LIVE TV
ଜଣେ ବାପା ପରିଣତ ବୟସରେ ବାପାଟିଏ ଯେ ପାଲଟିଯିବ ପିଶାଚ କେହି କେବେ କଳନା କରିନଥିବେ । ଏମିତି ଏକ ବାପା ଯିଏ ନିଜ ଔରସର ସନ୍ତାନକୁ ଜାଳିଦେଇଛି । ପେଟ୍ରୋଲ୍ ଢ଼ାଳି ନିଆଁ ଲଗାଇ ମାରିଦେଇଛି ଉଭୟ ପୁଅ ଓ ବୋହୂଙ୍କୁ । ପୁଅ ଟଙ୍କା ଦେଲାନି ବୋଲି ପୁଅ ଓ ବୋହୂଙ୍କୁ ପୋଡ଼ି ମାରିଦେଲା। ବାରଙ୍ଗ ଥାନା ବାରସିଙ୍ଗା ଗାଁର ଏ ଜଘନ୍ୟକାଣ୍ଡ ସମସ୍ତଙ୍କୁ ଆଚମ୍ବିତ କରିଛି। ପୁଅ ଓ ବୋହୂକୁ ପେଟ୍ରୋଲ ଢାଳି ବାପା ପୋଡ଼ି ଦେବା ଘଟଣାରେ ପୁଅର ମୃତ୍ୟୁ ହୋଇଛି। କଟକ ଏସସିବି ମେଡିକାଲରେ ଚିକିତ୍ସାଧୀନ ଅବସ୍ଥାରେ ଆଖି ବୁଜିଦେଇଛନ୍ତି ପୁଅ ଦୀନବନ୍ଧୁ ରାଉତ ।
ପୁଅ ଟଙ୍କା ଦେଲାନି ବୋଲି ବୋହୂକୁ ତ ବାପ ଜାଳି ମାରିଦେଲା, ପୁଅକୁ ବି ଠେଲିଦେଲା ନିଆଁର ଆଁକୁ । ବାରଙ୍ଗ ଥାନା ବାରସିଙ୍ଗା ଗାଁର ନିଜ ପୁଅ-ବୋହୂକୁ ବାପାର ପେଟ୍ରୋଲ ଢାଳି ହତ୍ୟା ଉଦ୍ୟମ ଘଟଣାରେ ଚାଲିଗଲା ଉଭୟ ପୁଅ ଓ ବୋହୂଙ୍କ ଜୀବନ । ଜହ୍ଲାଦ ବାପା ଗୋବର୍ଦ୍ଧନ ରାଉତଙ୍କୁ ଗିରଫ କରିଛି ବାରଙ୍ଗ ପୋଲିସ୍ । ଗତ ରବିବାର ଦିନ ଚିକିତ୍ସାଧୀନ ଅବସ୍ଥାରେ ବୋହୂ ସସ୍ମିତାଙ୍କର ବି ମୃତ୍ୟୁ ହୋଇଥିଲା। ଆଉ ଆଜି ସବୁଦିନ ପାଇଁ ଆଖିବୁଜି ଦେଇଛି ପୁଅ।
Also Read
ଏହି ଘଟଣା ପରଠୁ ଶୋକରେ ବୁଡ଼ିଛି ସାରା ପରିବାର । ବାପର ବୀଭତ୍ସ କାଣ୍ଡରେ ଉଜୁଡ଼ିଯାଇଛି ସୁଖର ସଂସାର । ଏକୁଟିଆ ପଡ଼ି ବୁଢ଼ି ମା କୋଳରେ ଥାଇ ବାପା,ମା’ଙ୍କୁ ଖୋଜି ହେଉଛି ୬ ବର୍ଷର କଅଁଳ ଛୁଆ । ଶନିବାର, ରାତି ପ୍ରାୟ ସାଢ଼େ ୯ଟା । ବୋହୂ ସସ୍ମିତା ଶ୍ୱଶୁର ଗୋବର୍ଦ୍ଧନକୁ ଖାଇବା ବାଢ଼ି ଦେଇଥିଲେ । ଶ୍ୱଶୁର ଖାଇ ସାରିବା ପରେ ସ୍ୱାମୀ ଦୀନବନ୍ଧୁଙ୍କ ସହ ବସି ଏହି ବେଡ୍ ରୁମରେ ଖାଉଥିଲେ ସସ୍ମିତା ।ପାଖରେ ବେଡ୍ ଉପରେ ବସିଥିଲା ୬ ବର୍ଷର ପୁଅ ।
ଠିକ୍ ଏହି ସମୟରେ ଗୋବର୍ଦ୍ଧନ ଗୋଟିଏ ହାତରେ ପେଟ୍ରୋଲ୍ ବୋତଲ୍ ଏବଂ ଆଉ ଗୋଟିଏ ହାତରେ ନିଆଁହୁଳା ଧରି ପହଞ୍ଚିଥିଲା । କେହି କିଛି ବୁଝିବା ଆଗରୁ ପ୍ରଥମେ ପୁଅ ଉପରକୁ ପେଟ୍ରୋଲ୍ ଫିଙ୍ଗି ନିଆଁ ଲଗାଇଦେଇଥିଲା । ଆଉ ସ୍ୱାମୀଙ୍କୁ ନିଆଁ ଦାଉରୁ ବଞ୍ଚାଇବାବେଳେ ସସ୍ମିତା ଉପରକୁ ମଧ୍ୟ ପେଟ୍ରୋଲ୍ ପକାଇଥିଲା ଗୋବର୍ଦ୍ଧନ । ପରିଣାମ ସ୍ୱରୂପ ୬ ବର୍ଷର ଛୁଆ ଆଗରେ ଛଟପଟ ହେଉଥିଲେ ବାପା,ମା ।
ଅଧିକ ପଢ଼ନ୍ତୁ: କ୍ରୁରତାର ସବୁ ସୀମା ଟପିଲେ କଳାକାର; ମଞ୍ଚ ଉପରେ ଖାଇଲେ ଜୀଅନ୍ତା ଘୁଷୁରି
ତେବେ ବୁଢ଼ି ମା’ର ଉପସ୍ଥିତ ବୁଦ୍ଧି ପାଇଁ ଶିଶୁଟି ସିନା ବର୍ତ୍ତିଗଲା, କିନ୍ତୁ ତା ବାପା, ମା ବର୍ତ୍ତିପାରିନଥିଲେ ଜେଜେ ବାପାର ନିଆଁରୁ । ଛିନଛତ୍ର ହୋଇପଡ଼ିଛି ଖାଦ୍ୟ ଥାଳି । ଜଳିଯାଇଛି ସୋଫା । ଚାରିଆଡ଼େ ବିଛାଡ଼ି ହୋଇପଡ଼ିଛି ଆସବାବପତ୍ର । ଘଟଣା ଜାଣିବା ପରେ ପାଖ ପଡ଼ୋଶୀ ଦୀନବନ୍ଧୁ ଏବଂ ସସ୍ମିତାଙ୍କୁ ଉଦ୍ଧାର କରି ହସପିଟାଲରେ ଭର୍ତ୍ତି କରିଥିଲେ । ସେଠାରେ ସସ୍ମିତାଙ୍କ ମୃତ୍ୟୁ ହୋଇଥିବାବେଳେ ଆଜି ଦୀନବନ୍ଧୁ ବି ଆରପାରିକୁ ଚାଲିଯାଇଛନ୍ତି ।
ପୋଲିସର କହିବା କଥା, ନିଶାପାଣିରେ ବୁଡ଼ି ରହୁଥିଲା ଗୋବର୍ଦ୍ଧନ । ଗୋଡ଼ିସାହି ଛକରେ ଏହି ଚପଲ ଦୋକାନ କରି ପରିବାର ପୋଷୁଥିବା ପୁଅ ଦୀନବନ୍ଧୁ ବାପାଙ୍କୁ ପ୍ରତିମାସ ଭଳି ଏଥର ବି ଦେଇଥିଲେ ପାଞ୍ଚ ହଜାର ଟଙ୍କା । ଗତକାଲି ପୁଣି ଟଙ୍କା ମାଗିବାରୁ ଦୀନବନ୍ଧୁ ମନା କରିଦେଇଥିଲେ । ଏହାକୁ ନେଇ ଉତ୍ତ୍ୟକ୍ତ ବାପା ଗତକାଲି ପୁଅ-ବୋହୂଙ୍କୁ ହତ୍ୟା ପାଇଁ ମନସ୍ଥ କରି ଭିଆଇଥିଲା ଏଭଳି କାଣ୍ଡ । ତା’ପରେ ଘର ଛାତକୁ ଯାଇ ଲୁଚିଥିବା ବେଳେ ବାରଙ୍ଗ ପୋଲିସ ଉଠାଇ ଆଣିଥିଲା ଥାନାକୁ ।
