଏବଂ କରୀ ପାଉଡର ମିକ୍ସଡ୍ ମସଲା ପାଉଡର ଏବଂ ଏଭରେଷ୍ଟ ଫିସ୍ କରୀ ମସଲାରେ ‘କୀଟନାଶକ, ଏଥିଲୀନ ଅକ୍ସାଇଡ୍’ ରହିଛି ।
CFS ପକ୍ଷରୁ ଦିଆଯାଇଥିବା ଏହି ବିବୃତ୍ତି ଉପରେ ଉଭୟ ଏମଡିଏଚ୍ ଏବଂ ଏଭରେଷ୍ଟ ମସଲା କୌଣସି ପ୍ରତିକ୍ରିୟା ରଖିନାହାନ୍ତି । ନିୟମିତ ଅନୁସନ୍ଧାନର ଏକ ଅଂଶ ଭାବରେ, CFS ହଂକଂର ତିନୋଟି ଆଉଟଲେଟରୁ ଏହି ମସଲାର ଉତ୍ପାଦ ନେଇଥିଲା । ପରୀକ୍ଷା ପରେ ଜଣାପଡ଼ିଛି ଯେ, ଏହି ମସଲାରେ କୀଟନାଶକ ଓ ଏଥିଲୀନ ଅକ୍ସାଇଡ୍ ରହିଛି ବୋଲି କହିଛନ୍ତି ସିଏଫ୍ଏସ୍ ମୁଖପାତ୍ର । ତେବେ CFS ବିକ୍ରେତାମାନଙ୍କୁ ଏହି ମସଲା ବିକ୍ରୟ ବନ୍ଦ କରିବା ଏବଂ ଉତ୍ପାଦଗୁଡିକ ଅପସାରଣ କରିବା ପାଇଁ ନିର୍ଦ୍ଦେଶ ଦେଇ ସାରିଛି । ସିଏଫଏସ ଆହୁରି କହିଛି ଯେ ଏହି ଘଟଣାରେ ତଦନ୍ତ ଜାରି ରହିଛି ଏବଂ ଉପଯୁକ୍ତ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇପାରେ।
ସେହିପରି ସିଙ୍ଗାପୁର ଫୁଡ୍ ଏଜେନ୍ସି (SFA) ମଧ୍ୟ ଏଥିଲୀନ୍ ଅକ୍ସାଇଡ୍ର ମାତ୍ରା ‘ନିର୍ଦ୍ଧାରିତଠାରୁ ଅଧିକ’ ଥିବାରୁ ଏଭରେଷ୍ଟ୍ ଫିସ୍ କରୀ ମସଲାକୁ ପ୍ରତ୍ୟାହାର କରିବାକୁ ନିର୍ଦ୍ଦେଶ ଦିଆଯାଇଛି । SFA କହିଛି, ଯଦିଓ ‘ଏଥିଲୀନ୍ ଅକ୍ସାଇଡ୍ର ମାତ୍ରା କମ୍ ଥିବା ଖାଦ୍ୟ ଖାଇବା ଦ୍ୱାରା ତୁରନ୍ତ ବିପଦ ନାହିଁ କିନ୍ତୁ ଦୀର୍ଘ ସମୟ ପର୍ଯ୍ୟନ୍ତ ଏହାର ପ୍ରଭାବ ରହିଲେ ଜଟିଳ ସ୍ୱାସ୍ଥ୍ୟ ସମସ୍ୟା ସୃଷ୍ଟି କରିପାରେ ।
ଯେଉଁମାନେ ଏହି ମସଲା କିଣିଛନ୍ତି, ସେମାନେ ଏହାକୁ ବ୍ୟବହାର ନ କରିବାକୁ ପରାମର୍ଶ ଦେଇଛି SFA । ଯେଉଁମାନେ ବ୍ୟବହାର ପରେ ସେମାନଙ୍କ ସ୍ୱାସ୍ଥ୍ୟ ବିଷୟରେ ଚିନ୍ତା କରୁଛନ୍ତି ସେମାନେ ଡାକ୍ତରଙ୍କ ପରାମର୍ଶ କରିବା ଉଚିତ୍। ଆମେରିକାର ପରିବେଶ ସୁରକ୍ଷା ଏଜେନ୍ସି ଅନୁଯାୟୀ, ‘ଏଥିଲୀନ ଅକ୍ସାଇଡ୍ ମଣିଷ ଶରୀରରେ କର୍କଟ ରୋଗ ସୃଷ୍ଟି କରିଥାଏ’ ।
