LIVE TV
ଦିନରାତି ମେସିନ୍ ଚାଲିଛି । କାଠିରେ ମସଲା ଦିଆହୋଇ ବାହାରୁଛି ଧୂପ କାଠି । ଆଉ ମେସିନ୍ ସହ ତାଳ ଦେଇ କାମରେ ଲାଗିଛନ୍ତି ଯୁବତୀ । ରାୟଗଡା ଜିଲ୍ଲା ଗୁଣପୁରର ଧୂପ କାଠି ତିଆରିକୁ ନେଇ ଏବେ ସ୍ଥାନୀୟ ଅଂଚଳରେ ଭାରି ଚର୍ଚ୍ଚା । ଏ. ମଧୁସୂଦନ ନାମକ ଜଣେ ଯୁବକ ରାଜ ମିସ୍ତ୍ରୀଙ୍କ ପୁଅ । ମଧୁସୂଦନ ଗୁଣପୁରରେ ଏମସିଏ ପାଠ ପଢିବା ପରେ ହାଇଦ୍ରାବାଦର ଏକ ସଫ୍ଟୱେର କମ୍ପାନୀରେ କାମ କରି ଭଲ ଦୁଇ ପଇସା ରୋଜଗାର କରୁଥିଲେ।
ଅଧିକ ପଢ଼ନ୍ତୁ: ଲକ୍ଷପତି କଲା ରଙ୍ଗୀନ ମାଛ ଚାଷ
ହେଲେ କରୋନା କାଳରେ ଚାକିରି ଯିବାରୁ ଘରକୁ ଫେରିଥିଲେ । ଆଉ ଏହାରି ଭିତରେ ସେ ବିଟେକ୍ ପାଠ ବି ପଢିଲେ । କିନ୍ତୁ କେମିତି ଗାଁରେ ରହି ଭଲ ଦୁଇ ପଇସା ରୋଜଗାର କରିବେ ସେନେଇ ସବୁବେଳେ ଉଦ୍ୟମ କରୁଥିଲେ । ଖାଲି ଉଦ୍ୟମ କରୁଥିଲେ ତାହା ନୁହେଁ ବରଂ ୟୁଟ୍ୟୁବର ସାହାଯ୍ୟ ନେଇ ଧୂପକାଠି ତିଆରି କରିବା ଶିଖିଲେ।
Also Read
ୟୁଟ୍ୟୁବରୁ ଧୂପକାଠି ତିଆରି ଶିଖିବା ପରେ ନିଜସ୍ୱ ଖର୍ଚ୍ଚରେ ଘର ପାଖରେ ଏକ ମେସିନ ପକାଇଲେ । ଆଉ ଧୂପକାଠି ତିଆରି କରିବା ଆରମ୍ଭ କରିଥିଲେ । ଠିକ୍ ଏତିକିବେଳେ ତାଙ୍କୁ ବୁଷ୍ଟରଡୋଜ୍ ପରି କାମ ଦେଇଥିଲା ପିଏମଜିପି ସ୍କିମ୍ । ଏହି ସ୍କିମରୁ ସେ ନିଜର କ୍ଷୁଦ୍ରଶିଳ୍ପକୁ ଆଗକୁ ବଢାଇବା ସହିତ ସ୍ଥାନୀୟ ଅଂଚଳର ଯୁବକ ଓ ଯୁବତୀଙ୍କୁ ଦେଉଛନ୍ତି ରୋଜଗାର ।
ଗୁରୁତ୍ୱପୂର୍ଣ୍ଣ କଥା ହେଲା, ମଧୁସୂଦନଙ୍କ ଏହି କ୍ଷୁଦ୍ର ଶିଳ୍ପରେ କିଏ ଦଶମ ପାଠ ପଢିଛନ୍ତି ତ ଆଉ କିଏ +୨ । ହେଲେ ନିଜର ଗୁଜୁରାଣ ମେଣ୍ଟାଇବା ପାଇଁ ସମସ୍ତେ ଏଠାରେ ଏକ ହୋଇ କରୁଛନ୍ତି କାମ । ମୋଟ୍ ଉପରେ ଏଠାରେ କାମ କରୁଥିବା ସମସ୍ତେ ବେଶ୍ ଖୁସି ହେବା ସହିତ ଆଗାମୀ ଦିନରେ କେମିତି ଶିଳ୍ପ ବଢିବ ଏବଂ ଅଧିକ ରୋଜଗାର ହେବ ସେନେଇ ପ୍ରସ୍ତୁତ କରୁଛନ୍ତି ଯୋଜନା..।
(ଗୁଣପୁରରୁ ଇନ୍ଦ୍ରଜିତ୍ ପଣ୍ଡାଙ୍କ ରିପୋର୍ଟ)
