Horrific Accident: ଅସ୍ଥି ବିସର୍ଜନ ପାଇଁ ଯାଇଥିଲେ, ଶବ ହୋଇଗଲେ ୭ଜଣ

ଶନିବାର ବିଳମ୍ବିତ ରାତିରେ ରାଜସ୍ଥାନରେ ଏକ ଭୟଙ୍କର ସଡ଼କ ଦୁର୍ଘଟଣାର ଶିକାର ହୋଇଛନ୍ତି ଦୁଇଟି ପରିବାର। ଏହି ଦୁର୍ଘଟଣାରେ ସାତ ଜଣ ପ୍ରାଣ ହରାଇଛନ୍ତି, ସେମାନଙ୍କ ମଧ୍ୟରୁ ଦୁଇଜଣ ଶିଶୁ ଏବଂ ଦୁଇଜଣ ମହିଳା। ପୋଲିସ ରବିବାର କହିଛି ଯେ ମୃତକମାନେ ଦୁଇଟି ପରିବାରର ସଦସ୍ୟ। ଜୟପୁର ନିକଟସ୍ଥ ଶିବଦାସପୁରା ଅଞ୍ଚଳର ରିଙ୍ଗ ରୋଡରେ ଏହି ଦୁର୍ଘଟଣା ଘଟିଛି। ଦ୍ରୁତ ଗତିରେ ଯାଉଥିବା କାରଟି ରାସ୍ତାରୁ ଏକ ଅଣ୍ଡରପାସ୍ ତଳେ ପାଣିରେ ଖସି ପଡ଼ିଥିଲା। ଦୁର୍ଘଟଣା ଏତେ ଭୟଙ୍କର ଥିଲା ଯେ କାରଟି ଖଣ୍ଡ ଖଣ୍ଡ ହୋଇଗଲା। କାରରେ ଥିବା ଲୋକମାନେ ହରିଦ୍ୱାରକୁ ଅସ୍ଥି ବିସର୍ଜନ ପାଇଁ ଯାଇଥିଲେ ଏବଂ ଫେରୁଥିବା ସମୟରେ ଏହି ଦୁର୍ଘଟଣା ଘଟିଥିଲା। ସଡ଼କ ଦୁର୍ଘଟଣାର ସୂଚନା ପାଇବା ପରେ ଘଟଣାସ୍ଥଳରେ ବହୁ ସଂଖ୍ୟକ ଲୋକ ଜମା ହୋଇଥିଲେ।

ସୂଚନା ଅନୁଯାୟୀ, କାଳୁ ରାମ ତାଙ୍କ ପରିବାର ସହିତ ତାଙ୍କ ପିତାଙ୍କ ଅସ୍ଥି ବିସର୍ଜନ କରିବାକୁ ହରିଦ୍ୱାର ଯାଇଥିଲେ। ଫେରିବା ସମୟରେ ତାଙ୍କ କାର ନିୟନ୍ତ୍ରଣ ହରାଇ ରାସ୍ତାରୁ କିଛି ଫୁଟ ତଳେ ଏକ ଅଣ୍ଡରପାସ୍ ନିକଟରେ ଖସି ପଡ଼ିଲା।

ମୃତକଙ୍କ ମଧ୍ୟରେ ଦୁଇ ଜଣ ମହିଳା ଏବଂ ଦୁଇ ଜଣ ଶିଶୁ 

ରିଙ୍ଗ ରୋଡରେ ହୋଇଥିବା ଏହି ଭୟଙ୍କର ସଡ଼କ ଦୁର୍ଘଟଣାରେ କାରରେ ଯାତ୍ରା କରୁଥିବା ୭ ଜଣଙ୍କର ମୃତ୍ୟୁ ହୋଇଛି। ମୃତକଙ୍କ ମଧ୍ୟରେ ଦୁଇ ଜଣ ଶିଶୁ ଏବଂ ଦୁଇ ଜଣ ମହିଳା ମଧ୍ୟ ଅଛନ୍ତି। ସମସ୍ତ ମୃତକ କେକ୍ରି ଏବଂ ଭାଟିକା ଅଞ୍ଚଳର ବାସିନ୍ଦା ଥିଲେ।

କାଳୁ ରାମ ଏବଂ ତାଙ୍କ ସ୍ତ୍ରୀ ସୀମାଙ୍କ ସହିତ ସେମାନଙ୍କର ୧୪ ମାସର ପୁଅ ରୁଦ୍ରଙ୍କର ମୃତ୍ୟୁ ହୋଇଥିଲା। ମୃତକଙ୍କ ମଧ୍ୟରେ ରାମରାଜ ଏବଂ ତାଙ୍କ ସ୍ତ୍ରୀ ମଧୁ ମଧ୍ୟ ଅଛନ୍ତି। ଏହି ଦୁର୍ଘଟଣା ରୋହିତ ଏବଂ ତାଙ୍କର ୩ ବର୍ଷର ପୁଅ ଗଜରାଜଙ୍କ ମଧ୍ୟ ମୃତ୍ୟୁ ହୋଇଛି ।

ଦୁର୍ଘଟଣା ପରେ ଘଟଣାସ୍ଥଳରେ ଲୋକଙ୍କ ଭିଡ଼ ଜମି ଯାଇଥିଲା। ସୂଚନା ପାଇବା ପରେ ପୋଲିସ ଘଟଣାସ୍ଥଳରେ ପହଞ୍ଚି ବହୁ ଚେଷ୍ଟା ପରେ ଜେସିବି ସାହାଯ୍ୟରେ କାରଟିକୁ ବାହାର କରିଥିଲା।

ଅଧିକାରୀମାନେ କହିଛନ୍ତି ଯେ ଦୁର୍ଘଟଣାଟି ଶିବଦାସପୁରା ଥାନା ଅଞ୍ଚଳର ପ୍ରହ୍ଲାଦପୁରା ନିକଟରେ ଘଟିଛି। ଏକ ଦ୍ରୁତଗାମୀ କାର ସମ୍ଭବତଃ ଡିଭାଇଡରରେ ଧକ୍କା ଦେଇ ରିଙ୍ଗ ରୋଡରୁ ପ୍ରାୟ ୧୬ ଫୁଟ ତଳେ ପଡ଼ିଯାଇଥିଲା। କାରଟି ପାଣି ଭର୍ତ୍ତି ଏକ ଅଣ୍ଡରପାସରେ ପଡ଼ିଯାଇଥିଲା।

ରବିବାର ଅପରାହ୍ନରେ ସ୍ଥାନୀୟ ଲୋକମାନେ ଦୁର୍ଘଟଣାଗ୍ରସ୍ତ କାରଟି ପାଣି ଭର୍ତ୍ତି ଅଣ୍ଡରପାସରେ ଓଲଟି ପଡ଼ିଥିବା ଦେଖିଥିଲେ। ସୂଚନା ପାଇ ପୋଲିସ ଘଟଣାସ୍ଥଳରେ ପହଞ୍ଚି କ୍ରେନ୍ ସାହାଯ୍ୟରେ କାରଟିକୁ ବାହାର କରିଥିଲା।

ଶିବଦାସପୁରା ଥାନାଧିକାରୀ ସୁରେନ୍ଦ୍ର ସାଇନି କହିଛନ୍ତି, କାରରେ ଥିବା ସମସ୍ତ ସାତ ଜଣ ଲୋକ ମୃତ ଅବସ୍ଥାରେ ମିଳିଥିଲେ ।ମୃତଦେହଗୁଡ଼ିକୁ ପୋଷ୍ଟମର୍ଟମ ପାଇଁ ପଠାଯାଇଛି। ସାଇନି କହିଛନ୍ତି ଯେ ଶନିବାର ବିଳମ୍ବିତ ରାତିରେ ଦୁର୍ଘଟଣା ଘଟିଥିବା ମନେ ହେଉଛି। ତଥାପି, ସଠିକ୍ ସମୟ ଜଣାନାହିଁ।