Radhika Yadav Murder: ହତ୍ୟାର ୩ ଦିନ ପୂର୍ବରୁ ଧମକ ଦେଇଥିଲେ ରାଧିକାଙ୍କ ବାପା

ଟେନିସ ଖେଳାଳି ରାଧିକା ଯାଦବଙ୍କୁ ବାପା ହତ୍ୟା କରିବା ଘଟଣା । ପଚରାଉଚରାବେଳେ ପୋଲିସ ନିକଟରେ ମୁହଁ ଖୋଲିଛି ଅଭିଯୁକ୍ତ ବାପା ଦୀପକ ଯାଦବ । ନିଜ ସାଙ୍ଗମାନେ ଝିଅର ଚରିତ୍ରକୁ ନେଇ ସନ୍ଦେହ କରୁଥିବାରୁ ଚିନ୍ତିତ ହୋଇପଡିଥିବା କହିଛି ଦୀପକ । ଏଥିପାଇଁ ହତ୍ୟାକାଣ୍ଡର ଦୁଇ ସପ୍ତାହ ପୂର୍ବରୁ ଟେନିସ୍‌ ଏକାଡେମୀ ବନ୍ଦ କରିବାକୁ ରାଧିକାକୁ ବାରମ୍ବାର କହିଲେ ବି ସେ ଶୁଣିନଥିବା କହିଛି ଦୀପକ । ପୋଲିସର ସୂଚନା ଅନୁସାରେ, ହତ୍ୟାକାଣ୍ଡର ୩ ଦିନ ତଳେ ବାପଝିଅଙ୍କ ମଧ୍ୟରେ ଜୋରଦାର ଝଗଡା ହୋଇଥିଲା । କଥା ନଶୁଣିଲେ ରାଧିକାଙ୍କୁ ଜୀବନରୁ ମାରିଦେବେ ନଚେତ୍ ନିଜେ ଆତ୍ମହତ୍ୟା କରିବେ ବୋଲି ଧମକ ଦେଇଥିଲେ ବାପା । 

ସୂଚନା ଅନୁସାରେ, ଗୁରୁବାର ଟେନିସ ଖେଳାଳି ରାଧିକା ଯାଦବଙ୍କୁ ଗୁଳିକରି ହତ୍ୟା କରାଯାଇଛି । ରାଧିକାଙ୍କ ବାପା ଦୀପକ ଯାଦବ ତାଙ୍କ ଉପରକୁ ୩ ରାଉଣ୍ଡ ଗୁଳି ଚଳାଇଥିଲେ । ଏହାପରେ ରାଧିକାଙ୍କୁ ଗୁରୁତର ଅବସ୍ଥାରେ ହସ୍ପିଟାଲ ନିଆଯାଇଥିଲା । ହେଲେ ସେଠାରେ ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ୟୁ ହୋଇଛି । ପୂର୍ବରୁ ରାଧିକାଙ୍କ ରିଲ୍ସ ନିଶା ପାଇଁ ବାପା ତାଗିଦ କରୁଥିଲେ । ହେଲେ ସେ ନଶୁଣି ରିଲ୍ସ ଜାରି ରଖିଥିଲେ । ଯେଉଁଥିପାଇଁ ଉତ୍ତ୍ୟକ୍ତ ହୋଇ ରାଧିକାଙ୍କୁ ତାଙ୍କ ବାପା ହତ୍ୟା କରିଥିବା କୁହାଯାଉଛି । ଅଭିଯୁକ୍ତ ବାପାକୁ ଗିରଫ କରିବା ସହ ରିଭଲଭର ଜବତ କରିଛି ପୋଲିସ । ମାମଲାର ଛାନଭିନ ଜାରି ରହିଛି । ପୋଷ୍ଟମର୍ଟମରୁ ଜଣାପଡ଼ିଛି ଯେ, ରାଧିକାଙ୍କ ପଛପଟେ ୩ ଟି ଗୁଳି ବାଜିଛି । 

ଟେନିସ ଖେଳାଳି ରାଧିକାଙ୍କ ବୟସ ମାତ୍ର ୨୫ ବର୍ଷ ହୋଇଥିବାବେଳେ ସେ ହରିୟାଣାର ଗୁରୁଗ୍ରାମରେ ରହୁଥିଲେ । ଆଉ ତାଙ୍କ ନିଜ ଘରେ ହିଁ ତାଙ୍କୁ ହତ୍ୟା କରିଛନ୍ତି ବାପା । ରାଧିକା ଜଣେ ପ୍ରସିଦ୍ଧ ଟେନିସ୍ ଖେଳାଳି ହୋଇଥିବାବେଳେ ରାଜ୍ୟସ୍ତରୀୟ ଅନେକ ପ୍ରତିଯୋଗିତାରେ ଭାଗ ନେଇ ସେ ପୁରସ୍କୃତ ହୋଇଛନ୍ତି । ଜାତୀୟ ଓ ଅନ୍ତର୍ଜାତୀୟ ସ୍ତରରେ ମଧ୍ୟ ଖେଳିଛନ୍ତି । ସେହିପରି ଇଣ୍ଟରନ୍ୟାସନାଲ ଟେନିସ ଫେଡେରେସନରେ ମଧ୍ୟ ୧୧୩ ତମ ସ୍ଥାନ ହାସଲ କରିଥିଲେ ରାଧିକା । ଏହାସହ ରାଧିକା ନିଜେ ମଧ୍ୟ ଏକ ଟେନିସ ଏକାଡେମୀ ଚଳାଉଥିଲେ । ଯାହାକୁ ନାପସନ୍ଦ କରୁଥିଲେ ତାଙ୍କ ବାପା । 

ଅଧିକ ପଢନ୍ତୁ: ଝିଅ ଥିଲା ପ୍ରସିଦ୍ଧ ଟେନିସ ଖେଳାଳି, ରିଲ୍ସ ପାଇଁ ଗୁଳି କରି ହତ୍ୟା କଲେ ବାପା