LIVE TV
ଆମେରିକା ଦ୍ୱାରା ଦ ରେଜିଷ୍ଟେନ୍ସ ଫ୍ରଣ୍ଟ (TRF) କୁ ବିଦେଶୀ ଆତଙ୍କବାଦୀ ସଂଗଠନ ଏବଂ ସ୍ପେସିଆଲି ଡେଜିନେଟେଡ୍ ଗ୍ଲୋବାଲ୍ ଟେରରିଷ୍ଟ ଭାବେ ଘୋଷଣା କରାଯିବା ପରେ ଭାରତର ବୈଦେଶିକ ମନ୍ତ୍ରୀ ଏସ୍. ଜୟଶଙ୍କର ଏହାକୁ ସ୍ୱାଗତ କରିଛନ୍ତି । ଏହାକୁ ଭାରତ-ଆମେରିକା ମଧ୍ୟରେ ଆତଙ୍କବାଦ ବିରୋଧୀ ସହଯୋଗିତାର ଏକ ଦୃଢ ପ୍ରମାଣ ବୋଲି ବର୍ଣ୍ଣନା କରିଛନ୍ତି। ତାଙ୍କର ପ୍ରତିକ୍ରିୟାରେ ସେ ଏହି ପଦକ୍ଷେପ ପାଇଁ ଆମେରିକାର ବୈଦେଶିକ ମନ୍ତ୍ରୀ ମାର୍କୋ ରୁବିଓ ଏବଂ ଆମେରିକାର ରାଷ୍ଟ୍ର ବିଭାଗଙ୍କୁ ଧନ୍ୟବାଦ ଜଣାଇଛନ୍ତି । ଜୟଶଙ୍କର ତାଙ୍କର ଅଫିସିଆଲ ଏକ୍ସ ହ୍ୟାଣ୍ଡେଲରେ ପୋଷ୍ଟ କରି ଏହା କହିଛନ୍ତି ।
ଆତଙ୍କବାଦ ବିରୋଧରେ ଭାରତ ଓ ଆମେରିକାର ମିଳିତ ପ୍ରତିବଦ୍ଧତାକୁ ଗୁରୁତ୍ୱ ଦେଇଛନ୍ତି ଜୟଶଙ୍କର । ସେ କହିଛନ୍ତି ଯେ ଏହି ଘୋଷଣା ଆତଙ୍କବାଦ ବିରୁଦ୍ଧରେ "ଶୂନ୍ୟ ସହନଶୀଳତା" (Zero Tolerance for Terrorism) ନୀତିର ଏକ ପ୍ରମାଣ। ଏହା ଭାରତର ଦୀର୍ଘଦିନର ଆତଙ୍କବାଦ ବିରୋଧୀ ନୀତି ସହ ସମାନତା ରଖୁଛି । ସେ ପାକିସ୍ତାନ ସମର୍ଥିତ ଆତଙ୍କବାଦୀ ସଂଗଠନଗୁଡିକ ବିରୁଦ୍ଧରେ କଠୋର କାର୍ଯ୍ୟାନୁଷ୍ଠାନକୁ ସମର୍ଥନ କରିଛନ୍ତି ।
ଜୟଶଙ୍କର ତାଙ୍କ ପ୍ରତିକ୍ରିୟାରେ ଆମେରିକା ସହ ଭାରତର ଆତଙ୍କବାଦ ବିରୋଧୀ ସହଯୋଗିତାକୁ ଆହୁରି ମଜବୁତ କରିବାର ଆହ୍ୱାନ ରହିଛି । ସେ ଏହା ମଧ୍ୟ ଉଲ୍ଲେଖ କରିଥିଲେ ଯେ TRF କୁ ଆତଙ୍କବାଦୀ ସଂଗଠନ ଭାବେ ଘୋଷଣା କରିବା ଦ୍ୱାରା ଅନ୍ତର୍ଜାତୀୟ ସ୍ତରରେ ଏହାର ଆର୍ଥିକ ଓ ଲଜିଷ୍ଟିକ ସମର୍ଥନ ନେଟୱାର୍କକୁ ଦୁର୍ବଳ କରାଯାଇ ପାରିବ। ଏହା ପାକିସ୍ତାନର ଆଇଏସଆଇ ଏବଂ ଲସ୍କର-ଇ-ତୋଇବା ଭଳି ସଂଗଠନମାନଙ୍କ ଦ୍ୱାରା ପରିଚାଳିତ ଆତଙ୍କବାଦୀ କାର୍ଯ୍ୟକଳାପ ଉପରେ ଏକ ଶକ୍ତ ଆଘାତ ବୋଲି ବିବେଚନା କରାଯାଉଛି।
ପହଲଗାମ ଆକ୍ରମଣ ପାଇଁ TRF ନିଜକୁ ଦାୟୀ ବୋଲି ଘୋଷଣା କରିଥିଲା। ଏହି ଆକ୍ରମଣକୁ ୨୦୦୮ ମୁମ୍ବାଇ ଆକ୍ରମଣ ପରେ ଲସ୍କର-ଏ-ତୋଇବା ଦ୍ୱାରା କରାଯାଇଥିବା ସବୁଠାରୁ ଘାତକ ଆକ୍ରମଣ ବୋଲି କୁହାଯାଉଛି ।
ଭାରତ ଅନ୍ତର୍ଜାତୀୟ ମଞ୍ଚରେ TRF କୁ ଆତଙ୍କବାଦୀ ସଂଗଠନ ଭାବେ ଘୋଷଣା କରାଇବା ପାଇଁ ସକ୍ରିୟ ଭାବେ କାର୍ଯ୍ୟ କରୁଛି।
TRF ୨୦୧୯ରେ ଗଠିତ ହୋଇଥିଲା । ଲସ୍କର-ଇ-ତୋଇବାର ଏକ ପ୍ରକ୍ସି ଭାବେ କାର୍ଯ୍ୟ କରୁଛି । ଜମ୍ମୁ ଓ କାଶ୍ମୀରରେ ଅନେକ ଆତଙ୍କବାଦୀ ଆକ୍ରମଣ ପଛରେ ଏହି ଟିଆରଏଫର ହାତ ରହିଥିବା ଅଭିଯୋଗ ହେଉଛି ।
ଏହା ଅନଲାଇନ ମାଧ୍ୟମରେ ଯୁବକମାନଙ୍କୁ କଠୋରପନ୍ଥୀ କରାଇବା, ଆତଙ୍କବାଦ ପାଇଁ ନିଯୁକ୍ତ କରାଇବା କାମ କରୁଛି । ପାକିସ୍ତାନରୁ ଅସ୍ତ୍ରଶସ୍ତ୍ର ଓ ନିଶାଦ୍ରବ୍ୟ ଚୋରା ଚାଲାଣ କରିବାରେ ଜଡିତ ଥିବାର ମଧ୍ୟ ଅଭିଯୋଗ ରହିଛି । ପହଲଗାମ ଆକ୍ରମଣ ସାରା ବିଶ୍ୱରେ ଆଲୋଡନ ସୃଷ୍ଟି କରିଥିଲା ।
