ବାହାଘରରୁ ଫେରୁଥିଲେ ବରଯାତ୍ରୀ, ବୁଡ଼ିଗଲା ଡଙ୍ଗା ! ଚାଲିଗଲା ଶତାଧିକ ଜୀବନ

ମଙ୍ଗଳବାର ନାଇଜେରିଆରେ ଏକ ବଡ଼ ଦୁର୍ଘଟଣା ଘଟିଛି। ପୋଲିସ ଏବଂ ସ୍ଥାନୀୟ ଅଧିକାରୀ କହିଛନ୍ତି ଯେ ୩୦୦ ଲୋକଙ୍କୁ ନେଇ ବିବାହରୁ ଫେରୁଥିବା ଏକ ଡଙ୍ଗା ଉତ୍ତର କେନ୍ଦ୍ରୀୟ ନାଇଜେରିଆର ଏକ ନଦୀରେ ବୁଡ଼ି ଯାଇଛି । ମିଳିଥିବା ସୂଚନା ଅନୁଯାୟୀ ଏହି ଘଟଣାରେ ଏବେ ସୁଦ୍ଧା ୧୦୩ ଜଣଙ୍କ ମୃତ୍ୟୁ ହୋଇଛି । ଅନେକ ନିଖୋଜ ଅଛନ୍ତି । ଅଧିକାରୀଙ୍କ କହିବାନୁଯାୟୀ ଏହି ଘଟଣାରେ ମୃତ୍ୟୁ ସଂଖ୍ୟା ବଢ଼ିବାର ଖୁବ୍‌ ସମ୍ଭାବନା ରହିଛି । ଏବେ ବି ଉଦ୍ଧାର କାର୍ଯ୍ୟ ଜାରି ରହିଛି ।

ନ୍ୟୁଜ୍ ଏଜେନ୍ସି AFP ର ରିପୋର୍ଟ ଅନୁଯାୟୀ, ନାଇଜର ରାଜ୍ୟରେ ବିବାହ ଉତ୍ସବ ଅନୁଷ୍ଠିତ ହୋଇଥିଲା। ବିବାହ ଉତ୍ସବରେ ଯୋଗଦେବାକୁ ଆସିଥିବା ଅତିଥିମାନଙ୍କୁ ଡଙ୍ଗାଟି କୁୱାରା ରାଜ୍ୟକୁ ନେଇ ଯାଉଥିଲା । ବର୍ଷା ଏବଂ ଅଧିକ ଲୋକ ଯୋଗୁଁ ଡଙ୍ଗାଟି ଭାରସାମ୍ୟ ହରାଇଥିଲା । କୁୱାରା ରାଜ୍ୟ ପୋଲିସ ଓକାସାନମି ଅଜୟ କହିଛନ୍ତି ଯେ ଦୁର୍ଘଟଣାରେ ଏପର୍ଯ୍ୟନ୍ତ ୧୦୩ ଜଣଙ୍କର ମୃତ୍ୟୁ ଘଟିଛି ଏବଂ ୧୦୦ ରୁ ଅଧିକ ଲୋକଙ୍କୁ ଉଦ୍ଧାର କରାଯାଇଛି । ଅନେକ ଏବେ ବି ନିଖୋଜ ଅଛନ୍ତି ।

ନିରାପତ୍ତା ପ୍ରଣାଳୀର ଅଭାବ ଏବଂ ପ୍ରବଳ ବନ୍ୟା ଯୋଗୁଁ ନାଇଜର ନଦୀରେ ଡଙ୍ଗା ବୁଡ଼ି ଏକ ସାଧାରଣ କଥା। ଗତ ମାସରେ ଉତ୍ତର-ପଶ୍ଚିମ ସୋକୋଟୋ ରାଜ୍ୟରେ ଏକ ଡଙ୍ଗା ଓଲଟି ପଡ଼ିଥିଲା । ଏହି ଦୁର୍ଘଟଣାରେ ୧୫ ଜଣ ଶିଶୁ ବୁଡ଼ି ଯାଇଥିବା ବେଳେ ୨୫ ଜଣ ନିଖୋଜ ଥିଲେ । ସେହିଭଳି ପ୍ରାୟ ଏକ ବର୍ଷ ପୂର୍ବେ, ଗୋଟିଏ ଗାଁର ୨୯ ପିଲା ମଧ୍ୟ ବୁଡ଼ିଯାଇଥିଲେ । ସେମାନେ ନିଜ ପରିବାର ପାଇଁ ଜାଳେଣୀ କାଠ ସଂଗ୍ରହ କରିବାକୁ ଯାଇଥିବା ବେଳେ ତାଙ୍କ ଡଙ୍ଗା ବୁଡ଼ି ଯାଇଥିଲା । ଗତ ଡିସେମ୍ବରରେ ବଡ଼ ବନ୍ୟା କାରଣରୁ ପାଖାପାଖି ୭୬ ଜଣଙ୍କ ଜୀବନ ଯାଇଥିଲା । 

ପଶ୍ଚିମ ଆଫ୍ରିକାର ମୁଖ୍ୟ ଜଳପଥ ହେଉଛି ନାଇଜର ନଦୀ । ଏହା ଅନ୍ୟ କେତେକ ଦେଶ ପାଇଁ ଏକ ପ୍ରମୁଖ ବାଣିଜ୍ୟ ମାର୍ଗ । ତେବେ ଏଭଳି ଦୁର୍ଘଟଣାକୁ ରୋକିବା ପାଇଁ ସ୍ଥାନୀୟ ସରକାର ବଡ଼ ପଦକ୍ଷେପ ନେଇଛନ୍ତି । ରାତିରେ ଡଙ୍ଗା ଚାଳନା ବ୍ୟାନ କରିବା ସହ ଓଭରଲୋଡିଂକୁ ମଧ୍ୟ ବ୍ୟାନ କରିଛନ୍ତି ।