LIVE TV
ଭୁବନେଶ୍ୱର, (ରିପୋର୍ଟ-ଭାଗିରଥୀ ସାହୁ, କପିଳେନ୍ଦ୍ର ପ୍ରଧାନ): ଦେଶରେ ଉପରମୁହାଁ ଓମିକ୍ରନ୍ ସଂକ୍ରମିତଙ୍କ ସଂଖ୍ୟା । ତାଞ୍ଜାନିଆରୁ ଦିଲ୍ଲୀ ଫେରିଥିବା ଜଣେ ଯୁବକ ଆଜି ଓମିକ୍ରନ୍ ଚିହ୍ନଟ ହେବା ପରେ ମହାରାଷ୍ଟ୍ରରୁ ଆଉ ୭ଜଣ ଓମିକ୍ରନ୍ ପଜିଟିଭ୍ ଚିହ୍ନଟ ହୋଇଛନ୍ତି । ଏବେ କେବଳ ମହାରାଷ୍ଟ୍ରରେ ଓମିକ୍ରନ୍ ଆକ୍ରାନ୍ତଙ୍କ ସଂଖ୍ୟା ୮ରେ ପହଞ୍ଚିଛି ।
ଦେଶରେ ଓମିକ୍ରନ ଆକ୍ରାନ୍ତଙ୍କ ସଂଖ୍ୟା ବଢ଼ିବାରେ ଲାଗିଛି । ଏପଟେ ଓଡ଼ିଶାରେ ଏଯାଏଁ ଓମିକ୍ରନ୍ ଚିହ୍ନଟ ହୋଇ ନ ଥିଲେ ମଧ୍ୟ ସତର୍କ ରହିବାକୁ ପରାମର୍ଶ ଦେଇଛି ସ୍ୱାସ୍ଥ୍ୟ ବିଭାଗ । ରାଜ୍ୟ ସରକାର କହିଛନ୍ତି, ଜାତୀୟ ହାର ତୁଳନାରେ ଓଡ଼ିଶାର କୋଭିଡ୍ ସ୍ଥିତି ବେଶ ଭଲ ରହିଛି ।
ଗୋଟିଏ ପରେ ଗୋଟିଏ ରାଜ୍ୟକୁ ମାଡ଼ିଚାଲିଛି କରୋନାର ଓମିକ୍ରନ୍ ଭ୍ୟାରିଏଣ୍ଟ । ଆଜି ଦିଲ୍ଲୀରେ ଦେଶର ପଞ୍ଚମ ଓମିକ୍ରନ୍ ଆକ୍ରାନ୍ତ ଚିହ୍ନଟ ହେବା ପରେ ମହାରାଷ୍ଟ୍ରରେ ଆଉ ୭ ଜଣ ଆକ୍ରାନ୍ତ ଚିହ୍ନଟ ହୋଇଛନ୍ତି । ତେବେ ଦିଲ୍ଲୀରେ ଚିହ୍ନଟ ଆକ୍ରାନ୍ତ ଜଣଙ୍କ କିଛି ଦିନ ପୂର୍ବରୁ ତାଞ୍ଜାନିଆରୁ ଫେରିଥିଲେ । ଏବେ ତାଙ୍କୁ ଦିଲ୍ଲୀର ଲୋକନାୟକ ଜୟପ୍ରକାଶ ହସ୍ପିଟାଲରେ ଭର୍ତ୍ତି କରାଯାଇଛି । ତାଙ୍କ ସ୍ୱାସ୍ଥ୍ୟାବସ୍ଥା ସ୍ଥିର ରହିଛି । ପୂର୍ବରୁ କର୍ଣ୍ଣାଟକ ବେଙ୍ଗଳୁରୁରୁ ୨ ଜଣ ଏବଂ ଗୁଜରାଟର ଜାମନଗର ଓ ମହାରାଷ୍ଟ୍ରର ଡୋମ୍ବିଭାଲିରୁ ଜଣେ ଲେଖାଏଁ ଓମିକ୍ରନ୍ ସଂକ୍ରମିତ ଚିହ୍ନଟ ହୋଇଥିଲେ ।
Also Read
ଓମିକ୍ରନ୍ ସଂକ୍ରମିତ ଆଫ୍ରିକୀୟ ଦେଶରୁ ବିହାରକୁ ଫେରିଥିବା ୫ ଜଣ, ସିଙ୍ଗାପୁରରୁ ତାମିଲନାଡ଼ୁ ଫେରିଥିବା ୪ ଜଣ ମଧ୍ୟ କୋଭିଡ୍ ପଜିଟିଭ ଚିହ୍ନଟ ହୋଇଛନ୍ତି । ତେଣୁ ଦେଶରେ ଓମିକ୍ରନ ସଂକ୍ରମିତଙ୍କ ସଂଖ୍ୟା ବୃଦ୍ଧି ପାଇବା ଆଶଙ୍କା ବଢ଼ିିଛି ।
ଅନ୍ୟପଟେ ଓଡ଼ିଶା ଜନସ୍ୱାସ୍ଥ୍ୟ ନିର୍ଦ୍ଦେଶକ କହିଛନ୍ତି, ଯଦିଓ ଓମିକ୍ରନ୍ ଦ୍ରୁତ ବେଗରେ ସଂକ୍ରମିତ ହେଉଛି, ଏହାଦ୍ୱାରା କିନ୍ତୁ ଏପର୍ଯ୍ୟନ୍ତ ରୋଗୀ ଗୁରୁତର ହୋଇନାହାନ୍ତି । ଏହାସତ୍ତ୍ୱେ ଓମିକ୍ରନ ରିସ୍କ ଦେଶରୁ ଆସୁଥିବା ଯାତ୍ରୀଙ୍କର ନିୟମିତ ଯାଞ୍ଚ ହେଉଛି । ସେମାନଙ୍କୁ ଚିହ୍ନଟ କରି ସଙ୍ଗରୋଧରେ ରଖିବାକୁ ଜିଲ୍ଲା ପ୍ରଶାସନକୁ ନିର୍ଦ୍ଦେଶ ଦିଆଯାଇଛି । ଅନ୍ୟ ଦେଶରୁ ଆସି ଗାଁ ଗଣ୍ଡାରେ ପହଞ୍ଚୁଥିବା ଲୋକଙ୍କ ସଂପର୍କରେ ଜିଲ୍ଲା ପ୍ରଶାସନ କିମ୍ବା ସ୍ୱାସ୍ଥ୍ୟ ବିଭାଗକୁ ଜଣାଇବାକୁ ସ୍ଥାନୀୟ ଲୋକଙ୍କୁ ଅନୁରୋଧ କରାଯାଇଛି । ଏପଟେ ରାଜ୍ୟର ୬ ଜିଲ୍ଲାରେ କରୋନା କେସ୍ ବୃଦ୍ଧି ଓ ଟେଷ୍ଟିଂ କମିବା ନେଇ କେନ୍ଦ୍ର ସ୍ୱାସ୍ଥ୍ୟ ସଚିବ ଦେଇଥିବା ଚିଠି ସଂପର୍କରେ ସ୍ୱାସ୍ଥ୍ୟ ନିର୍ଦ୍ଦେଶକ କହିଛନ୍ତି, ଜାତୀୟହାର ତୁଳନାରେ ଓଡ଼ିଶାରେ କୋଭିଡ୍ ସ୍ଥିତି ଭଲ ଅଛି । ବର୍ଷା କାରଣରୁ ଟେଷ୍ଟିଂ ସାମାନ୍ୟ କମିଛି । ତେବେ ଧାର୍ଯ୍ୟ ଲକ୍ଷ୍ୟ ଅନୁଯାୟୀ କରାଯାଉଛି ।
ଦକ୍ଷିଣ ଆଫ୍ରିକା, ବୋସଓ୍ୱାନା ଓ ବ୍ରିଟେନ୍ ସମେତ ୟୁରୋପର ଅନେକ ଦେଶ, ବ୍ରାଜିଲ, ଚୀନ୍, ନ୍ୟୁଜିଲ୍ୟାଣ୍ଡ, ଇସ୍ରାଏଲ ଭଳି ୪୪ଟି ରାଷ୍ଟ୍ରଙ୍କୁ ଓମିକ୍ରନ ରିସ୍କ ତାଲିକାରେ ସାମିଲ କରାଯାଇଛି । ଏସବୁ ଦେଶରୁ ଆସୁଥିବା ଯାତ୍ରୀଙ୍କର ବିମାନବନ୍ଦରରେ ହିଁ RT-PCR ଟେଷ୍ଟ ବାଧ୍ୟତାମୂଳକ କରାଯାଇଛି । ଭୁବନେଶ୍ୱର ଓ ଝାରସୁଗୁଡା ବିମାନବନ୍ଦରରେ ଯାଞ୍ଜ ବ୍ୟବସ୍ଥାକୁ କଡ଼ାକଡ଼ି କରାଯାଇଛି ।
