LIVE TV
ସାମ୍ସ ଆଡମିଶନରେ ଜାଲିଆତି ଅଭିଯୋଗ । ପିଜି ସିଟ୍ରେ ଇ-ଆଡମିଶନ ବଦଳରେ ଅଫ୍ ଲାଇନ୍ ମୋଡ୍ରେ ହୋଇଛି ନାମଲେଖା । ରାଜ୍ୟର ୪ଟି କଲେଜ ଓ ଦୁଇଟି ବିଶ୍ୱବିଦ୍ୟାଳୟରେ କରାଯାଇଛି ଏଭଳି ଚଞ୍ଚକତା । ଏଭଳି ଗୁରୁତର ଅଭିଯୋଗ ଆସିବା ପରେ ଉଚ୍ଚଶିକ୍ଷା ବିଭାଗ ପକ୍ଷରୁ ଆରମ୍ଭ ହୋଇଛି ତନାଘନା । ୬ ଶିକ୍ଷାନୁଷ୍ଠାନକୁ ସୋ କଜ୍ ନୋଟିସ୍ ଜାରି କରିଛି ବିଭାଗ ।
Also Read
ଉଚ୍ଚ ଶିକ୍ଷା ବିଭାଗର ଚିଠିରେ ଦର୍ଶାଯାଇଛି, ୬ ଶିକ୍ଷାନୁଷ୍ଠାନରେ ଇ-ଆଡମିଶନ ନିୟମକୁ ଉଲ୍ଲଂଘନ କରି ପିଜିରେ ପିଲାଙ୍କ ଆଡମିଶନ କରାଯାଇଛି । ଏହି ୬ ଉଚ୍ଚ ଶିକ୍ଷାନୁଷ୍ଠାନ ଭିତରେ ରହିଛି ବ୍ରହ୍ମପୁରର ଖଲିକୋଟ୍ ୟୁନିଭର୍ସିଟି ଓ କଳାହାଣ୍ଡି ବିଶ୍ୱବିଦ୍ୟାଳୟ । ଏହାବାଦ୍ ଖୋର୍ଦ୍ଧା ପ୍ରାଣନାଥ ଅଟୋନମସ୍ କଲେଜ, ରାଉରକେଲା ସରକାରୀ ସ୍ୱୟଂଶାସିତ କଲେଜ, କେନ୍ଦ୍ରାପଡ଼ା ଓ ଭଦ୍ରକ ସ୍ୱୟଂଶାସିତ କଲେଜରେ ବି ପିଜି ଆଡମିଶନ୍ରେ ହୋଇଛି ଜାଲିଆତି । ଯେଉଁଥିପାଇଁ ଉଚ୍ଚ ଶିକ୍ଷା ବିଭାଗ ଏହି ୬ଟି ଶିକ୍ଷାନୁଷ୍ଠାନକୁ କର୍ତ୍ତୃପକ୍ଷଙ୍କୁ ଜାନୁଆରୀ ୨୦ ସୁଦ୍ଧା ଆକ୍ସନ ଟେକେନ୍ ରିପୋର୍ଟ ଦେବାକୁ ନିର୍ଦ୍ଦେଶ ଦେଇଛି । ସେପଟେ ସୋ କଜ୍ ନୋଟିସ୍ ପାଇଥିବା ଶିକ୍ଷାନୁଷ୍ଠାନ କର୍ତ୍ତୃପକ୍ଷ ଅଜବ ଯୁକ୍ତି ରଖି କହିଛନ୍ତି ଇଣ୍ଟରନେଟ୍ ସମସ୍ୟା ପାଇଁ ଏଭଳି ସମସ୍ୟା ଉପୁଜିଛି ।
ଏଠି ପ୍ରଶ୍ନ ଉଠୁଛି କିପରି ସାମସ୍ ବାହାରେ କର୍ତ୍ତୃପକ୍ଷମାନେ ଆଡମିଶନ୍ କରାଇଲେ ? ଆଶ୍ଚର୍ଯ୍ୟର କଥା ହେଉଛି ପ୍ରଥମେ ଇ-ଆଡମିଶନ ନିୟମକୁ ଫୁ କରି ଆଡମିଶନ କଲେ, ପରେ ବିଭାଗକୁ ଚିଠି ଲେଖି ପିଲାଙ୍କୁ ସାମ୍ସ ତାଲିକାରେ ସାମିଲ କରିବାକୁ ଅନୁରୋଧ କଲେ । ଯେଉଁ ପିଲାମାନେ ଅଫ୍ ଲାଇନ୍ରେ ଆଡମିଶନ୍ କରିଛନ୍ତି ସେମାନଙ୍କୁ ସାମ୍ସ ଏବେ ଗ୍ରହଣ କରୁନି ।
ଏଭଳି ସ୍ଥଳେ ସମ୍ପୃକ୍ତ ପିଲାଙ୍କ କ୍ୟାରିୟର ଏବେ ଶଙ୍କଟରେ । ଖାଲି ପିଜି ନୁହେଁ ଗତ ୭ ତାରିଖରେ ବିଭାଗ ୧୯ଟି ଡିଗ୍ରୀ କଲେଜ୍କୁ ବି ନିୟମ ଉଲ୍ଲଂଘନ କରି ଅଫ୍ ଲାଇନ୍ରେ ଆଡମିଶନ କରିଥିବା ଅଭିଯୋଗରେ କଲେଜ ଅଧ୍ୟକ୍ଷମାନଙ୍କୁ କାରଣ ଦର୍ଶାଅ ନୋଟିସ୍ ଜାରି କରିଛନ୍ତି । ତେବେ ଉଚ୍ଚଶିକ୍ଷା ବିଭାଗର ନିୟମକୁ କାହିଁକି କିଛି କଲେଜ କି ବିଶ୍ୱବିଦ୍ୟାଳୟ ନମାନି ମନଇଚ୍ଛା ଆଡମିଶନ କରୁଛନ୍ତି । ତାକୁ ନେଇ ପ୍ରଶ୍ନ ଉଠାଇଛନ୍ତି ଛାତ୍ରଛାତ୍ରୀ ଓ ଶିକ୍ଷାବିତ ।
ଗୋଟିଏ ପଟେ ଆଡମିଶନ୍ରେ ସ୍ୱଚ୍ଛତା ଲାଗି ଉଚ୍ଚଶିକ୍ଷା ବିଭାଗ ଅନ୍ ଲାଇନ୍ ଜରିଆରେ ଆଡମିଶନ କରୁଛି । ଅନ୍ୟପଟେ ବିଭାଗର ନିୟମକୁ ବେଖାତିର କରି ଅଫ୍ ଲାଇନ୍ ଜରିଆରେ ଆଡମିଶନ୍ କରିବାକୁ କର୍ତ୍ତୃପକ୍ଷ କେଉଁଠୁ ସାହାସ ପାଉଛନ୍ତି ତାହା ଏବେ ବଡ଼ ପ୍ରଶ୍ନ।
