LIVE TV
H3N2 ଇନ୍ଫ୍ଲୁଏନ୍ଜା ନେଇ କେନ୍ଦ୍ର ସତର୍କ କରାଇବା ପରେ CDMOମାନଙ୍କୁ ଚିଠି ଲେଖିଲେ ରାଜ୍ୟ ସରକାର । H3N2 ସହ କୋଭିଡ୍ ସ୍ଥିତି ଉପରେ ନଜର ରଖିବା ସହ ସର୍ଭେଲାନ୍ସ, ଟେଷ୍ଟିଂ ବୃଦ୍ଧି, ଫିଭର କ୍ଲିନିକ୍ ଚାଲୁ ରଖିବାକୁ ଏଥିରେ କୁହାଯାଇଛି ।
ଏଥିସହିତ ଔଷଧ, ଅକ୍ସିଜେନ୍ ଓ ଆଇସିୟୁ ସ୍ଥିତି ନିୟମିତ ଅନୁଧ୍ୟାନ କରିବାକୁ ଦିଆଯାଇଛି ପରାମର୍ଶ । ଏହାରି ଭିତରେ ଦୀର୍ଘ ୧୧୩ ଦିନ ପରେ ଦେଶରେ ପୁଣିଥରେ ୫୦୦ ଟପିଛି ଦୈନିକ କୋଭିଡ୍ ସଂକ୍ରମଣ । ଏଣୁ କୋଭିଡ୍ ଅନୁରୂପ ନିୟମ ପାଳନ ଲାଗି ପରାମର୍ଶ ଦେଇଛନ୍ତି ସ୍ୱାସ୍ଥ୍ୟ ବିଶେଷଜ୍ଞ ।
H3N2 ଇନ୍ଫ୍ଲୁଏନ୍ଜା ନେଇ କେନ୍ଦ୍ର ଆଡଭାଇଜରି ଜାରି କରିବା ପରେ ତତ୍ପର ରାଜ୍ୟ
Also Read
ଚିଠିରେ କୁହାଯାଇଛି, କୋଭିଡ୍ ମାମଲା ବୃଦ୍ଧି ଉପରେ ନଜର ରଖ । ଟେଷ୍ଟ-ଟ୍ରାକ୍-ଟ୍ରିଟ୍-ଟିକାକରଣ ସହ କୋଭିଡ୍ ଅନୁକୂଳ ନିୟମ ଅନୁପାଳନ ଭଳି ୫ ସୂତ୍ରୀ ରଣନୀତି ଆପଣାଅ । ଏମିତିକି ଲକ୍ଷଣଯୁକ୍ତ ଚିକିତ୍ସାରେ ସଫଳ ନହୋଇ ସ୍ୱାସ୍ଥ୍ୟବସ୍ଥା ବିଗୁଡ଼ୁଥିବା ମାମଲାରେ କୋଭିଡ୍ ନେଗେଟିଭ ନମୁନାକୁ H1N1, H3N2 ଓ ଆଡେନୋଭାଇରସ୍ ଭଳି ପାଥୋଜେନ୍ ପରୀକ୍ଷା ଲାଗି RMRCକୁ ପଠାଅ ।
ଖାଲି ସେତିକି ନୁହେଁ, ଇନ୍ଫ୍ଲୁଏନ୍ଜା-Aର ଟେଷ୍ଟିଂ ଉଦ୍ଦେଶ୍ୟରେ ସିଡିଏମ୍ଓମାନେ RTPCR ଟେଷ୍ଟ୍ କିଟ୍ କିଣିବାକୁ ପରାମର୍ଶ ଦିଆଯାଇଛି । ଏହାବ୍ୟତୀତ କୋଭିଡ୍ ଅନୁରୂପ ନିୟମ ଅନୁପାଳନ ପାଇଁ ଲୋକଙ୍କ ମଧ୍ୟରେ ସଚେତନତା ସୃଷ୍ଟି କରିବାକୁ ମଧ୍ୟ ନିର୍ଦ୍ଦେଶ ଦିଆଯାଇଛି । ଏହାସହ ନିୟମିତ ବ୍ୟବଧାନରେ ଔଷଧ, ଅକ୍ସିଜେନ ଓ ଆଇସିୟୁ ସ୍ଥିତିର ଅନୁଧ୍ୟାନ ପାଇଁ କୁହାଯାଇଛି ।
H3N2କୁ ନେଇ ଚିନ୍ତା ବଢ଼ୁଥିବା ବେଳେ ଏପଟେ ଉପରମୁହାଁ କୋଭିଡ୍ ସଂକ୍ରମଣ । ଗତ
୨୪ ଘଣ୍ଟାରେ ଚିହ୍ନଟ ହୋଇଛନ୍ତି ୫୨୪ ନୂଆ କୋଭିଡ୍ ପଜିଟିଭ କେସ୍ । ଯାହାକି ବିଗତ ୧୧୩ ଦିନ ମଧ୍ୟରେ ସର୍ବାଧିକ । ଏହାପୂର୍ବରୁ ଗତ ନଭେମ୍ବର ମାସରେ ଦେଶରେ ଦୈନିକ ସଂକ୍ରମଣ ୫୦୦ ଟପିଥିଲା ।
ଏଥିସହ ଦେଶରେ ସକ୍ରିୟ କୋଭିଡ୍ ଆକ୍ରାନ୍ତଙ୍କ ସହ ୩ ହଜାର ୬୧୮ରେ ପହଞ୍ଚିଛି । ଯେହେତୁ ଏବେ H3N2 ବ୍ୟାପିବା ସହ କୋଭିଡ୍ ସଂକ୍ରମଣ ବଢ଼ିବାରେ ଲାଗିଛି, ଲୋକମାନେ ମାସ୍କ ପିନ୍ଧିବା ସହ ସାମାଜିକ ଦୂରତା ରକ୍ଷା କରିବା, ବାରମ୍ବାର ହାତ ଧୋଇବା ଭଳି କୋଭିଡ୍ ଅନୁରୂପ ନିୟମ ପାଳନକୁ ଗୁରୁତ୍ୱ ଦେଇଛନ୍ତି ସ୍ୱାସ୍ଥ୍ୟ ବିଶେଷଜ୍ଞ । ଗୋଟିଏ ପଟେ ଦେଶରେ H3N2 କେସ୍ ବଢ଼ୁଥିବା ବେଳେ ପୁଣିଥରେ ମୁଣ୍ଡ ଟେକିଲାଣି କୋଭିଡ୍ ଭାଇରସ୍ । ଏବେଠୁ ସତର୍କ ନହେଲେ ଆଗକୁ ଏହା ବଡ଼ ଚ୍ୟାଲେଞ୍ଜ ଆଣିବ ବୋଲି ମତ ଦେଲେଣି ବିଶେଷଜ୍ଞ ।
କଟକରୁ ପ୍ରଭାତ ବିଷୋୟୀ, ଭୁବନେଶ୍ୱରରୁ ହରିହର ଚାନ୍ଦ ଓ କପିଳେନ୍ଦ୍ର ପ୍ରଧାନଙ୍କ ରିପୋର୍ଟ, ଓଟିଭି
