ଧରାବତରଣ କଲେ ପ୍ରଭୁ ଯୀଶୁ; ଝଟକୁଛି ଚର୍ଚ୍ଚ

ଧରାବତରଣ କଲେ ପ୍ରଭୁ ଯୀଶୁ । ନୂଆ ଦିଶା, ନୂଆ ରାହା ଦେଖାଇବାକୁ ପୃଥିବୀ ପୃଷ୍ଠକୁ ଓହ୍ଲାଇଛନ୍ତି । ଆଜିର ଦିନକୁ ବଡ଼ ଦିନ ଭାବେ ପାଳନ କରାଯାଉଛି । ବିଶ୍ୱର କୋଣ ଅନୁକୋଣରେ ରହୁଥିବା କୋଟି କୋଟି ଖ୍ରୀଷ୍ଟ ଧର୍ମାବଳମ୍ବୀ ଏହାକୁ ପାଳନ କରୁଛନ୍ତି । ଦେଶର ବିଭିନ୍ନ ସ୍ଥାନରେ ବି ଆଜି ମଧ୍ୟରାତ୍ରୀରୁ ସ୍ୱତନ୍ତ୍ର କାର୍ଯ୍ୟକ୍ରମ ହୋଇଛି ।

ଯୀଶୁଙ୍କ ଆଗମନ ପୂର୍ବରୁ ଖ୍ରୀଷ୍ଟ ଧର୍ମାବଲମ୍ବୀ ଭାଇ ଭଉଣୀ ମାନେ ପ୍ରଭୁଙ୍କ ଉଦ୍ଦେଶ୍ୟରେ ଉପାସନା କରିବା ସହିତ ଖ୍ରୀଷ୍ଟମାସ ଟ୍ରି ପାଳନ କରିଛନ୍ତି । କନ୍ଧମାଳ ଜିଲ୍ଲାର ବିଭିନ୍ନ ଚର୍ଚ୍ଚରେ ଖ୍ରୀଷ୍ଟମାସ ଟ୍ରି ପାଳନ ବଡ଼ ଧୁମଧାମରେ ସରିଛି । ଫୁଲବାଣୀର ବାପଟିଷ୍ଟ ଚର୍ଚ୍ଚରେ ଖ୍ରୀଷ୍ଟ ବିଶ୍ୱାସୀ ମାନେ ଏକାଠି ହୋଇ ସମୂହ ପ୍ରାର୍ଥନା କରିଥିଲେ । ସାନ୍ତାକ୍ଲୁଜ୍ ଚର୍ଚ୍ଚକୁ ଆସି ସମସ୍ତଙ୍କ ସହ ନାଚ ଗୀତ କରି ଛୋଟ ପିଲାମାନଙ୍କୁ ଉପହାର ବାଣ୍ଟିଥିଲେ ।

ସେହିପରି ଭୁବନେଶ୍ୱରରେ ଥିବା ଚର୍ଚ୍ଚ ଗୁଡ଼ିକରେ ଶ୍ରଦ୍ଧାଳୁମାନଙ୍କ ଭିଡ଼ ଦେଖିବାକୁ ମିଳିଛି । ସବୁଠି ଦେଖିବାକୁ ମିଳୁଛି ସୁନ୍ଦର ସୁନ୍ଦର ଆଲୋକମାଳା । ଭୁବନେଶ୍ୱର ସତ୍ୟନଗରର କ୍ୟାଥଲିକ ଚର୍ଚ୍ଚ ସଜେଇ ହୋଇଛି ରଙ୍ଗୀନ ଆଲୋକରେ । ପ୍ରଭୁ ଯୀଶୁଙ୍କ ଜନ୍ମଦିନ ପାଇଁ ଏଠିବି ଜୋରସୋରରେ ପ୍ରସ୍ତୁତି ଚାଲିଛି ।

ଷ୍ଟିଲ୍‌ସିଟି ରାଉରକେଲାରେ ବି ଝଟକୁଛି ବିଭିନ୍ନ ଚର୍ଚ୍ଚ । ଖ୍ରୀଷ୍ଟମାସ ପାଳନ ଲାଗି ବ୍ୟାପକ ପ୍ରସ୍ତୁତି କରାଯାଇଛି । ଶ୍ରଦ୍ଧାଳୁଙ୍କ ଭିଡ଼ ମଧ୍ୟ ଲାଗି ରହିଛି । ରାଜ୍ୟ ବହାର କଥା କହିବାକୁ ଗଲେ ଦିଲ୍ଲୀ, ମୁମ୍ବାଇ, କୋଲକାତା, ଚେନ୍ନାଇ, କୋଚି, ହିମାଚଳପ୍ରଦେଶର ଚର୍ଚ୍ଚରେ ପ୍ରଭୁଙ୍କୁ ଆରାଧନା କରାଯାଇଛି ।