LIVE TV
ଟ୍ରେନ୍ ଉପରକୁ ଗୁଳିମାଡ଼ । ନନ୍ଦନକାନନ ଏକ୍ସପ୍ରେସ ଉପରେ ହୋଇଛି ଗୁଳିମାଡ଼ । ତେବେ ଏହି ଗୁଳିମାଡ଼ରେ କୌଣସି ବ୍ୟକ୍ତି ଆହତ ହୋଇନଥିବା ସୂଚନା ମିଳିଛି । ଭଦ୍ରକ ଓ ବାଉଦପୁର ସେକ୍ସନ ମଝିରେ ନନ୍ଦନକାନନ ଏକ୍ସପ୍ରେସ୍ ଉପରକୁ ଗୁଳିମାଡ଼ ହୋଇଛି । ଭଦ୍ରକ ଷ୍ଟେସନର ୧୧୯ ନଂ ଗେଟ୍ ନିକଟରେ ନନ୍ଦନକାନନ ଏକ୍ସପ୍ରେସର ଟ୍ରେନକୁ ଗୁଳିମାଡ଼ ହୋଇଛି । ଟ୍ରେନ୍ ଉପରକୁ ୨ ରାଉଣ୍ଡ ଗୁଳିମାଡ଼ ହୋଇଥିବା ଗାର୍ଡ କହିଛନ୍ତି । ତେବେ ଏହି ଗୁଳିମାଡ଼ରେ ଗାର୍ଡ ବଗିର ୱିଣ୍ଡୋ କାଚ ଭାଙ୍ଗିଯାଇଛି । ଟ୍ରେନ୍କୁ ଗୁଳିମାଡ଼ ହେବା ପରେ ଘଟଣାସ୍ଥଳରେ ଆରପିଏଫ୍ ଓ ସ୍ଥାନୀୟ ପୋଲିସ୍ ପହଞ୍ଚି ତଦନ୍ତ ଜାରି ରଖିଛନ୍ତି।
Also Read
ଅଧିକ ପଢ଼ନ୍ତୁ: Bhubaneswar Road Accident: ରାଜଧାନୀରେ ଦୁର୍ଘଟଣା; ଦ୍ରୁତଗତିରେ ଆସି ଟ୍ରାଫିକ ଫୋଷ୍ଟକୁ ଉଡାଇଲା କାର୍
ସୂଚନା ଅନୁସାରେ ନୂଆଦିଲ୍ଲୀରୁ ଭୁବନେଶ୍ୱର ଅଭିମୁଖେ ଆସୁଥିଲା ନନ୍ଦନକାନନ ଏକ୍ସପ୍ରେସ । ତେବେ ଏହି ଟ୍ରେନ୍ଟି ଆଜି ମଧ୍ୟାହ୍ନ ସମୟରେ ଭଦ୍ରକ ଷ୍ଟେସନ ଅତିକ୍ରମ କରୁଥିଲା । ନନ୍ଦନକାନନ ଏକ୍ସପ୍ରେସ୍ ଭଦ୍ରକ ଷ୍ଟେସନରୁ ଛାଡ଼ୁଥିବା ବେଳେ ହଠାତ୍ ଦୁଇ ରାଉଣ୍ଡ ଗୁଳିମାଡ଼ ହୋଇଥିଲା । ତେବେ ଏହି ଗୁଳିମାଡ଼ରେ ଗାର୍ଡ଼ ବଗିର ୱିଣ୍ଡୋ କାଚ ଭାଙ୍ଗିଯାଇଛି । ଗୁଳିମାଡ଼ ନେଇ ସମ୍ପୃକ୍ତ ଟ୍ରେନ୍ରେ ଥିବା ଗାର୍ଡ ଅଭିଯୋଗ କରିଛନ୍ତି । ଗାର୍ଡଙ୍କ ଅଭିଯୋଗକୁ ଆଧାର କରି ଭଦ୍ରକ ଷ୍ଟେସନ ମ୍ୟାନେଜର ପୋଲିସ୍କୁ ସୂଚନା ଦେଇଥିଲେ ।
ଖବର ପାଇବା ପରେ ଯେଉଁ ସ୍ଥାନରେ ଫାୟାରିଂ ହୋଇଥିଲା, ସେହି ସ୍ଥାନରେ ଭଦ୍ରକ GRP ପୋଲିସ୍ ପହଞ୍ଚି ତଦନ୍ତ ଜାରି କରିଛି । ଘଟଣାସ୍ଥଳରୁ GRP ପୋଲିସ୍କୁ କୌଣସି ଗୁଳି ମିଳିନାହିଁ । ତେବେ ସେଠାରେ ନୂଆ ଟ୍ରେନ୍ ଲାଇନ କାମ ଜାରି ରହିଛି । ବଡ଼ ବଡ଼ ବୋଲଡର ଛିଟିକି ପଡ଼ି ଗାର୍ଡ ବଗିର କାଚ ଭାଙ୍ଗିଛି ନା ସତରେ ଗୁଳି ହୋଇଛି ତା’ର ତଦନ୍ତ ଜାରି ରଖିଛି GRP ପୋଲିସ । ସେପଟେ ଏହି ଘଟଣାରେ ସମ୍ପୃକ୍ତ ଟ୍ରେନ୍ କିମ୍ବା ଗାର୍ଡର କୌଣସି କ୍ଷତି ହୋଇ ନଥିବା ଷ୍ଟେସନ ମ୍ୟାନେଜର କହିଛନ୍ତି ।
ସେପଟେ ଗୁଳିମାଡ଼ ହୋଇଥିବା ଟ୍ରେନ୍ଟି ପୁରୀ ଷ୍ଟେସନରେ ଆସି ପହଞ୍ଚିଛି । ପୁରୀ ଷ୍ଟେସନରେ ନନ୍ଦନକାନନ ଏକ୍ସପ୍ରେସ୍ ଟ୍ରେନ୍ ପହଞ୍ଚିବା ପରେ ଫୋରେନ୍ସିକ ଟିମ୍ ପହଞ୍ଚି ଛାନଭିନ୍ ଜାରି ରଖିଛି । ଗୁଳି ମାଡ଼ରେ କ୍ଷତିଗ୍ରସ୍ତ ହୋଇଥିବା ବଗିକୁ ଫୋରେନ୍ସିକ୍ ଟିମ୍ ଯାଞ୍ଚ କରୁଛନ୍ତି ।
