• Facebook
  • Twitter
  • Instagram
  • LinkedIn
  • Youtube
  • Telegram
  • Koo
  • Read in English
Satyendu Shekher Mishra

କଟକ ଜିଲ୍ଲା ମାହାଙ୍ଗା ଅଞ୍ଚଳରେ ଶହଶହ ବର୍ଷ ଧରି ମହାଆଡ଼ମ୍ବରରେ ପାଳନ କରାଯାଉଛି ଭାଗବତ ମେଳଣ । ଆଉ ଏହି ମେଳଣ ଦେଖିବା ପାଇଁ ଶ୍ରଦ୍ଧାଳୁଙ୍କ ସୁଅ ଛୁଟିଛି । କରୋନା ପାଇଁ ଗତ ଦୁଇ ବର୍ଷ ହେଲା ଏ ପରମ୍ପରା ପାଳନ ହୋଇନଥିବା ବେଳେ ଏଥର କିନ୍ତୁ ଧୁମଧାମରେ ପାଳନ କରାଯାଇଛି । 

ଠାକୁରଙ୍କ ସାମ୍ନାରେ ହାଣ୍ଡି ହାଣ୍ଡି ଭୋଗରାଗ ସଜେଇ ରଖାଯାଇଥାଏ । ଧାଡ଼ିକି ଧାଡ଼ି ବିମାନ ଦଣ୍ଡାୟମାନ । ଭଜନ କିର୍ତ୍ତନ ସାଙ୍ଗକୁ ନାମ ସଙ୍କିର୍ତ୍ତନ । ଏମିତି ଦୃଶ୍ୟ ଦେଖିବାକୁ ମିଳିଛି ସେହି ମାହାଙ୍ଗାରେ । ଆପଣ ଏହି କଥା ଶୁଣି ଭାବୁଥିବେ ଦୋଳ ମେଳଣ କଥା । କିନ୍ତୁ ନା । ଏ ହେଉଛି କଟକ ଜିଲ୍ଲା ମାହାଙ୍ଗାରେ କାହୁଁ କେଉଁ କାଳରୁ ପାଳିତ ହୋଇ ଆସୁଥିବା ଭାଗବତ ମେଳଣ । ଏଠି ପ୍ରତିଟି ବିମାନରେ ବିଜେ ହୋଇଛନ୍ତି ପ୍ରଭୁ ଜଗନ୍ନାଥ । ସାଥିରେ ଅଛନ୍ତି ଭାଗବତ । ଏହି ମେଳଣକୁ ଦାଣ୍ଡପିଣ୍ଡାରେ ମା ମାଉସୀ ମନ ଆନନ୍ଦରେ ଦେଖୁଥିବା ବେଳେ କୁନି ପିଲାଏ ମଧ୍ୟ ଖୋଳ କିର୍ତ୍ତନରେ ମଜ୍ଜିଥାନ୍ତି ।

ପବିତ୍ର କାର୍ତ୍ତିକ ପୂର୍ଣ୍ଣିମାରୁ ଭାଗବତ ମେଳଣ ଆରମ୍ଭ ହୋଇ ଅଷ୍ଟମୀରେ ସମାପନ ହେଉଥିବା ବେଳେ ଏଥର ଏ ଅଞ୍ଚଳରେ ବ୍ୟାପକ ଆୟୋଜନ ହୋଇଛି । ଦିନ ସାରା ଭଜନ କିର୍ତ୍ତନ ସାଙ୍ଗକୁ ରାତିରେ ମନୋରଞ୍ଜନ ପାଇଁ ଏକାଧିକ ସାଂସ୍କୃତିକ କାର୍ଯ୍ୟକ୍ରମ ଆୟୋଜନ କରାଯାଇଛି । ବାଜା ବାଣ ରୋଷଣୀ ସାଙ୍ଗକୁ ଝିକିମିକି ଆଲୁଅରେ ଝଲସୁଛି ବିମାନ । ପ୍ରତିଦିନ ବିମାନରେ ମହାପ୍ରଭୁ ଘର ଘର ବୁଲି ଭୋଗ ଖାଆନ୍ତି । ଗୋଟିଏ ଗାଁରେ ମେଳଣ ସାରିଲେ ଆର ଗାଁରେ ସମାନ ଢଙ୍ଗରେ ମେଳଣ ଅନୁଷ୍ଠିତ ହୁଏ । ସ୍ଥାନୀୟ ଲୋକଙ୍କ କହିବା ଅନୁସାରେ ଏହା ଭାଗବତର ପ୍ରଚାର ପ୍ରସାର ସହିତ ଭାଇଚାରାର ଏକ ସମୃଦ୍ଧ ପରମ୍ପରା ବହନ ।

(ରିପୋର୍ଟ- ମନୋଜ ଆଚାର୍ଯ୍ୟ, ସାଲେପୁର)

Other Stories