LIVE TV
ପ୍ରୟାଗରାଜ ମହାକୁମ୍ଭ କେବଳ ବିଶ୍ବର ସର୍ବବୃହତ ଆଧ୍ୟାତ୍ମିକ ସମାଗମ ନୁହେଁ, ବିଶ୍ବ ରେକର୍ଡର ବି ଅଧିକାରୀ ହୋଇଛି । ତିନି ତିନିଟି ଗିନିଜ୍ ବୁକ୍ ଅଫ୍ ୱାର୍ଲ୍ଡ ରେକର୍ଡର ଅଧିକାରୀ ହୋଇଛି ୨୦୨୫ ମହାକୁମ୍ଭ । ଆଜି ଗିନିଜ୍ ୱାର୍ଲ୍ଡ ରେକର୍ଡର ଟିମ୍ ଏକ ସ୍ବତନ୍ତ୍ର ସଭାରେ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କୁ ବିଧିବଦ୍ଧ ଭାବେ ସାର୍ଟିଫିକେଟ୍ ପ୍ରଦାନ କରିଛନ୍ତି ।
ମହାକୁମ୍ଭରେ ୩ଟି କ୍ଷେତ୍ରରେ ବିଶ୍ବ ରେକର୍ଡ ହୋଇଛି । ସବୁଠୁ ଅଧିକ ଲୋକଙ୍କ ଦ୍ବାରା ଏକାଠି ନଦୀର ସଫେଇ ଅଭିଯାନ, ସବୁଠୁ ଅଧିକ ଲୋକଙ୍କ ଦ୍ବାରା ଏକାଠି ଗୋଟିଏ ସ୍ଥାନରେ ସଫେଇ ଏବଂ ୮ ଘଣ୍ଟାରେ ସବୁଠୁ ଅଧିକ ଲୋକଙ୍କ ଦ୍ବାରା ହ୍ୟାଣ୍ଡ୍ ପେଣ୍ଟିଂ ଭଳି ତିନିଟି ରେକର୍ଡ କରିଛି ମହାକୁମ୍ଭ । ସୂଚନା ଅନୁସାରେ, ୪୫ ଦିନ ଧରି ଚାଲିଥିବା ମହାକୁମ୍ଭ ବେଳେ, ପ୍ରୟାଗରାଜର ୩୨୯ଟି ସ୍ଥାନରେ ଗଙ୍ଗା ନଦୀର ସଫେଇ ହୋଇଥିଲା । ୧୯ହଜାର ଲୋକ ଏକାଠି ମହାକୁମ୍ଭରେ ଝାଡ଼ୁ ମାରିଥିଲେ । ଏଥିସହ ରେକର୍ଡ ସୃଷ୍ଟିକାରୀ ହ୍ୟାଣ୍ଡ୍ ପେଣ୍ଟିଂରେ ଏକାଠି ୧୦ ହଜାର ୧୦୨ ଜଣ ଲୋକ ସାମିଲ ହୋଇଥିଲେ ।
Also Read
ତେବେ କେବଳ ଏତିକି ନୁହେଁ, ମହାକୁମ୍ଭରେ ଆହୁରି ଅନେକ କିର୍ତ୍ତୀମାନ ସ୍ଥାପିତ ହୋଇଛି । ଏଥିରେ ସାମିଲ ହୋଇଥିବା ୬୬ କୋଟିରୁ ଅଧିକ ଶ୍ରଦ୍ଧାଳୁ , ଭାରତର ପ୍ରାୟ ଅଧା ଜନସଂଖ୍ୟା । କେବଳ ଭାରତ ଓ ଚୀନ୍ କୁ ବାଦ୍ ଦେଲେ, ବାକି ଯେକୌଣସି ଦେଶର ଜନସଂଖ୍ୟା ଠାରୁ ଅଧିକ ଲୋକ ମହାକୁମ୍ଭରେ ସାମିଲ ହୋଇଥିଲେ ।
୭୦ଟି ଦେଶରୁ ୫୦ ଲକ୍ଷରୁ ଅଧିକ ବିଦେଶୀ ଶ୍ରଦ୍ଧାଳୁ ଓ ପର୍ଯ୍ୟଟକ ମହାକୁମ୍ଭକୁ ଆସିଥିଲେ । ୧୬ ହଜାର ଟ୍ରେନ୍ରେ ପ୍ରାୟ ୫ କୋଟି ଶ୍ରଦ୍ଧାଳୁ ପ୍ରୟାଗରାଜ ଆସିଥିଲେ । ଆଜି ପ୍ରୟାଗରାଜ ରେଲୱେ ଷ୍ଟେସନକୁ ଯାଇ ସେଠାରେ ରେଳକର୍ମଚାରୀଙ୍କୁ ଭେଟିବା ସହ, ମହାକୁମ୍ଭ ସଫଳତାର ସହ ଶେଷ ହୋଇଥିବାରୁ ସମସ୍ତଙ୍କୁ ଧନ୍ୟବାଦ ଜଣାଇଛନ୍ତି ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ।
ସୂଚନାଯୋଗ୍ୟ ଶେଷ ଦିନ ଅର୍ଥାତ୍ ଜାନୁଆରୀ ୨୬ରେ ଦେଶ ବିଦେଶରୁ ପ୍ରୟାଗରାଜକୁ ଛୁଟିଥିଲା ଶ୍ରଦ୍ଧାଳୁ ଓ ସାଧୁ ସନ୍ଥଙ୍କ ଭିଡ । କିଏ ପରିବାର ସହ ସ୍ନାନ କରିଥିଲା ତ କିଏ ସଙ୍ଗମରେ ବୁଡ ପକାଇ ସମ୍ପର୍କୀୟଙ୍କ ପାଇଁ ବୋହି ନେଇଥିଲା ପବିତ୍ର ପାଣି । ମହାକୁମ୍ଭର ଶେଷ ଦିନରେ ବିଭିନ୍ନ ଘାଟରେ ଶାନ୍ତି ଶୃଙ୍ଖଳାର ସହ ବୁଡ଼ ପକାଇଥିଲେ ଦେଢ କୋଟିରୁ ଅଧିକ ଶ୍ରଦ୍ଧାଳୁ ।
