ଘର ଭିତରେ ଫାଟିଲା ଫ୍ରିଜ୍‌; ଚାଲିଗଲା ଗୋଟିଏ ପରିବାରର ୩ ପିଲାଙ୍କ ସମେତ ୫ ଜୀବନ

ହଠାତ୍‌ ଘର ଭିତରୁ ଶୁଭିଲା ଭୟଙ୍କର ଶବ୍ଦ । ପରେ ଚାହୁଁ ଚାହୁଁ ଲାଗିଗଲା ନିଆଁ । କେହି କିଛି ଜାଣିବା ପୂର୍ବରୁ ଜୀବନ ମରଣ ସହ ସଂଗ୍ରାମ କରି ଚାଲିଗଲା ଗୋଟିଏ ପରିବାରର ୫ଜଣଙ୍କ ଜୀବନ । ମୃତକଙ୍କ ମଧ୍ୟରେ ୩ଜଣ ଶିଶୁ ରହିଥିବା ବେଳେ ଜଣେ ୭୦ ବର୍ଷୀୟ ବୃଦ୍ଧ ମଧ୍ୟ ରହିଛନ୍ତି । ଅନ୍ୟ ଜଣେ ମହିଳାଙ୍କ ମୃତ୍ୟୁ ଘଟିଛି ।

ସୂଚନା ମୁତାବକ ରବିବାର ରାତିରେ ଏହି ଘଟଣା ଘଟିଛି । ହଠାତ୍‌ କୌଣସି କାରଣରୁ ଫ୍ରିଜ୍‌ର କମ୍ପ୍ରେସର ବିସ୍ଫୋରଣ ହେବା ଯୋଗୁ ଗୋଟିଏ ପରିବାରର ୫ଜଣଙ୍କ ମୃତ୍ୟୁ ହୋଇଛି । ବିସ୍ଫୋରଣ ପରେ ସମସ୍ତ ୫ ଗୁରୁତରଙ୍କୁ ଉଦ୍ଧାର କରାଯାଇ ଡାକ୍ତରଖାନାରେ ଭର୍ତ୍ତି କରାଯାଇଥିଲା । ହେଲେ ସେଠାରେ ସେମାନଙ୍କ ମୃତ୍ୟୁ ହୋଇଥିବା ମେଡିକାଲ କର୍ତ୍ତୃପକ୍ଷ ସୂଚନା ଦେଇଛନ୍ତି ।

ଏଭଳି ଏକ ଘଟଣା ପଞ୍ଜାବର ଜଳନ୍ଧର ଜିଲ୍ଲାରୁ ସାମ୍‌ନାକୁ ଆସିଛି । ରବିବାର ରାତିରେ ସହରର ଅବତାର ନଗର ଅଞ୍ଚଳରେ ଏହି ଘଟଣା ଘଟିଛି । ପୋଲିସର ସୂଚନାନୁସାରେ ବିସ୍ଫୋରଣ ପରେ ଘରେ ନିଆଁ ଲାଗିଯାଇଥିଲା । ଫଳରେ ପରିବାରର ୫ ଜଣ ଗୁରୁତର ହୋଇଥିଲେ । ସେମାନଙ୍କୁ ସିଭିଲ ହସ୍ପିଟାଲ ଜଳନ୍ଧରକୁ ନିଆଯାଇଥିଲା । କିନ୍ତୁ ସେଠାରେ ସମସ୍ତଙ୍କ ମୃତ୍ୟୁ ହୋଇଛି ।

ମୃତକମାନେ ହେଲେ, ୭୦ ବର୍ଷୀୟ ଯଶପାଲ ଘାଇ, ୪୦ ବର୍ଷିୟ ରୁଚି ଘାଇ, ୧୪ ବର୍ଷିୟ ମାନସ, ୧୨ ବର୍ଷିୟ ଦିୟ ଏବଂ ୧୦ ବର୍ଷିୟ ଅକ୍ଷୟ ବୋଲି ଜଣାପଡ଼ିଛି । ଘଟଣାସ୍ଥଳରେ ଫରେନସିକ୍‌ ଟିମ୍‌ ପହଞ୍ଚି ତଦନ୍ତ ଆରମ୍ଭ କରିଛି । କେଉଁ କାରଣରୁ ଏପରି ଏକ ଭୟଙ୍କର ବିସ୍ଫୋରଣ ହେଲା ସେନେଇ ତନାଘନା ଚାଲିଛି। ନମୁନା ସଂଗ୍ରହ କରାଯାଇଥିବା ବେଳେ ପରବର୍ତ୍ତୀ ସମୟରେ ଏହାର ସଠିକ୍‌ କାରଣ ଜଣାପଡ଼ିବ ବୋଲି ପୋଲିସ କହିଛି ।