LIVE TV
ପୁରୁଣା ଜମାନାର ଅଭିନେତାମାନେ ଜୀବନର ଅପରାହ୍ନରେ ସଂଘର୍ଷ କରିବାର କାହାଣୀ କିଛି ନୂଆ ନୁହେଁ । ଷାଠିଏ ଦଶକର ସେମିତି ଜଣେ ଭେଟେରାନ ଅଭିନେତା ଥିଲେ, ଯିଏକି ନିଜ କ୍ୟାରିୟରରେ ୫୦୦ରୁ ଊର୍ଦ୍ଧ୍ୱ ହିଟ୍ ଫିଲ୍ମ କରିବା ସତ୍ତ୍ୱେ ଗୁରୁତର ଆର୍ଥିକ ସଙ୍କଟର ସାମ୍ନା କରିଥିଲେ । ତାଙ୍କ ମୁଣ୍ଡ ଉପରେ ନିଜର ଛାତ ନଥିଲା । ଭଡା ଘରେ ରହୁଥିଲେ, ଯେଉଁଠି ବିଜୁଳି ଆଲୁଅ ନଥିଲା । ବଡ଼ ବଡ଼ ହିଟ୍ ଫିଲ୍ମ କରୁଥିବାବେଳେ ତାଙ୍କ ପୁଅ ଷ୍ଟ୍ରିଟ୍ଲାଇଟ ତଳେ ବସି ପାଠ ପଢୁଥିଲେ । ସେହି ବର୍ଷିଆନ ଅଭିନେତା ଜଣକ ହେଲେ ମୁରାଦ ।
ଅଭିନେତା ମୁରାଦଙ୍କୁ ଅମିତାଭ ବଚ୍ଚନଙ୍କ ଭଳି ଭାରତୀୟ ଚଳଚ୍ଚିତ୍ର ଜଗତର ବହୁ ଭେଟେରାନ ଅଭିନେତାଙ୍କ କୋ-ଷ୍ଟାର ଭାବେ ଦେଖାଯାଇଛି । 'ମୋଗଲ-ଏ-ଆଜାମ', 'ଦୋ ବୀଘା ଜମିନ୍' ଭଳି ସୁପରହିଟ୍ ଚଳଚ୍ଚିତ୍ରରେ ସେ ଅଭିନୟ କରି ଲୋକପ୍ରିୟତା ସାଉଁଟିଛନ୍ତି । କିନ୍ତୁ ଏହି ପ୍ରସିଦ୍ଧି ସତ୍ତ୍ୱେ ତାଙ୍କ ଜୀବନ କେମିତି ଗ୍ଲାମରଠୁ ଦୂରରେ ଥିଲା ତାହା ବଖାଣିଛନ୍ତି ମୁରାଦଙ୍କ ପୁଅ ତଥା ବଲିଉଡର ଜଣାଶୁଣା ଅଭିନେତା ରାଜା ମୁରାଦ ।
Also Read
ଅଧିକ ପଢନ୍ତୁ: ଫିଲ୍ମର ମୋସନ ପୋଷ୍ଟର ରିଲିଜ, ପସନ୍ଦ ଆସୁଛି ଭାଇଜାନଙ୍କ ଦମଦାର ଲୁକ୍
'ଫିଲ୍ମି ଚର୍ଚ୍ଚା' ୟୁଟ୍ୟୁବ ଚ୍ୟାନେଲରେ ରାଜା ମୁରାଦ ଭୋପାଳରେ ନିଜ ପିଲାଦିନର ସଂଘର୍ଷ ବଖାଣିଥିଲେ । କିପରି ତାଙ୍କ ବାପାଙ୍କ ଲମ୍ବା ଓ ସଫଳ ସିନେମା କ୍ୟାରିୟର ସତ୍ତ୍ୱେ ବି ପରିବାର ଆର୍ଥିକ ସଙ୍କଟରେ ଯୁଝି ହେଉଥିଲା କହିଥିଲେ । ରାଜା ମୁରାଦ କହିଥିଲେ, ''ମୁଁ ଜୀବନରେ ଖୁବ୍ କଠିନ ସମୟ ଦେଖିଛି । ପିଲାଦିନେ ଆମ ଘରେ ବିଜୁଳି ନଥିଲା । ପରୀକ୍ଷା ସମୟରେ ମୁଁ ଷ୍ଟ୍ରିଟଲାଇଟ ତଳେ ବସି ପାଠ ପଢୁଥିଲି । ମଧ୍ୟରାତ୍ରିରୁ ପଢା ଆରମ୍ଭ କରି ସକାଳ ୬ଟା ଯାଏଁ ପଢୁଥିଲି ।''
ମୁରାଦ ଯେତେବେଳେ ମାଳ ମାଳ ହିଟ୍ ଫିଲ୍ମରେ କାମ କରୁଥିଲେ, ସେ ସମୟରେ ତାଙ୍କ ପୁଅ ଯେ, ଷ୍ଟ୍ରିଟଲାଇଟ ତଳେ ପରୀକ୍ଷା ପ୍ରସ୍ତୁତି କରିବା କଥା ସହଜ ବିଶ୍ୱାସ ନ ହୋଇପାରେ ।
ମୁରାଦ 'ଦେବଦାସ' (୧୯୫୫), 'ସନ୍ନ୍ୟାସୀ', 'ୟାଦୋଁ କି ବାରାତ', 'ତାରଜନ ଗୋଜ୍ ଟୁ ଇଣ୍ଡିଆ' (୧୯୬୨) ଆଦି ବହୁ ହିଟ୍ ଚଳଚ୍ଚିତ୍ରରେ ଅଭିନୟ ପାଇଁ ପ୍ରଶଂସା ସାଉଁଟିଥିଲେ । କିନ୍ତୁ ନିଜର ହିଟ୍ ଫିଲ୍ମ କ୍ୟାରିୟରେ ଗୋଟିଏ ଘର କି ଚାରିଚକିଆ ଗାଡିଟିଏ କିଣି ପାରିନଥିଲେ । ତାଙ୍କ ପରିବାର ଭଡ଼ା ଘରେ ରହୁଥିଲେ ।
ପଚାଶ ଓ ଷାଠିଏ ଦଶକର ଅନେକ କଳାକାର ନିଜର ଭବିଷ୍ୟତ ପାଇଁ ବିଶେଷ ଯତ୍ନବାନ ରହୁନଥିଲେ ବୋଲି କହିଛନ୍ତି ରାଜା ମୁରାଦ । ଏଥିସହ ସବୁ କଳାକାରମାନେ ନିଜର ଭବିଷ୍ୟତ ଯୋଜନା କରିବା ଆବଶ୍ୟକ ବୋଲି ସେ ପରାମର୍ଶ ଦେଇଛନ୍ତି । ତେବେ ରାଜା ନିଜ ବାପାଙ୍କୁ ଆଦୌ ସମାଲୋଚନା କରିନାହାନ୍ତି । ତାଙ୍କ ବାପା ଯେମିତି ଚାହୁଁଥିଲେ ବଞ୍ଚୁଥିଲେ ବୋଲି ସେ କହିଛନ୍ତି ।
ଭେଟେରାନ ମୁରାଦଙ୍କ କାହାଣୀ ଦର୍ଶାଏ- ଫେମସ୍ ହେବାର ଅର୍ଥ ଧନୀ ହେବା ନୁହେଁ ।
