LIVE TV
ଅନୁଗୁଳ ଜିଲ୍ଲା ତାଳଚେର ବାଙ୍କଧରା ଛକ ନିକଟରେ ଆଜି ମର୍ମଦୁନ୍ତ ସଡକ ଦୁର୍ଘଟଣା ହୋଇଛି । ଦୁର୍ଘଟଣାରେ ୩ ବର୍ଷର ପୁଅ ସମେତ ବାପାଙ୍କର ମୃତ୍ୟୁ ହୋଇଛି । ଆଉ ସୌଭାଗ୍ୟ ବଶତଃ ଅଳ୍ପକେ ଭଣଜା ବର୍ତ୍ତି ଯାଇଛନ୍ତି । ସୂଚନା ଅନୁସାରେ ତାଳଚେର ଗୋଡ଼ିବନ୍ଧ ଅଞ୍ଚଳରେ ରହୁଥିବା ଏମଡି ଆରିଫ (୩୪) ଏକ ମୋଟରସାଇକେଲରେ ତାଙ୍କ ନାବାଳକ ପୁଅ ଏମଡି ସାହିଲ ଓ ନାବାଳକ ଭଣଜା ଏମଡି ଫିରୋଜ କୁରେସୀ ସହ ତାଳଚେର ସ୍ଥିତ ମସଜିଦକୁ ନମାଜ ପାଠ କରିବା ପାଇଁ ଆସିଥିଲେ ।
ମସଜିଦରୁ ନମାଜ ପାଠ କରି ସାରିବା ପରେ ବଜାରରୁ ସଉଦାପତ୍ର କିଣି ସେ ଗୋଡିବନ୍ଧ ସ୍ଥିତ ସୁନାଖଣି ନିଜ ଭଡାଘରକୁ ଫେରୁଥିଲେ କିନ୍ତୁ ଫେରିବା ବାଟରେ ତାଳଚେର ବାଙ୍କଧରା ଛକ ନିକଟରେ ଏକ କୋଇଲା ଟ୍ରକ ସେମାନଙ୍କୁ ଧକ୍କା ଦେଇଥିଲା । ଫଳରେ ଘଟଣାସ୍ଥଳରେ ହିଁ ବାପା ଆରିଫ ଓ ପୁଅ ସାହିଲଙ୍କ ମୃତ୍ୟୁ ହୋଇଥିଲା । ତେବେ ନାବାଳକ ଭଣଜା ଗାଡ଼ିରୁ ଛିଟିକି ପଡି ଗୁରୁତର ଆହତ ହୋଇଥିବା ବେଳେ ସ୍ଥାନୀୟ ଲୋକ ତାଙ୍କୁ ଉଦ୍ଧାର କରି ସ୍ଥାନୀୟ ଚିକିତ୍ସାଳୟରେ ଭର୍ତ୍ତି କରିଛନ୍ତି ।
ତେବେ ଘଟଣାକୁ ନେଇ ସ୍ଥାନୀୟ ଅଂଚଳରେ ଚାପା ଉତ୍ତେଜନା ଦେଖା ଦେଇଥିବାବେଳେ ଖବର ପାଇ ତାଳଚେର ପୁଲିସ ଘଟଣାସ୍ଥଳରେ ପହଞ୍ଚି ଉତ୍ତ୍ୟକ୍ତ ଲୋକମାନଙ୍କୁ ବୁଝାସୁଝା କରୁଛି l ଅନ୍ୟପଟେ ଆଜି ମୁସଲମାନ ସମ୍ପ୍ରଦାୟର ରମଜାନ ମାସର ଶେଷ ଦିନ ଇଦ ପର୍ବ । ଆଜି ଧୁମଧାମରେ ମୁସଲମାନମାନେ ପବିତ୍ର ଇଦ ପର୍ବକୁ ପାଳନ କରୁଥିବା ବେଳେ ଏହି ଦୁଃଖଦ ଘଟଣା ସମସ୍ତ ମୁସଲମାନ ଭାଇ-ଭଉଣୀମାନଙ୍କ ମନରେ ଶକ୍ତ ଆଘାତ ଦେଇଛି ।
Also Read
ଏହି ଦୁଃଖଦ ଘଟଣା ଘଟିବା ପରେ ତାଳଚେରର ଶତାଧିକ ମୁସଲମାନ ଭାଇ ଭଉଣୀ ମାନେ ଘଟଣାସ୍ଥଳରେ ପହଂଚି ପରିବାର ବର୍ଗଙ୍କୁ ସମବେଦନା ଜଣାଇବା ସହ ଶୋକ ବ୍ୟକ୍ତ କରିଛନ୍ତି l
- Reported by:
- MANIL MOHARANA
