Operation Sindoor: ଯୁଦ୍ଧ ଏବେ ଆରମ୍ଭ ହେଉଛି, ମିଶନ ସମାପ୍ତ ନ ହେବା ପର୍ଯ୍ୟନ୍ତ ଅଟକିବ ନାହିଁ: ରଜନୀକାନ୍ତ

ପହଲଗାମ ଆକ୍ରମଣ ପରେ, ଭାରତ 'ଅପରେସନ ସିନ୍ଦୂର' ମାଧ୍ୟମରେ ପାକିସ୍ତାନରେ ଆତଙ୍କବାଦୀ ଆଡ୍ଡାଗୁଡ଼ିକ ଉପରେ କ୍ଷେପଣାସ୍ତ୍ର ଆକ୍ରମଣ କରିଛି। ମଙ୍ଗଳବାର ବିଳମ୍ବିତ ରାତିରେ ଭାରତୀୟ ସେନା ଦ୍ୱାରା ଏହି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି। ଏହି ଅପରେସନକୁ ନେଇ ସାଉଥ୍ ଶିଳ୍ପର ସେଲିବ୍ରିଟିମାନେ ସୋସିଆଲ ମିଡିଆରେ ଭାରତୀୟ ସେନାର ପ୍ରଶଂସା କରିଛନ୍ତି।

ସାଉଥ୍ ସୁପର୍‌ଷ୍ଟାର୍‌ ଚିରଞ୍ଜିବୀ କୋନିଡେଲା ତାଙ୍କ ଏକ୍ସ ଆକାଉଣ୍ଟରେ 'ଅପରେସନ୍ ସିନ୍ଦୂର'ର ପୋଷ୍ଟର ଶେୟାର କରିଛନ୍ତି ଏବଂ କ୍ୟାପ୍‌ସନ୍‌ରେ 'ଜୟ ହିନ୍ଦ୍‌' ଲେଖିଛନ୍ତି। ଏହା ବ୍ୟତୀତ ସେ ତ୍ରିରଙ୍ଗା ଇମୋଜୀ ମଧ୍ୟ ଶେୟାର କରିଛନ୍ତି।

ସେହିପରି, 'ପୁଷ୍ପା' ଅଭିନେତା ଅଲ୍ଲୁ ଅର୍ଜୁନ ମଧ୍ୟ ତାଙ୍କ ଏକ୍ସ ଆକାଉଣ୍ଟରେ 'ଅପରେସନ୍ ସିନ୍ଦୂର'ର ପୋଷ୍ଟର ଶେୟାର କରି କ୍ୟାପ୍‌ସନ୍‌ରେ ଲେଖିଛନ୍ତି – “ନ୍ୟାୟ ମିଳିବା ନିହାତି ଦରକାର, ଜୟ ହିନ୍ଦ୍‌।” ଏହା ସହ ସେ ତ୍ରିରଙ୍ଗା ଇମୋଜୀ ମଧ୍ୟ ଶେୟାର କରିଛନ୍ତି।

ଅଧିକ ପଢ଼ନ୍ତୁ: 'ଅପରେସନ୍ ସିନ୍ଦୂର' ପାଇଁ ପୂରା ବଲିଉଡ୍‌ରେ ଖୁସି; କ’ଣ କହିଲେ ସେଲିବ୍ରିଟି ଜାଣନ୍ତୁ

ପ୍ରସିଦ୍ଧ ଅଭିନେତା ଜୁନିଅର ଏନ୍‌ଟିଆର୍‌ ତାଙ୍କ ପୋଷ୍ଟରେ ଲେଖିଛନ୍ତି, “ମୁଁ ଆମ ଭାରତୀୟ ସେନାର ସୁରକ୍ଷା ଏବଂ ଶକ୍ତି ପାଇଁ ପ୍ରାର୍ଥନା କରୁଛି।” ଏହା ସହିତ, ସେ ହ୍ୟାସ୍‌ଟ୍ୟାଗ୍ 'ଅପରେସନ୍ ସିନ୍ଦୂର' ଲେଖିଛନ୍ତି।

ସୁପର୍‌ଷ୍ଟାର୍‌ ରଜନୀକାନ୍ତ ଲେଖିଛନ୍ତି – “ଯୋଦ୍ଧାଙ୍କ ଯୁଦ୍ଧ ଏବେ ଆରମ୍ଭ ହେଉଛି, ମିଶନ ସମାପ୍ତ ନ ହେବା ପର୍ଯ୍ୟନ୍ତ ଅଟକିବ ନାହିଁ! ସାରା ଦେଶ ଆପଣଙ୍କ ସହିତ ଅଛି।” ସେ ତାଙ୍କ ପୋଷ୍ଟରେ ପିଏମ୍‌ଓ ଏବଂ ଗୃହ ମନ୍ତ୍ରଣାଳୟକୁ ଟ୍ୟାଗ୍ କରିଛନ୍ତି।

ପ୍ରସିଦ୍ଧ ଦକ୍ଷିଣ ଭାରତୀୟ ଚଳଚ୍ଚିତ୍ର ଅଭିନେତ୍ରୀ କାଜଲ ଅଗ୍ରୱାଲ ତାଙ୍କ ଇନ୍‌ଷ୍ଟାଗ୍ରାମ୍‌ ପୋଷ୍ଟରେ ଲେଖିଛନ୍ତି, “ଭାରତ ମାତା କୀ ଜୟ.. ଆମେ ଭାରତୀୟ ସେନା ସହିତ ଅଟଳ ଏକତାରେ ଠିଆ ହୋଇଛୁ। ଏହି ଚ୍ୟାଲେଞ୍ଜିଂ ସମୟରେ ଏକତା ରଖିବାକୁ ଆମେ ଭାରତର ପ୍ରତ୍ୟେକ ନାଗରିକଙ୍କୁ ନିବେଦନ କରୁଛୁ।”

ସେ ପୁଣି କହିଛନ୍ତି, “ଆମର ସଶସ୍ତ୍ର ବାହିନୀକୁ ସମର୍ଥନ କରନ୍ତୁ, ରାଷ୍ଟ୍ରର ନିଷ୍ପତ୍ତି ଉପରେ ବିଶ୍ୱାସ କରନ୍ତୁ ଏବଂ ଏକ ହୋଇ ଛିଡ଼ା ହୁଅନ୍ତୁ। ‘ଏକ ଭାରତ, ଆମେ ଭାରତ’। ଆମେ ଭାରତୀୟ ଏବଂ ଏକାଠି ଆମେ ଆମର ମାତୃଭୂମିକୁ ନିର୍ମାଣ ଏବଂ ସୁରକ୍ଷା କରୁ। ଯେତେବେଳେ ଆମ ରାଷ୍ଟ୍ର ଆମକୁ ଡାକେ, ଆମକୁ ଶକ୍ତି, ଏକତା ଏବଂ ଉଦ୍ଦେଶ୍ୟ ସହିତ ଆଗକୁ ଆସିବାକୁ ପଡିବ। ଭାରତ ମାତା କୀ ଜୟ!”

ପ୍ରକାଶଥାଉ ଯେ ୨୨ ଏପ୍ରିଲରେ ଜମ୍ମୁ-କାଶ୍ମୀରର ପହଲଗାମରେ ହୋଇଥିବା ଆତଙ୍କବାଦୀ ଆକ୍ରମଣରେ ୨୬ ଜଣ ନିରୀହ ଲୋକ ପ୍ରାଣ ହରାଇଥିଲେ। ଏହି ଆକ୍ରମଣକୁ ନେଇ, ସାଧାରଣ ଲୋକ ଏବଂ ଚଳଚ୍ଚିତ୍ର ଶିଳ୍ପର ଅନେକ ସେଲିବ୍ରିଟି ଏହାକୁ ନିନ୍ଦା କରିଥିଲେ ଏବଂ ଏହାକୁ ଆତଙ୍କବାଦୀଙ୍କ ଏକ କାପୁରୁଷ କାର୍ଯ୍ୟ ବୋଲି କହିଥିଲେ।

ଏହି କାପୁରୁଷ ଆକ୍ରମଣର ପ୍ରାୟ ୨ ସପ୍ତାହ ପରେ, ଭାରତୀୟ ସେନା ୯ଟି ଆତଙ୍କବାଦୀ ଆଡ୍ଡା ଉପରେ ଆକ୍ରମଣ କରି ସେଗୁଡ଼ିକୁ ଧ୍ୱଂସ କରିଦେଇଛନ୍ତି। ପାକିସ୍ତାନ ନିଜେ ସ୍ୱୀକାର କରିଛି ଯେ ଭାରତ ଏକ ଏୟାର୍ ଷ୍ଟ୍ରାଇକ୍ କରିଛି। ତେବେ ସେ ସାଧାରଣ ଲୋକ ହୁଅନ୍ତୁ କି ଦେଶର ବିଶେଷ ଲୋକ, ସମସ୍ତେ ଏହି ସାମରିକ କାର୍ଯ୍ୟାନୁଷ୍ଠାନ ପାଇଁ ଗର୍ବିତ।

ଅଧିକ ପଢ଼ନ୍ତୁ: ପାକିସ୍ତାନରେ ବଡ଼ ଏୟାରଷ୍ଟ୍ରାଇକ୍‌, ମିସାଇଲ୍ ମାଡ଼ରେ ଛାରଖାର୍‌ ଆତଙ୍କୀ ଆଡ୍ଡା