ରାଜ୍ୟରେ ବଢୁଥିବା ଦୁର୍ଘଟଣା ମୁଣ୍ଡବ୍ୟଥାର କାରଣ ପାଲଟିଲାଣି । ରାତି ପାହିଲେ ରାଜ୍ୟରେ ଘଟୁଥିବା ସଡ଼କ ଦୁର୍ଘଟଣାର ଖବର ବିଭିନ୍ନ ଗଣମାଧ୍ୟମରେ ପ୍ରକାଶ ପାଉଛି । ପ୍ରଶାସନ ଦ୍ୱାରା ବିଭିନ୍ନ ଉପାୟରେ ସତର୍କ କରାଯାଉଥିଲେ ମଧ୍ୟ ଏହାକୁ ମାନୁନାହାନ୍ତି ଅମାନିଆ ଚାଳକ । ଗାଡି ଚାଳକଙ୍କୁ ନିୟମ ବିଷୟରେ ଅବଗତ କରିବା ସହ ସଚେତନ କରିବା ପାଇଁ ରାଜ୍ୟ ସରକାରଙ୍କ ତରଫରୁ କିଛି ଦିନ ତଳେ ସାରା ରାଜ୍ୟରେ ସଡକ ସୁରକ୍ଷା ସପ୍ତାହ ପାଳନ କରାଯାଇଥିଲା । ଏଥିରେ ସଡ଼କ ଦୁର୍ଘଟଣାରୁ ଜୀବନକୁ କିପରି ରକ୍ଷା କରାଯାଇପାରିବ ସେହି ସମ୍ବନ୍ଧରେ ବାର୍ତ୍ତା ଦିଆଯାଇଥିଲା । ଜିଲାସ୍ତରରେ ଆଞ୍ଚଳିକ ପରିବହନ କାର୍ଯ୍ୟାଳୟ ଏବଂ ପୁଲିସର ମିଳିତ ସହଯୋଗରେ ବିଭିନ୍ନ ସଚେତନତା ମୂଳକ ସଡ଼କ ସୁରକ୍ଷା ସମ୍ବନ୍ଧୀୟ କାର୍ଯ୍ୟକ୍ରମମାନ ଆୟୋଜନ ମଧ୍ୟ କରାଯାଇଥିଲା । କିନ୍ତୁ, ସରକାରଙ୍କ ଏତେ ସବୁ ପ୍ରଚେଷ୍ଠା ପରେ ବି ସତର୍କ ହେଉନାହାନ୍ତି ଲୋକେ ।
ଦ୍ରୁତ ବେଗରେ ଗାଡି ଚଳାଇବା କାରଣରୁ ଅନେକ ସମୟରେ ଦୁର୍ଘଟଣା ଘଟିବା ସହ ଚାଲିଯାଉଛି ବହୁମୂଲ୍ୟ ଜୀବନ । ଭୁବନେଶ୍ୱରରେ ଆଜି ଠିକ୍ କିଛି ଏମିତି ଘଟଣା ଘଟିଥିବା ଦେଖିବାକୁ ମିଳିଛି । ସ୍ପିଡ୍ ବାଇକିଂ ପାଇଁ ଘଟିଛି ବଡ଼ ଅଘଟଣ । ଭୁବନେଶ୍ଵର ଜୟଦେବ ବିହାର ଫ୍ଲାଏ ଓଭରବ୍ରିଜ୍ ଉପରେ ଖରାପ ହୋଇ ଛିଡା ହୋଇଥିବା ହାଇୱା ଟ୍ରକ୍ ପଛରେ ଏକ ବାଇକ୍ ସହ ଜଣେ ଅଜଣା ଯୁବକ ପଶିଯାଇଥିବା ଦେଖିବାକୁ ମିଳିଛି ।
Also Read
ଅଧିକ ପଢ଼ନ୍ତୁ: ରାଜ୍ୟ ଭିଜିଲାନ୍ସ ନାଁରେ ନୂଆ ରେକର୍ଡ; ୬ ମାସରେ ଧରାପଡ଼ିଛନ୍ତି ୫୦ କ୍ଲାସ୍ ୱାନ୍ ଅଫିସର୍...
ଚାଳକ ଜଣକ ଦ୍ରୁତଗତିରେ ବାଇକ୍ ଚଲାଇ ଯାଉଥିବା ବେଳେ ଭାରସାମ୍ୟ ହରାଇ ଟ୍ରକ୍ର ପଛପଟୁ ଧକ୍କା ଦେଇଥିବା ଜଣାପଡିଛି । ଏହାପରେ ଗୁରୁତର ଅବସ୍ଥାରେ ଆହତ ଚାଳକଙ୍କୁ ଉଦ୍ଧାର କରାଯାଇ କ୍ୟାପିଟାଲ ହସ୍ପିଟାଲକୁ ଚିକିତ୍ସା ପାଇଁ ନିଆଯାଇଛି । ତେବେ ଦୁର୍ଘଟଣାରେ ଆହତ ହୋଇଥିବା ଚାଳକଙ୍କ ପରିଚୟ ମିଳିପାରିନାହିଁ । ରାଜଧାନୀରେ ଫିଲ୍ମ ଷ୍ଟାଇଲରେ ଘଟିଥିବା ଏହି ଦୁର୍ଘଟଣା ଦେଖିବାକୁ ଓଭରବ୍ରିଜ୍ ଉପରେ ଭିଡ଼ ଜମିଥିଲା । ଜୟଦେବ ବିହାର ଓ ଇସ୍କନ ମନ୍ଦିର ମଝିରେ ଘଟିଛି ଏଭଳି ଦୁର୍ଘଟଣା । ଓଭରବ୍ରିଜ୍ ଉପରେ ଦୁର୍ଘଟଣା ଯୋଗୁଁ ଟ୍ରାଫିକ୍ ଜାମ୍ ପରସ୍ଥିତି ସୃଷ୍ଟି ହୋଇଥିବା ବେଳେ ଘଟଣାସ୍ଥଳରେ ପହଞ୍ଚି ଟ୍ରାଫିକ୍ କ୍ଲିୟର କରିଛି କମିଶନରେଟ ପୋଲିସ୍ ।