LIVE TV
ଘରେ ଘରେ ମଟନ୍କୁ ନେଇ ବିଭିନ୍ନ ରେସିପି ତିଆରି କରାଯାଇଥାଏ । ଆଗରୁ ମଟନ୍ରେ ବହୁତ ରେସିପି ଆମେ ଆପଣଙ୍କ ପାଇଁ ପ୍ରସ୍ତୁତ କରିଛୁ। ଆଜି ଆମେ ଏକ ନୂଆ ଶୈଳୀରେ ମଟନ୍ର ଏକ ରେସିପି ବିଷୟରେ କହିବାକୁ ଯାଉଛୁ । ଏହି ରେସିପିର ନାଁ ହେଉଛି ‘ଦହି ମଟନ୍’ । ଏହି ରେସିପିଟି ଆପଣମାନେ ଅତ୍ୟନ୍ତ ସହଜ ଓ ସରଳ ଉପାୟରେ ଘରେ ବନେଇ ପାରିବେ । ତେବେ ଏହାକୁ କିଭଳି ପ୍ରସ୍ତୁତ କରାଯାଏ ଆସନ୍ତୁ ଜାଣିବା ।
ଦହି ମଟନ୍ ବନେଇବା ପାଇଁ ସାମଗ୍ରୀ:
ମଟନ୍, ବସାଦହି,କଟା ପିଆଜ, ଅଦା ପେଷ୍ଟ୍, ରସୁଣ ପେଷ୍ଟ,ହଳଦୀ ଗୁଣ୍ଡ,ଲଙ୍କା ଗୁଣ୍ଡ,ସୋରିଷ ତେଲ,ଲୁଣ ,ପାନ ମଧୁରୀ ଗୁଣ୍ଡ,ଡଲଚିନି ଗୁଣ୍ଡ, ଲବଙ୍ଗ,ଗୁଜରାତି ଗୁଣ୍ଡ,ହେଙ୍ଗୁ,ଧନିଆ ଗୁଣ୍ଡ,ଜରା ପାଉଡର
ପ୍ରସ୍ତୁତି ପ୍ରଣାଳୀ:
- ପ୍ରଥମେ ମଟନ୍କୁ ଭଲ ଭାବେ ଧୋଇ ସେଥିରେ ଅଳ୍ପ ଦହି, କଟା ପିଆଜ ଓ ଗୋଟେ ଚାମଚ ସୋରିଷ ତେଲ ପକାଇ ଗୋଳାଇ ଅଧଘଣ୍ଟାଏ ପର୍ଯ୍ୟନ୍ତ ଘୋଡାଇ ରଖି ଦିଅନ୍ତୁ ।
- ଏହାପରେ ଚୁଲିରେ କଡେଇ ବସାଇ ସେଥିରେ ସୋରିଷ ତେଲ ପକାନ୍ତୁ । ତେଲ ଗରମ ହେବା ପରେ ସେଥିରେ ଅଦା ଓ ରସୁଣ ପେଷ୍ଟ୍ ପକାନ୍ତୁ।
- ମସଲାକୁ କଷନ୍ତୁ, ମସଲା କଷି ଟିକେ ଲାଲ୍ ହେବା ପରେ ସେଥିରେ ହଳଦୀ ଗୁଣ୍ଡ, ଲଙ୍କା ଗୁଣ୍ଡ ଓ ହେଙ୍ଗୁ ପକାଇ ଗୋଳାଇ ଦିଅନ୍ତୁ ।
- ମସଲା ଅଳ୍ପ ହୋଇଯିବା ପରେ ଆଗରୁ ରଖାଯାଇଥିବା ଦହି,ପିଆଜ ଓ ମଟନର ମିଶ୍ରଣକୁ କଡେଇରେ ପକାଇ କଷନ୍ତୁ।
- ମଟନ୍ ଅଳ୍ପ କଷି ହେଲା ପରେ ସେଥିରେ ଡାଲଚିନି ଗୁଣ୍ଡ ଓ ପାନ ମଧୁରୀ ଗୁଣ୍ଡ, ଧନିଆ ଗୁଣ୍ଡ ସ୍ୱାଦ ଅନୁସାରେ ଲୁଣ ପକାଇ ଭଲ ଭାବେ କଷନ୍ତୁ।
- ଏହାପରେ ସେଥିରେ ଅଳ୍ପ ଦହି ପକାଇ ଗୋଳାଇ ଦିଅନ୍ତୁ। ଅଳ୍ପ ସମୟ କଷିବା ପରେ ସେଥିରେ ପାଣି ଦେଇ ଘୋଡ଼େଇ ଦିଅନ୍ତୁ।
- ମଟନ୍ ସିଝି ଯିବା ପରେ ସେଥିରେ ଗୁଜରାତି ଗୁଣ୍ଡ ଓ ଲବଙ୍ଗ ପକାନ୍ତୁ। ଏହାପରେ ଚୁଲିକୁ ବନ୍ଦ କରି ଦିଅନ୍ତୁ ।
ଏବେ ପ୍ରସ୍ତୁତ ହୋଇଗଲା ସୁଆଦିଆ ‘ଦହି ମଟନ୍’। ଏହି ରେସିପିଟିକୁ ରୁଟି ବା ପରଟା ସହିତ ଖାଇଲେ ବେଶୀ ସୁଆଦିଆ ଲାଗିଥାଏ । ଏହି ରେସିପିଟିତୁ ନିଜେ ଖାଆନ୍ତୁ ଓ ଘର ଲୋକଙ୍କୁ ପରଷନ୍ତୁ ।
